Къабарты-Малкъарны Парламентини бешинчи чакъырылыууну орта кюн болгъан жыйылыуу хычыуун жумушха жораланнганды – республиканы экономикасын, социал сферасын, культурасын, саулукъ сакълауун, билим бериуюн, спортун эм башха бёлюмлерин да айнытыугъа къыйын салгъанла белгиленнгендиле. Ол кюн республиканы законла чыгъарыучу органыны сыйлы грамоталары эмда спикерни ыспас къагъытлары бла битеу да 90 адам саугъаланнганды.
Кесини алгъышлау сёзюнде, республиканы законла чыгъарыучу органыны башчысы Татьяна Егорова алагъа жюрек ыразылыгъын билдиргенди.
-Хар биригиз да уллу махтаугъа тийишлисиз. Нек дегенде къыралны, республиканы, жамауатны да къадарлары ючюн энчи къайгъырасыз, аны игилендирир ючюн къолугъуздан келгенни аямайсыз. Уруннган жеригизде жетишимлени къыралгъа бек къыйын заманлада болдургъанладансыз, бир кере угъай, дайым да,- деп, спикер алагъа кийик саулукъ, узакъ ёмюр, насып тежегенди.
Андан сора саугъалаула башланнгандыла. Къабарты-Малкъар Республиканы Парламентини Сыйлы грамотасы бла иги кесек адам белгиленнгенди.
Граждан обществону институтларын айнытыугъа юлюшлерин къошханлары ючюн саугъаланнганланы араларында «Боевое братство» битеуроссей жамауат организацияны Къабарты-Малкъарда бёлюмюню башчысы Гелястанланы Барасбий, «Россейни ич ишле органларыны эмда ич аскерлени къаугъалагъа къатышхан ветеранларыны ассоциациясы» битеуроссей биригиуню регион бёлюмюню таматасы Князланы Сулемен да болгъандыла. Бу саугъагъа Нальчик шахар округну жер-жерли администрациясыны башчысы Таймураз Ахохов, Тырныаууз шахарны мэри Жаппуланы Руслан, Нальчик шахарны ЗАГС-ыны начальниги Валентина Шериева да тийишли кёрюлгендиле.
Илмуну бла билим бериуню айнытыугъа уллу къыйын салгъанлары ючюн да иги кесек адам белгиленнгенди, ол санда Къабарты-Малкъар къырал университетни медицина факультетини деканы Мызыланы Исмайыл, Сабий чыгъармачылыкъны «Кюн шахар» академиясыны таматасыны биринчи орунбасары, фахмулу сабийлени лицейини башчысы Жаппуланы Тамара, Яникойда Байсолтанланы Алим атлы орта школну устазы Къалабекланы Нафисат.
Саулукъ сакълауда жетишимле болдургъанлары ючюн да иги кесек адам саугъаланнганды. Аланы арасында КъМР-де Ич ишле министерствону медицина-санитар частындан Макытланы Марианна, Республикалы клиника больницада врач-фармаколог болуп ишлеген Акъкъызланы Ферюза да болгъандыла.
Экономика, социал, энергетика, туризм жаны бла махтаугъа тийишли болгъанланы араларында КъМР-ни Экономиканы айнытыу министерствосуну бёлюмюню таматасы Жеттеланы Марина, КъМР-ни Урунуу эмда социал къоруулау министерствосуну къуллукъчусу Туменланы Лейла, КъМР-ни Курортла эм туризм министерствосуну бёлюмюню таматасы Шауаланы Ислам, КъМР-ни Энергетика, тарифле эмда жашау журтлагъа надзор этиу жаны бла министерствосуну бёлюмюню таматасы Гасыланы Азнор болгъандыла.
Бу жол журналистлени къыйынларына да тийишли багъа берилгенди. КъМР-ни Парламентини Сыйлы грамоталары бла «Заман» газетни баш редакторуну орунбасары  Жангоразланы Нажабат, «Адыгэ псалъэ» газетни редакциясыны тилманчла бёлюмюню редактору Анатолий Танашев, «Къабарты-Малкъар» телеканалны бериулерин бардырыучусу Самара Саральпова, «КъМР-Медианы» радиосуну къабарты тилде бериулерин бардырыучусу Лидия Кудаева саугъаланнгандыла.
Бизни къалам къарындашларыбызны бир къаууму уа КъМР-ни Парламентини Председателини Ыспасына тийишли болгъандыла, ол санда «Заман»  газетни баш редакторуну орунбасары Текуланы Хауа, «Адыгэ псалъэ» газетни баш редакторуну биринчи орунбасары Марина Жекамухова, «Адыгэ псалъэ» газетни илму эмда билим бериу бёлюмюню корреспонденти Алла Харадурова, «Горянка» газетни бёлюмюню редактору Ольга Калашникова.
Татьяна Егорова саугъаланнганланы энтта да бир кере алгъышлагъанды эмда ала бла бирге суратха тюшгенди.