Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым «ЩIэныгъэхэм я зэгухьэныгъэ: еджапIэхэмрэ колледжхэмрэ» къэралпсо пэхуэщIэм и щIыналъэ Iыхьэм и бжьыгъуэ зэфIэхьыр иджыблагъэ щекIуэкIащ.
ПэхуэщIэ жэрдэмыр къыхэзылъхьа «ЩIэныгъэ» икIи «Пэрытхэм я зэгухьэныгъэ» урысей жылагъуэ зэщIэхъееныгъэхэм къэралым и хэгъэгу 89-м щыщу цIыху мин 400-м щIигъу Iуэхум къыхашэн яхузэфIэкIащ. Къэбэрдей-Балъкъэрым щыщу акъыл зэпеуэм хэтыну хуейуэ зыкъагъэлъэгъуат щIэныгъэрэ IэщIагъэрэ щрагъэгъуэт IуэхущIапIэхэм щеджэ цIыху минищым щIигъум.
«ЩIэныгъэ» зэщIэхъееныгъэм Къэбэрдей-Балъкъэрым щиIэ къудамэм и унафэщI Дыкъынэ Анзор зэрыжиIамкIэ, зэпеуэм къыхэпшэ хъуну щIалэгъуалэр мащIэтэкъым, уеблэмэ къагъэлъэгъуа бжыгъэм фIыуэ ебэкIырт. Апхуэдэу щытми, щыхьэрым щызэхыхьэжыну зэIущIэшхуэм кIуэну гупыр къыхахыну къапэщылът. «Сыт хуэдэ щIэныгъэ зэхьэзэхуэми хуэхьэзыр щIалэгъуалэр здэщыIэр КъБКъУ-ращ. БжыгъэкIи къыкIэрыхукъым, фIагъкIи япэ итхэм ящыщщ. ЩIыналъэ Iыхьэм кърихьэлIа ныбжьыщIэхэм я зэхэщIыкIыр зэрылъагэр хьэкъ тщащIащ къызэгъэпэщакIуэхэм къагъэув упщIэхэм жэуап зэхэхахэр къратыжу, я Iуэху еплъыкIэхэр къыхалъхьэу зэрыщытамкIэ. Урысейм и тхыдэм, щIэныгъэмрэ технологиемрэ, щэнхабзэмрэ гъуазджэмрэ, спортымрэ жылагъуэ зэхэтыкIэмрэ ехьэлIа упщIэхэм жэуап хъарзынэхэр къратащ, щIэныгъэ есэныгъэ хьэлэмэтхэр утыку къащIащ», – жиIащ Дыкъынэм.
Акъыл зэпеуэм къыщыIуа упщIэхэр къабгъэдэкIат Урысей псом щыцIэрыIуэ къэрал икIи жылагъуэ лэжьакIуэхэм, щIэныгъэлIхэм, щэнхабзэмрэ гъуазджэмкIэ IэщIагъэлIхэм. Абыхэм ящыщщ, псалъэм папщIэ, УФ-м и Президентым и дэIэпыкъуэгъу Мединский Владимир, УФ-м ФедерацэмкIэ и Советым хэт, бэнакIуэ Карелин Александр, «Урысей атом» корпорацэм и унафэщI Лихачёв Алексей, Гагарин Юрий и цIэр зезыхьэ, Космонавтхэр щагъэхьэзыр щIэныгъэ-къэхутакIуэ институтым и унафэщI, Урысейм и ЛIыхъужь Борисенкэ Андрей, «ЩIэныгъэ» зэгухьэныгъэм и унафэщI Третьяк Наталье сымэ.
