Тауукъ жумуртханы биширип, къуууруп, башха ашлагъа да къошуп ашайбыз. Аны косметологияда да хайырланадыла – шампуньлагъа, бетге неда чачха жагъыучу затлагъа къошадыла. Жумуртхаланы тюкенде къалай сайларгъа кереклисини, аны къаллай тюрлюлери болуучусуну, ала бузулмай къаллай бир заман сакъланнганларыны юсюнден Шимал Кавказны ведомствола аралы ветеринария лабораториясыны Къабарты-Малкъарда бёлюмюню ветеринар врачы Зарина Карданова билдиргенди.

- Жумуртха сатып алырдан алгъа аны юсюнде маркировкагъа эс буругъуз. «Д» деген харф диетагъа жараулу болгъаныны белгисиди. Ала жангы жумуртхаладыла, аллай халда жети кюн сакъланадыла, тауукъ тапхандан сора тюкеннге экинчи кюн жетедиле. Быллай жумуртхада агъы, сарысы да хайырлы затладан байдыла. Жети кюн озгъандан сора уа «столовый» деген тюрлюге кёчедиле. Аны отоуда 25 кюн, холодильникде уа 120 кюн тутаргъа жарайды.

Юсюнде «С» харфы «столовый» жумуртхада болады. Ауурлугъуна кёре аны быллай къауумлагъа бёледиле:

- «СВ» - эм бийик категория – 75 грамм;

- «СО» - айырмалы категория – 65-74,9 грамм;

- «С1» - биринчи категория – 55-64,9 грамм;

- «С2» - экинчи категория – 45-54,9 грамм;

- «С3» - ючюнчю категория, эм гитче жумуртхала- 35-44,9 грамм.

Жумуртхаланы орунунда ала къачан этилгенлери эмда хайырланыргъа жараулу болжалы жазылыргъа тийишлиди.

Аланы тюрсюнлерине да эс бура болурсуз. Ол тауукъну тюрлюсюне кёре болады: акъсылдымлада – агъыракъды, къара, тюрсюнлю, къызыл тауукълада уа – мор бетлиди. Алай аланы не татыулары неда хайырлы затларыны мардасы анга кёре башха болмайды. Кёпле уа бёдене жумуртхаланы сайлайдыла, алада витаминле, минералла асламыракъды дейдиле.

Къалай-алай болса да, жумуртха сатып алгъанда, къабугъуна иги къарагъыз. Ол таза болсун, сынмагъан, тюк жабышмагъан. Аланы кеслерин да холодильникде тутса игиди.