Тхьэмахуэ блэкIам и щэбэтым яублэри, Адыгэ Республикэм и Мейкъуапэ районым хыхьэ Дахъуэ кIейм махуитIкIэ щызэхэтащ Адыгей кхъуейм и щIыналъэпсо фестивалышхуэ. Унэкхъэжь бгылъэ щIыпIэм пэмыжыжьэу къызэрагъэпэща а лъэпкъ, щэнхабзэ, хьэрычэтыщIэ зэхуэс иныр иджы 12-нэу щрагъэкIуэкI гъунэгъу адыгэ щIыналъэм. Абы кърихьэлIат АР-м и Iэтащхьэ КъумпIыл Мурат, республикэм и Министрхэм я Кабинетым хэтхэр, абы и министерствэхэм я унафэщIхэмрэ щIыналъэхэм я Iэтащхьэхэмрэ, нэгъуэщIхэри. АР-м и Министрхэм я Кабинетым къыхилъхьа жэрдэмым ипкъ иткIэ илъэс бжыгъэ хъуауэ зэхашэ махуэшхуэм хэтащ КъБР-м, КъШР-м, гъунэгъу щIыналъэхэм, хамэ къэралхэм къикIа цIыху куэд.
КъулыкъущIэхэми унэгуащэхэми, балигъхэми ныбжьыщIэхэми, цIыхухъухэми бзылъхугъэхэми, хэкурысхэми хамэ щIыпIэхэм къикIахэми – псоми зэхуэдэу яфIэхьэлэмэт махуэщIыр гъэщIэгъуэну, Iуэхугъуэ зэмылIэужьыгъуэ куэдкIэ гъэнщIауэ екIуэкIащ. Фестивалым кърихьэлIа псоми фIэхъус псалъэкIэ захуигъэзащ АР-м и Iэтащхьэ КъумпIыл Мурат.
- Къэралым, дунейм и щIыпIэ куэдым цIэрыIуэ щыхъуа ди адыгей кхъуейм и щIыхькIэ нобэ ди республикэм 12-нэу щызэхэтша гуфIэгъуэ зэхуэс иным кърихьэлIа псоми сэлам фызох. Ди гуапэ зэрыхъущи, мы Iуэхугъуэр щIыналъэм зэрыщедгъэкIуэкIынум и хъыбарыфIыр нэхъапэIуэкIэ щызэлъащIысащ Кавказ Ищхъэрэми гъунэгъу щIыпIэхэми. Абы и щыхьэтщ нобэ Iуэхум кърихьэлIа нэгузегъэужьакIуэхэм ящыщ куэдым республикэм зэрыщыIэну я зыгъэпсэхугъуэр мы махуэхэм зэрытрагъэхуар, Адыгейм кхъуейм щращIэкI дауэдапщэ хьэлэмэтым щыгъуазэ зыхуащIын, езыхэри абы жыджэру хэтын папщIэ, - жиIащ КъумпIылым. – Къыхэзгъэщынщи, зызыужь, ефIакIуэ зэпыту екIуэкI ди щIыналъэм зыщеузэщI экономикэм и унэтIыныгъэ куэдым. Кхъуейрэ абы къыхащIыкI ерыскъыпхъэхэу нэгъабэ и закъуэ тонн мин 26-рэ щащIащ республикэм. Ипэ ита илъэсым ебгъапщэмэ, ар процент 20-кIэ нэхъыбэщ. Ди кхъуейр щыцIэрыIуэр Адыгейм и закъуэкъым, атIэ Урысей Федерацэм хыхьэ щIыналъэ куэдым щызэбграх, щIэупщIэшхуэ иIэу. Адыгэхэм ди лъэпкъ шхыныгъуэ нэхъыщхьэхэм ящыщ кхъуейм нобэ хузэхэтша дауэдапщэр абы кърихьэлIа дэтхэнэми гукъинэж дахэ хуэхъун папщIэ, махуэщIыр къызэзыгъэпэщахэм ялъэкI псори зэращIэнум шэч хэлъкъым. Зывгъэпсэху, адыгей кхъуейм, нэгъуэщI ерыскъыпхъэхэми къахэщIыкIа лъэпкъ шхын зэмылIэужьыгъуэхэр зыIувгъахуэ, фи нэгу зевгъэужь, ди къуэшхэ, ди хьэщIэ лъапIэхэ.
