Нартан (Къылышбийхьэблэ) къуажэм дэт ЩэнхабзэмкIэ унэм щIыналъэпсо мыхьэнэ зиIэ, иджырей гъэпсыкIэм ит библиотекэ куэд мыщIэу къыщызэIуахынущ. Литературэ уэршэрхэр, щIэныгъэ икIи щэнхабзэ псалъэмакъхэр щекIуэкI зэхуэсыпIэхэм ещхьу зэрагъэпэща щIыпIэм щIалэгъуалэр зэхуишэсыну, гъащIэм и лъэныкъуэ зэмылIэужьыгъуэхэм ехьэлIауэ абыхэм яIэ Iуэху еплъыкIэхэмкIэ щызэдэгуэшэн утыку хъуну аращ жэрдэмщIакIуэхэр я гукъэкIым зэрыщыгугъыр.

Иджырей щIэныгъэм иIэ щхьэхуэныгъэхэм ящыщщ цIыху щхьэхуэхэм ирагъэкIуэкI къэхутэныгъэхэм имызакъуэу, абы гупсысэным дихьэх дэтхэнэми и еплъыкIэ хилъхьэф зэрыхъуар. Дауи, гурыIуэгъуэщ, утыку къихьэ сыт хуэдэ гупсысэкIэри щIэныгъэ шыбзэм занщIэу зэрырамыгъэкIыр, ауэ Iуэху еплъыкIэ зэхуэмыдэхэр зэжьэхэуэкIэрэ, зэхэжыхькIэрэ, зэхыхьэкIэрэ илъэс куэдкIэ узылъэмыIэсын, купщIэшхуэ зыхэлъ гулъытэ къыхэкIынкIэ зэрыхъунум куэд дыдэр арэзы тохъуэ. Апхуэдэ щхьэусыгъуэщ щIэныгъэ дунейм Iэнэ хъурейхэр, щIэнIуатэхэр, еджагъэшхуэхэм я зэхуэсхэр щIызэхашэр. Ауэ пIалъэ пыухыкIахэм, Iуэхугъуэ зэмылIэужьыгъуэхэм ирагъэхьэлIэ апхуэдэ зэIущIэхэм памыгъаплъэу, цIыхур зыгъэпIейтей, гупсысапIэ хэзыдзэ Iуэхубэм ириуэршэрын, акъыл зэхэдзэкIэ щIэныгъэ къэгъэщIыпIэ хъун папщIэщ иужьрей илъэсхэм къэунэхуу хуежьа библиотекэ лIэужьыгъуэщIэхэм я лэжьыгъэр зыхуэунэтIари.

ЦIыхубэм я щыIэныгъэр нэхъ къэзыIэт, фIы и лъэныкъуэкIэ къызэзыгъэпэщ апхуэдэ жэрдэмхэр нэсу зэфIыхьа хъун папщIэ, ди щIыналъэм къэрал программэрэ лъэпкъ пэхуэщIэу зыбжанэ къыщыхалъхьауэ щолажьэ. Щэнхабзэм зегъэужьыным, щIэныгъэм зегъэубгъуным, цIыхум и дуней лъагъукIэр гъэкууным хуэунэтIа а гукъэкIхэм ирагъэфIакIуэр жылагъуэм и зэхэтыкIэм и закъуэкъым, атIэ ар хуэгъэпсащ экономикэ зыужьыныгъэми, щIыналъэм и шыфэлIыфэр фIы и лъэныкъуэкIэ къэгъэлъэгъуэнми. «Щэнхабзэ» зи фIэщыгъэ къэрал программэм и фIыгъэкIэ гъащIэм игъуэта зэхъуэкIыныгъэхэм пэджэж щэнхабзэ жэрдэмми гъуэгу игъуэт, библиотекэри лэжьэкIэ лIэужьыгъуэщIэм техьэ хъуащ.

Къуажэм къыщызэIуах библиотекэ лIэужьыгъуэщIэр медиа техникэкIэ къызэгъэпэщащ, тхылъ тегъэувапIэщIэхэмрэ унэлъащIэхэмкIэ зэгъэкIуащ. Къуажэкум хуэзэу ит щэнхабзэ IуэхущIапIэм зэрыхэтым и фIыгъэкIэ ар цIыху кIуапIэ зэрыхъунум шэч хэлъкъым.

Иджырей гъэпсыкIэм ит библиотекэр тхылъ хъумапIэ къызэрыгуэкIыу щытынукъым. Къызэрыхэщащи, библиотекэ дунейри гъащIэм добакъуэ. Тхылъыр цIыхум Iэпэгъу хуэщIыныр, щIэджыкIакIуэхэр зэшэлIэныр, ахэр тхыгъэ дунейм къыщекIуэкIым щыгъэгъуэзэныр библиотекэхэм я къалэн нэхъыщхьэу щытамэ, иджы ахэр жэрдэмыщIэхэр къыщыхалъхьэ, зи Iуэху еплъыкIэкIэ зэтехуэ цIыху гупхэм я зэхуэсыпIэ хъун хуейщ.

Тхылъ тегъэувапIэхэр сатыру екIуэкIыу пэш щхьэхуэм и утыкум итыжкъым, ахэр блыным декIуэкIыу кIэрытщ. Библиотекэм и гъэтIылъыгъэхэм тхылъ куэд къахэхъуащ, я теплъэкIи дизайнкIи IуэхущIапIэм пэджэжу. Утыкум зэгъэуIуауэ зы цIыху е цIыхуитI зыIухуэн Iэнэхэр итщ, зыр зым зэран хуэмыхъун хуэдэу зэбгъурыту. Пэшхэм компьютер зыбжанэ щIэтщ, хуей хъумэ библиотекэм къыщIыхьэр абыхэм ирилэжьэну хуиту. Нэхугъэр зыщIэз пэшхэм щIэт унэлъащIэхэр зэрыщыту щхъуэкIэплъыкIэщ, уи гукъыдэжыр къаIэту, жэрдэмхэр къызэщIагъэбатэу. Псори лэжьыгъэм хуэгъэпсащ. Мыбдеж уи нэгу зыщебгъэужьыным, зыщыбгъэпсэхуным къищынэмыщIауэ, щIэныгъэ лэжьыгъэхэр къыщызэбгъэпэщыну Iэмал щыIэщ - лекцэхэм укъыщеджэ, IэнатIэ зэмылIэужьыгъуэхэм ятеухуа мастер-классхэр щызэхэпшэ, дерс гъэщIэгъуэнхэр къыщызэбгъэпэщ хъунущ. «Щэнхабзэ» проектым нэгъуэщI Iэмалхэр къыует библиотекэ лIэужьыгъуэщIэхэр нэгъэсауэ щэнхабзэ центр хъун папщIэ.

Зи лэжьэкIэм зихъуэжа, зи Iуэху щIэкIэр щIэщыгъуэ защIэу зэхэухуэна хъуа библиотекэр хухаша гъуэгущIэм техьакIэщ, дызэрыт мазэм и кIэхэм къызэIуахыну я гугъэщ.

ШУРДЫМ Динэ.