Урысей Федерацэм Спорт бэнэкIэхэмкIэ и федерацэм и пресс-IуэхущIапIэм иджыблагъэ зэбгригъэха хъыбарым къызэрыхэщымкIэ, Албанием и къалащхьэ Тиранэ жэп­уэгъуэм и 23 - 29-хэм щызэ­хэтынущ бэнэкIэ хуитымрэ алыдж-урым бэнэкIэмкIэ дунейпсо зэхьэзэхуэ. ЦIыху­хъу­хэмрэ цIыхубзхэмрэ абы щы­щIэбэнынущ медаль комплекту 30-м.

Ди гуапэ зэрыхъущи, УФ-м и командэ къыхэхам и тренерхэм зэхьэзэхуэм хагъэхьащ Къэбэрдей-Балъкъэрым щыщ спортсменитI. БэнэкIэ хуитымкIэ килограмм 70 зи хьэлъагъ­хэм я деж къэралым и щIы­хьыр щихъумэнущ Урысей Федерацэм бжьыпэр щыубы­ды­ным хуэунэтIауэ екIуэкIа зэ­пе­уэм илъэс 23-рэ иримыкъуахэм я деж япэ увыпIэр къыщызыхьауэ щыта Шэру Иналбэч.
Алыдж-урым бэнэкIэмкIэ дунейпсо зэпеуэм хэтынущ Сербием и къалащхьэ Белград мы гъэм щекIуэкIа дунейпсо чемпионатым ещанэ увыпIэр щызыубыда Гъуэныбэ Iэуес. ЩIалэр щыбанэр килограмм 82-рэ хъухэр зыхэт гупырщ. 
Къыхэдгъэщынщи, Урысей Федерацэм къращIылIа дэкъу­зэныгъэхэм къыхэкIыу Тиранэ щекIуэкIыну зэпеуэхэм ди командэр хэтынущ зыщыщ къэралыр къэмыгъэлъэгъуауэ.

ХЬЭЩЫКЪУЕЙ Олег.