Жемиш, айбатлы эмда 150 чакълы башха тюрлю тереклеге бек уллу хата салгъан къуртха калифорниялы щитовка саналады, дейдиле Шимал Кавказны ведомствола аралы ветеринария лабораториясыны Къабарты-Малкъарда бёлюмюнде.

Аны ёсюмю хазна уллу тюйюлдю, кеси да къышны бутакълагъа жабышып чыгъады. Жаз башында тишиси 100-300 къурт табады. Ала да аналарындан айырылып, терекни къабугъуна жабышып, жерлеринден тепмей алай жашайдыла. Жылны ичинде 1-4 тёлю берирге боллукъду ол.

Щитовка терк эм аслам жайылгъаны ючюн табийгъатда анга жау болгъан хазна зат жокъду. Ол ашны артыкъ айырмайды, бутакълада, жемишледе, чапыракълада орналады. Терекни сууун сыпхара кетип, ызы бла аны ёсюуюн тыяды. Аслам къурт басханда ол тирлик бермей да къояды. Не аз сууукъ къакъгъанда уа, ёлюрге да боллукъду. Аны ючюн щитовкагъа къажау иш бек магъаналыды.

Специалистле айтханларына кёре, аны терек чирчик этип башларны аллында бардырыргъа керекди. Кесин да дарманла себип алай. Аны заманы уа кече хауаны жылыулугъу тёрт градусдан энишге тюшмей тебирегенде башланады.

Бу ишде асламысында къурамларында фосфорорганика болгъан препаратла хайырланыладыла. Ала бла тереклени саулай мылы этерге керекди. Ансыз къуртла бары да къырылырла деп ышаныу азды.

Лабораторияны келечилери бу заранлы затны ачыкълау тинтиулени бардыра туруучудула. Кёп болмай а, ары келтирилген битимлени экиден биринде щитовка табылгъанды. Ол шарт а тийишли жорукъланы жангыдан эсге салырын излейди. Щитовка бахчагъа заран келтирмезча анда орнатыллыкъ терекчиклени фитосанитария жаны бла тинтирге керекди. Дагъыда тереклеге жыл сайын кёз-къулакъ болуп турургъа, эски бутакъларын кесип кетерирге, керек болса, дарман салыргъа тийишлиди. Тинтиулени юсюнден соруу бар эсе, лабораториягъа сёлешигиз. Аны адреси: Нальчик, 9 май орам, 1 номерли юй.  

Улбашланы Мурат хазырлагъанды.