«ЩIэныгъэхэм я зэгухьэныгъэ: еджапIэхэмрэ колледжхэмрэ» зи фIэщыгъэ акъыл зэпеуэр гъатхэпэм и 24-м ирагъэжьащ. Ар къызэгъэпэщыным хэтащ УФ-м ЕгъэджэныгъэмкIэ и министерствэм. УзэщIакIуэ мыхьэнэ икIи джэгукIэ гъэпсыкIэ зиIэ мы пэхуэщIэр «ЩIэныгъэ» жылагъуэ зэщIэхъееныгъэм къыхилъхьэ Iуэхугъуэхэм языхэзщ. Мы гъэм жэрдэмщIакIуэхэм траухуэри, зэпэщхьэхуэу иригъэкIуэкI пэхуэщIэхэр зэхилъхьэжу «ЩIэныгъэ.Джэгу» фIэщыгъэм къызэщIиубыдэ, едзыгъуэ зыбжанэу зэхэт зы Iуэхушхуэ утыку кърахьэныр нэхъыфIу къалъытащ. Ар IыхьитIу зэхэтщ: щхьэ закъуэ джэгурэ гуп джэгуу. ТIури щIэныгъэ икIи IэщIагъэ щрагъэгъуэт IуэхущIапIэхэм щекIуэкIащ. Абыхэм къыщыхэжаныкIахэр щIыналъэ утыкухэм щызэныкъуэкъужащ.
ПэхуэщIэм и зэгъэуIуакIуэ Къумахуэ Элинэ КъБКъУ-м щекIуэкIа щIыналъэ джэгум теухуауэ къыхигъэщащ илъэгъуамрэ зэхихамкIэ арэзы зэрыхъуар. «Мы акъыл зэпеуэр еджакIуэми студентми я зэфIэкIхэр щагъэлъэгъуэфын утыку гъуэзэджэщ. Ббгъэдэлъ щIэныгъэм и куууагъым, къагъэув упщIэхэм епт жэуапыр зэрыубгъуам, узрагъэувалIэ IэнатIэм къыхуэбгъуэт хэкIыпIэхэм я щIэщыгъуагъым мыхьэнэшхуэ щаIэт зэхьэзэхуэм. Гупу зэхыхьэжахэми зэрызэдэлэжьэфми, зым къихылъхьэ Iуэху еплъыкIэр адрейм къызэрищтэми къэпщытакIуэхэм гулъытэ хэха хуащIырт. КъищынэмыщIауэ, пэхуэщIэм и фIагъыр къэIэтыныр зи нэIэ щIэтхэм «бзаджагъэ» мащIи зэрахьэрт: гупым я цIэкIэ къагъэIуа жэуапым къищынэмыщIауэ, абы къыщхьэщыкI, уней еплъыкIэ зиIэхэми я жэуапыр хэIущIыIу ящIыжырт. Апхуэдэ жэуап «ущэхуахэм» мызэ-мытIэу къахэкIащ лъабжьэшхуэ зиIэхэр, нэхъ гъэщIэгъуэнхэр, узыблэплъыкI мыхъунухэр. Нэрылъагъут еджапIэхэм щрагъэгъуэт щIэныгъэм я щхьэкIэ кIуэ есэныгъэхэр ныбжьыщIэхэм зэрабгъэдэлъыр, набдзэгубдзаплъэу зэрыщытыр. СыщогуфIыкI къалэн зыщытщIыжа Iуэхум екIуу дызэрыпэлъэщар, утыкушхуэ ихьэнухэми уащыгугъ хъуну къызэрыщIэкIар», - жиIащ Къумахуэ Элинэ.
КъБР-м щекIуэкIа щIыналъэ Iыхьэм къыщыхэжаныкIащ икIи нэхъ лъэщу дыдэу къалъытащ Дзэлыкъуэкъуажэ (Абыкъухьэблэ) дэт курыт еджапIэ №1-м, Бахъсэн къалэм дэт, Лермонтов Михаил и цIэр зезыхьэ курыт еджапIэ №6-м, Звёзднэ къуажэм дэт курыт еджапIэм къикIа гупхэр.
Урысейм и щIыналъэм 89-м щекIуэкIа бжьыгъуэ зэфIэхьхэм къыщыхэжаныкIахэр мэкъуауэгъуэ мазэм и кIэм Мэзкуу щызэхуэзэжынущ.
ШУРДЫМ Динэ.
