20 сентября, 2023 - 07:01
Урысейм и Ипщэ лъэныкъуэмкIэ щыпсэу лъэпкъхэм я щэнхабзэмрэ спортымкIэ фестивалым Къэбэрдей-Балъкъэрым и лIыкIуэхэри хэтащ.
КъызэгъэпэщакIуэхэм хъыбар къызэрыдагъэщIамкIэ, мы гъэм а зэхуэсым къызэрымыкIуэу куэд къыхыхьащ. Кавказ Ипщэмрэ Ищхъэрэмрэ, Донецк, Луганск республикэхэм, Запорожьем, Херсон щIыналъэм къабгъэдэкIыу гуп 19 екIуэлIащ абы.
Фестивалыр «Спортыр ди гъащIэм и мардэщ» федеральнэ Iуэхум ипкъ иткIэ зэхашащ.
Ар къыщызэIуахым хэтащ УФ-м и Президентым и полномочнэ лIыкIуэу Кавказ Ищхъэрэм щыIэ Чайкэ Юрийрэ республикэхэм я лIыкIуэхэмрэ.
- Урысейм и хэгъэгу 16-м я лIыкIуэхэр щызэхуэсащ мыбы, - жиIащ Чайкэ Юрий. - Мы Iуэхум япэу къыхыхьащ Луганскэ, Донецкэ республикэхэр. Мы зэхуэсым и инагъыр, къызэщIиубыдэр къэплъытэмэ, спортым зегъэужьынымрэ Урысейм и Ипщэ щIыналъэм хэку щэнхабзэр хэIущIыIу щыщIынымкIэ мы зэхыхьэм мыхьэнэшхуэ иIэщ, - жиIащ абы.
Спортсменхэм ехъулIэныгъэхэр яIэну, артистхэр гушхуэныгъэ щымыщIэну ехъуэхъуащ Чайкэ Юрий.
Къэбэрдей-Балъкъэрым икIахэм а зэхыхьэм лъэпкъ пщIантIэхэр щагъэуващ, абы и фIыгъэкIэ къызэхуэсахэр ди республикэм щыпсэухэм я щыIэкIэ псэукIэм, лъэпкъ хабзэхэм нэIуасэ хуэхъуащ. Лъэпкъ IэпщIэлъапщIэхэм я IэрыкIхэр, художественнэ тхыгъэхэр, хьэкъущыкъухэр утыку къыщрахьащ абы. КъБР-м и Лъэпкъ музейм декоративно-прикладной гъуазджэмкIэ гъэлъэгъуэныгъэ къыщызэрагъэпэщащ абдеж.
Щэнхабзэ дауэдапщэхэм хэтащ гъуазджэм и лэжьакIуэхэмрэ республикэм и творческэ гупхэмрэ.
Тэрчокъуэ Дисэ.