Мейкъуапэ къалэм и утыку нэхъыщхьэм 2012 гъэм япэ дыдэу щрагъэкIуэкIа махуэшхуэм и купщIэкIи, и теплъэкIи зиужьащ, Iуэхугъуэ хьэлэмэт куэди къыхыхьащ. Дахъуэ губгъуэм щагъэуват лъэпкъ пщIантIэхэр, абы къыщызэIуахат кхъуейм къыдэкIуэу, нэгъуэщI гъэшхэкIхэри, хьэпшып цIыкIухэри, саугъэт хьэлэмэтхэ-ри щащэ жармыкIэхэр. Щыкуэдт лъэпкъ IэфIыкIэхэу тхъурыжьыр, хьэлыуэр, зэкIэрысыр, хъарбыз фор, апхуэдэуи лэкъумыр, лыр, пIастэр, шыпсыр. Лъэпкъ пщIантIэхэм бысымхэм ирагъэблагъэрт махуэшхуэм къекIуэлIахэр, адыгей кхъуейм и лIэужьыгъуэхэм хьэлэмэту къахутепсэлъыхьу, ар куэду зытет Iэнэ къыхуащтэу. Языныкъуэ пщIантIэхэм унэгуащэхэм щагъэлъэгъуащ кхъуей зэрыхах щIыкIэр. Абдеж щыхахагъащIэ кхъуей хуабэр, шэжыпс къызыпыжыр, дауи, IэфIыщэт.
Лъэпкъ пщIантIэхэм дыхьэурэ абыхэм махуэшхуэм къыщыхузэрагъэпэща Iуэхугъуэ псоми, гъэлъэгъуэныгъэ гъэщIэгъуэнхэри кхъуей хэхынымкIэ мастер-классхэри яхэту, щыгъуазэ зыхуащIащ республикэм, абы и къалащхьэмрэ хиубыдэ щIыпIэхэмрэ я пашэхэм. ЩIыналъэм и Iэтащхьэм хуэдэу, дауэдапщэм жыджэру хэтащ ахэр. ЦIыхухэм уахэплъэмэ, гу лъыптэрт АР-м щэнхабзэмкIэ и министр Iэулъэ Юрэ, АР-м Лъэпкъ Iуэхухэм, хамэщI щыпсэу ди лъэпкъэгъухэмрэ хъыбарегъащIэ IэнатIэхэмкIэ и комитетым и пашэ Щхьэлахъуэ Аскэр, Мейкъуапэ къалэм и администрацэм и Iэтащхьэ Митрофанов Геннадий сымэ, нэгъуэщI къэрал къулыкъущIэхэри жылагъуэ зэгухьэныгъэхэм я лIыкIуэхэри махуэщIым кърихьэлIахэм епсэлъылIэу, Iуэхум ехьэлIа хъыбар хьэлэмэтхэр ираIуэтылIэу зэрахэтым.
КъинэмыщIауэ, Адыгей кхъуейм и фестивалым хэтащ АР-м Лъэпкъ щэнхабзэмкIэ и центрым и IэщIагъэлIхэр. Абыхэм къызэрагъэпэщащ лъэпкъ IэпщIэлъапщIагъэмкIэ, IэрыщI гъуазджэмкIэ гъэлъэгъуэныгъэ-жармыкIэ хьэлэмэт. Центрым и лэжьыгъэм щыгъуазэ зыхуэзыщIа республикэ Iэтащхьэми адрей къулыкъущIэхэми а псори хуабжьу гунэс ящыхъуащ. Гъэлъэгъуэныгъэм кърахьэлIа хьэпшып хьэлэмэтхэм ящыщт пхъэм, мывэм, ятIагъуэм къыхэщIыкIахэр, апхуэдэуи дыщэидэ хьэпшыпхэр, сурэтхэмрэ Iэмэпсымэ гъэщIэгъуэн цIыкIухэмрэ. Абдеж дыдэм IэпщIэлъапщIэхэм щрагъэкIуэкIащ мастер-классхэр. ТхыпхъэщIыпхъэ зыхэлъ хьэпшып дахэхэр пхъэм къыхиIущIыкIащ бжьэдыгъу щIалэ Къуэстэкъуэ Руслан, адыгэ арджэн екIу абдеж щызэIуищащ абазэхэм ящыщ Даур Рэмэзан, дыщэидэмкIэ дерс гъэщIэгъуэнхэр ирагъэкIуэкIащ зи Iэпэм дыщэ къыпыщхэу кIэмыргуей пщащэ Сет Софят, шапсыгъ бзылъхугъэ Мыгу Рузаннэ, къэбэрдей цIыхубз БытIэ Азэ сымэ, урыс лъэпкъым щыщ Волгин Александр ятIэгъэкIыргъкIэ ятIагъуэм кхъуэщын пщэ псыгъуэ ныбэф дахэкIей къыхищIыкIат. Махуэшхуэм кърихьэлIа куэдым ягу ирихьащ адыгэ лъэпкъ псэукIэр зи лъабжьэ, бгъэIэпхъуэ хъу унэ-музейр. «Лъэужь» фIэщыгъэр зиIэ а лъэпкъ проектым и жэрдэмщIакIуэри къызэзыгъэпэща-ри «Матэ» адыгей кхъуей лIэужъьыгъуэр щащI IуэхущIапIэм и унафэщI, беслъэней хьэрычэтыщIэ щIалэ жыджэр ЦыщIэ Къазбэчщ.
