Метеорологхэм я дуней-псо зэгухьэныгъэм хэIущIыIу зэрищIамкIэ, дызыхуэкIуэ илъэситхум 2023 - 2027 гъэхэм - дунейм и щытыкIэм кIэлъыплъын зэрыщIидзэрэ къэмыхъуауэ, егъэлеяуэ хуабэу щытынущ.
ЩIэныгъэлIхэм зэрыжаIэмкIэ, иужьрей илъэс 50-м илъэси 5 къэс дунейм и хуабагъэм хэхъуэурэ кIуэ зэпытщ. Ар мардэ пыухыкIам тетуи щыткъым - зэм зреч, зэм къоувыIэж. Иужь дыдэу апхуэдэ зэхъуэкIыныгъэхэр къыщыхъуар 2013 - 2016 гъэхэм я зэхуакурщ - щIы хъурейр зэуэ градус 0,3-кIэ нэхъ хуабэ къэхъуащ. Абы лъандэрэ щытыкIэм зихъуэжакъым. ЗэрыхуагъэфащэмкIэ, ар и пIэм щикIынур мы гъэрщ, е дызыхуэкIуэ илъэсырщ - дунейр нэхъ хуабэж хъунущ.
США-м, Китайм, Швейцарием, Финляндием, Швецием, Ирландием я щIэныгъэлI гуп иджыблагъэ зэхуэсри, щIым и климат щытыкIэр зэфIэкIышхуэ зиIэ компьютерхэмкIэ къапщытащ икIи ягъэбелджылащ цIыхухэм я бжыгъэм, экономикэ щытыкIэм, щIым и хъугъуэфIыгъуэхэм, мэкъумэш къэкIыгъэхэм ар зэран зэрахуэхъуну лъэныкъуэхэр. Апхуэдэу компьютерым къигъэлъэгъуащ дызыхуэкIуэ илъэси 5-м градус 1,5-кIэ нэхъ хуабэ зэрыхъунур. Абыхэм япэжкIэ урысей академик Клименкэ Владимиррэ абы и щIэныгъэлI гупымрэ ардыдэр къагъэлъэ-гъуащ икIи ар зыхуэзэнур 2030 гъэрщ, 2070 гъэм ар градуси 2-м нэсынущ, экваторым пэгъунэгъу хы Щэхум и Iуфэхэр зэуэ нэхъ хуабэж хъууэ.
Дунейпсо щIэныгъэлIхэмрэ Урысейм ейхэмрэ а Iуэхум зэреплъхэр щызэщхьэщыкIи къохъу. Урысейм ЩIэныгъэхэмкIэ и Академием физикэмрэ атмосферэмкIэ и институтым и унафэщIым и къуэдзэ Семёнов Владимир зэрытепсэлъыхьамкIэ, иджырей IэмалыщIэхэм я фIыгъэкIэ щIэныгъэлIхэм дунейм и щытыкIэнур тхьэмахуэкIэ, мазэкIэ ипэ иту щыуагъэншэу къахутэфынущ. Апхуэдэ къабзэу ахэр щыгъуазэщ дяпэ илъэс 15 - 20-кIэ щIы хъурейм и климат щытыкIэм игъуэтыну зэхъуэкIыныгъэхэми.
- Европей къэралхэм, Урысейри яхэту, апхуэдэ хуабэ ямылейр къалъэIэсыну хуэдгъэфащэркъым. Зэман гъунэгъум дызыпагъаплъэ хуабэм и гугъу пщIымэ, ар нэхъ зытегуплIэнкIэ хъунур экваторым пэгъунэгъуу щыпсэухэрщ, - жиIащ абы.
Дунейм и щытыкIэр зэрихъуэжыр инерцэ мардэм тетущ - ар а зэрагугъэм хуэдэу тыншу зэщIэплъэркъым, ауэ зэ ежьамэ, къэувыIэжыгъуафIэ хъунукъым икIи апхуэдэ къэхъукъащIэ шынагъуэхэм я щапхъэщ дунейпсо хышхуэхэм я лъагагъым зыкъызэриIэтыр. КъекIэрэхъуэкIыжу дунейр а зэрыта щытыкIэм иувэжкIи, хым и зыкъэIэтыныр илъэсищэ зыбжанэкIэ къэмыувыIэу екIуэкIынущ.
Къапщтэмэ, иджыпсту атмосферэм хэт углекислэ газымрэ абы и хуабагъымрэ апхуэдизу заIэтащи, щIым и мыладжэхэр къэткIуу хуежьэным тошыныхь. Абдежым хым зыкъиIэтынущ зы метрэм щыщIэдзауэ тхум нэсыхукIэ. Ауэ, насып диIэщи, апхуэдэ мыл джейхэр илъэсищэ пIалъэкIэ ткIун къудейуэ аращ, апщIондэху щIэныгъэлIхэм, сыт къагупсысынуми, зэман яIэщ, - жеIа академик Клименкэ Владимир.
Шэрэдж Дисэ