Адыгэхэм я дунейпсо махуэм ирихьэлIэу, Кэнжэ ЩэнхабзэмкIэ и унэм пшыхь гуапэ щекIуэкIащ, адыгэбзэмкIэ егъэджакIуэхэр щагъэлъапIэу.
«Адыгэбзэ - адыгэпсэ» зыфIаща зэхыхьэм кърагъэблэгъат Къэбэрдей Адыгэ Хасэм и тхьэмадэ ХьэфIыцIэ Мухьэмэд, «Эльбрус» тхылъ тедзапIэм адыгэбзэкIэ къыщыдэкI тхылъхэм я редактор Джэрыджэ Арсен, Кэнжэ къуажэм и щIыпIэ администрацэм и Iэтащхьэ Степан Эдуард, Къэбэрдей Адыгэ Хасэм и Налшык къудамэм и унафэщI НафIэдз Мухьэмэд сымэ.
Кэнжэ ЩэнхабзэмкIэ и унэм и унафэщIым и къуэдзэ Балэ Людмилэ пшыхьыр къыщызэIуихым, къызэхуэсахэм махуэшхуэмкIэ ехъуэхъуащ икIи ар илъэс куэд-кIэ ягъэлъэпIэну къахузэпищэну зэригуапэр жиIащ. «ЗэрыфщIэщи, 2023 гъэр ЕгъэджакIуэмрэ унэтIакIуэмрэ я илъэсщ. Ар къалъытэри, Дунейпсо Адыгэ Хасэм и тхьэмадэ Сэхъурокъуэ Хьэутийрэ Къэбэрдей Адыгэ Хасэм и тхьэмадэ ХьэфIыцIэ Мухьэмэдрэ гупыж ящIащ щIыхь тхылъхэмрэ тхылъ саугъэтхэмкIэ ди егъэджакIуэхэр ягъэгушхуэ-ну. Анэдэлъхубзэм хуэсакъым лъэпкъри ихъумэу аращи, мы Iуэхугъуэр икъукIэ ди гуапэу къызэдгъэпэщащ. ЕгъэджакIуэхэр фыжыджэру, фи дерсхэр щIэщыгъуэу къызэвгъэпэщу, щIэблэр анэдэлъхубзэм девгъэхьэхыфу иджыри илъэс куэдкIэ Тхьэм фигъэлажьэ», - жиIащ Балэм.
Степан Эдуард адыгэ лъэпкъым ехъуэхъуащ нэхъыжьыфIхэр ущиякIуэу иджыри куэдрэ япэ итыну, ныбжьыщIэхэр узыншэу, Iущыцэу къыхуэхъуну. «Адыгэм хабзэ дахэхэр диIэщи, абыхэм тетын, лъэпкъыр зыгъэпэжын дэтхэнэри Тхьэм дищI», - къыхигъэщащ абы.
- Ди егъэджакIуэ дыщэхэ! Фигу къэзгъэкIыжынщи, КъБР-м Егъэджэныгъэмрэ щIэныгъэмкIэ и министерствэр ди дэIэпыкъуэгъуу, 1999 гъэм «Си бзэ, си псэ - си дуней» зэпеуэр едгъэжьауэ щытащ, егъэджакIуэхэр дгъэпажэу, - пищащ адэкIэ ХьэфIыцIэ Мухьэмэд. - Абы лъандэрэ илъэс тIощIрэ плIырэ дэкIащи, ди къуажэхэр псори къызэхэткIухьащ, егъэджакIуэ нэс куэди дгъэпажащ. ИкъукIэ си гуапэщ Адыгэхэм я махуэм теухуа мы пшыхьым абыхэм ящыщ куэд нобэ къызэрырихьэлIар. Фи IэщIагъэр нэхъ пажэхэм, мыхьэнэшхуэ зыпылъхэм ящыщщ. Адыгэм и щIэблэ дахэм я анэдэлъхубзэр ивогъащIэри, Тхьэм фыхущIигъэхьэ, гукъыдэжрэ узыншагъэрэ къывит.
Дунейпсо Адыгэ Хасэм къыбгъэдэкI ЩIыхь тхылъыр иратыжащ илъэс 50-м щIигъуауэ егъэджэныгъэ лэжьыгъэм хэт Къэрэжь Тамарэрэ Сэрахъэ Людэрэ. Къэбэрдей Адыгэ Хасэм и бгъэхэIу дамыгъэр ХьэфIыцIэ Мухьэмэд хуигъэфэщащ адыгэбзэм зегъэужьыным зэпымыууэ егугъу Балэ Людмилэ.
НафIэдз Мухьэмэд ЩэнхабзэмкIэ унэм и лэжьакIуэхэм фIыщIэ яхуищIащ, адыгэ Iуэхум теухуауэ сыт щыгъуи зэхыхьэ щIэщыгъуэ куэд зэрырагъэкIуэкIыр къыхигъэщу.
ЕгъэджакIуэхэр ягъэпажа нэужь, абыхэм я нэгу зрагъэужьащ «Нэмыс» сабий къэфакIуэ гупым хэтхэм, ТхьэкIумащIэ Аслъэн, ШыкIэбахъуэ Ислъам, Хъупэ Марьянэ, Къагъырмэс ФатIимэ, Щокъуий Мурат, Iэпсэ Дианэ сымэ.
БАГЪЭТЫР Луизэ.
Сурэтхэр
Къарей Элинэ трихащ.