Фестивалым утыку къришат адыгэхэм я мызакъуэу, къэралым щыпсэу лъэпкъхэм я лIыкIуэ куэд. ЖыпIэнурамэ, гуфIэгъуэр хъуат лъэпкъ зэныбжьэгъугъэм, зыузэщIыныгъэм я махуэщI.
А псоми къадэкIуэу фестивалым и утыкушхуэм щекIуэкIащ Шу Хасэм къызэригъэпэща шыгъажэ, кхъуеймрэ адрей лъэпкъ шхыныгъуэхэмрэ ятещIыхьа зэпеуэ зэмылIэужьыгъуэхэр, сабийхэм папщIэ зэхьэзэхуэ хьэлэмэтхэр, аттракционхэр лэжьащ, цIыху куэд зыхэта кхъуейплъыжькIэрыщIэ гъэщIэгъуэныр, нэгъуэщI Iуэхугъуэхэри. Республикэм и Джаджэ районым гъэшхэкIхэм щелэжьу щыIэ заводым и IэщIагъэлIхэм къыхалъхьэри, мыгъэрей фестивалым хьэлэмэту щызэпеуащ кхъуей зыфIэфIхэр. IуэхущIапIэм гъэунэхуныгъэхэр щрагъэкIуэкI и лабораторэм и пашэм и къуэдзэ Гъурыжь Маринэ зэрыжиIамкIэ, заводым и унафэщIхэм я жэрдэмым тету, мыбдеж щрагъэкIуэкIащ адыгей кхъуейр зэгъусэу шхынымкIэ цIыху куэд зыхэта флэшмобыр. Грамм 70 - 100 хъууэрэ зэпагъэлъэлъа кхъуей Iыхьэ цIыкIухэр зэпеуэу зэдашхащ махуэщIым къекIуэлIахэм ящыщу цIыху 254-м. Хэт нэхъ псынщIэу нэхъыбэ имышрэ, жаIэу къыхалъхьа зэхьэзэхуэм щытекIуар бгъэнэIуэну тынштэкъым, атIэми, апхуэдиз цIыху зыхэтар хьэлэмэтт икIи гукъыдэжыр къэзыIэтт. Нэхъыщхьэращи, эксперт-кIэлъыплъакIуэхэм зэрыжаIамкIэ, абдеж щагъэуващ кхъуей зэгъусэу шхынымкIэ урысейпсо рекорд. Ар иратхэнущ «Урысейм щагъэува рекордхэм я тхылъым».
КъыкIэлъыкIуэ махуэми пащащ гуфIэгъуэм. Iуэхум и кIэухыу хэIущIыIу ящIащ абы къыщызэрагъэпэща зэпеуэ зэмылIэужьыгъуэхэм, гъэлъэгъуэныгъэхэм пашэ щыхъуахэр. Апхуэдэхэт лъэпкъ пщIантIэхэм я нэхъыфIу къалъыта Куэшхьэблэм щыщхэм къызэрагъэпэщар, ерыскъы нэхъ IэфI дыдэ зыпщэфIауэ къалъытахэу Адыгейск къалэм щыщ Хьэкужь Замирэрэ Джаджэ районым и лIыкIуэ Гъыш ФатIимэтрэ. Тохъутэмыкъуей районым щыщ Ачмыжь Мысырхъан хуагъэфэщащ «Адыгей кхъуей нэхъыфI дыдэу зыщI» саугъэт лъапIэр.
ГуфIэгъуэр щекIуэкIа Iуэхугъуэ псори къызэщIикъуэжу, абы къекIуэлIа журналистхэм иужькIэ яхуэзащ КъумпIыл Мурат. ЗэфIагъэкIа лэжьыгъэмкIэ арэзы хъуа Iэтащхьэм фIыщIэ яхуищIащ ар къезыхьэлIа псоми. Абы зэрыжиIамкIэ, фестивалым дяпэкIи пащэнущ, «Адыгей кхъуей» фIэщыгъэ цIэрыIуэр нэхъри нэхъ хэIущIыIу ящIу. ДяпэкIэ ар щрагъэкIуэкIынущ, Iэтащхьэм и псалъэм къызэрыхигъэщамкIэ, Щхьэгуащэ (Белая) псым и сэмэгурабгъу Iуфэм къедза Дэгъуэкъуэ губгъуэм деж. Мы зэманым абы щокIуэкI ухуэныгъэ лэжьыгъэ зэмылIэужьыгъуэхэр.
КъумпIылым жэуап яритащ журналистхэм зэрызыхуагъэза упщIэхэм. Фестивалым ирагъэблэгъа, «Адыгэ псалъэ» газетым и редактор нэхъыщхьэ Жыласэ Заурбэч и упщIэр теухуат «Адыгей кхъуейм и фестивалым» и гъунапкъэхэр нэхъри ишэщIыным - гъунэгъу адыгэ щIыналъэхэри абы къыхэгъэхьауэ, зэхуэсми «Адыгэ кхъуейм и фестиваль» фIэщыгъэр епт щхьэ мыхъурэ? Абы и жэуапу щIыналъэм и Iэтащхьэм жиIащ «Адыгей кхъуей» фIэщыгъэр къэрал псом цIэрыIуэ щыхъуа сату фIэщыгъэу зэрыщытыр икIи юридическэ и лъэныкъуэкIэ къару зэриIэр. «Абы къыхэкIыу фестивалым и цIэр апхуэдэу къанэмэ, нэхъыфIщ, атIэми, «Адыгэм хьэщIэ и щIасэщ», - жыхуиIэращи, ди гуапэщ ди къуэш Къэбэрдей-Балъкъэрри Къэрэшей-Шэрджэсри абы къыхыхьэмэ», - къыхигъэщащ КъумпIылым.
Фестивалыр ягъэдэхащ абы и утыкухэм къыщызэрагъэпэща концерт зэмылIэужьыгъуэхэм. Iуэхум жыджэру хэтащ «Мейкъуапэ и пшэплъхэр» творческэ гупыр, республикэм и артистхэр, нэгъуэщIхэри. Ди республикэм икIауэ концертым хэтащ зи уэрэдхэр куэдым фIыуэ ялъагъу, Кавказым и артист вагъуэхэм халъытэ Хъыжьрокъуэ СулътIан. Iэгуауэшхуэхэм щIэту адыгэ щIалэм игъэзэщIа уэрэдхэм гур къызэщIаIэтэрт, псэр яхьэхурт, лъэр ягъэжанырт.
Лъэпкъ шхыныгъуэм и щIыхькIэ зэхаша махуэшхуэм къримыхьэлIэфахэм папщIэ «эфир занщIэ» къыщызэрагъэпэщат «Вконтакте» Интернет напэкIуэцIым.
МахуитIкIэ екIуэкIа гуфIэгъуэр зэхуащIыжащ адыгэ джэгу екIукIэ. ИужькIэ пщыхьэщхьэм хьэрэкIытIэ зэмыфэгъухэр ягъэлъэтащ. Абы хэ-тахэм фэеплъ сурэт куэд зытрагъэхащ, а Iуэху дахэм и гукъэкIыж хъун хуэдэу.
КЪАРДЭН Маритэ.
Налшык - Мейкъуапэ -
Налшык.