Мэкъуауэгъуэм и 9-м щегъэжьауэ 12 пщIондэ Санкт-Петербург щекIуэкIа «Иппосфера» XXIV дунейпсо шы гъэлъэгъуэныгъэм Урысейм и щIыналъэхэм ящыщу 18 хэтащ. Адыгейм, Къэбэрдей-Балъкъэрым, Къэрэшей-Шэрджэсым щыщ щIалэхэр АР-м и Шу хасэм зэхуишэсри, адыгэшыр екIуу щагъэлъэгъуащ мы зэхыхьэм. Шу хасэм и тхьэмадэ Тхьэпщокъуэ Альберт зэрыжиIамкIэ, зэкъуэш республикэхэм щыщ щIалэхэр зэхы­хьэри, яшхэр яшащ Санкт-Петербург. Адыгеймрэ Къэрэшей-Шэрджэсымрэ щыщу шы щырыщ, Краснодар крайм щыщу зы, Къэбэрдей-Балъкъэрым икIауэ тIу хэтащ гъэлъэгъуэныгъэ иным. 

Урысейм и «ищхъэрэ къалащхьэм» цIыху 40 хуэдиз здишащ Шу хасэм. Адыгэхэм гъэлъэгъуэныгъэ пщIантIэм щагъэува шэтырым ди хэку укъыщыхутауэ къыпфIигъэщIырт. АдыгэлIым адыгэшыр ижь-ижьыж лъандэрэ зэриIэпэгъур щIалэхэм ягъэлъагъуэмэ, адыгэ бзылъхугъэм и Iэпэм дыщэ къызэрыпыщыр утыку кърихьащ Бэджокъуэ Бэллэ. Абы и IэдакъэщIэкI фащэхэр, цIыхубз фэилъхьэгъуэр зэрагъэщIэращIэ цIыкIуфэкIухэр, адыгэ тхыпхъэщIыпхъэхэр къызытещ хьэп­шыпхэр здихьат Бэллэ икIи шэтырым дахэу щрагъэувэкIат. 
Гъэлъэгъуэныгъэр зэрекIуэкIа ма­хуиплIым къриубыдэу «Абрэджхэр» ныбжьыщIэ къэфакIуэ ансамблым адыгэ щэнхабзэр цIыху мини 10-м ирагъэлъэгъуауэ жыпIэ хъунущ. апхуэдиз къы­щызэхуэсат зэхыхьэм. Ахэр къэфащ, джэгуащ, хьэщIэхэм я гъусэу сурэтхэр зытрагъэхащ. Урысейм и хэгъэгу зэ­мылIэужьыгъуэхэмрэ хамэ къэралхэм­рэ къикIа хьэщIэхэм зыщамыгъэнщIу зэпаплъыхьырт адыгэ фащэхэр, ар зыщыгъ щIалэгъуалэм сурэт трахырт, джэгу щекIуэкIкIэ къыхыхьэурэ къа­фэрт. Тхьэпщокъуэ Альберт и нэIэ щIэту иша гупым дэтхэнэми къалэн пыухыкIа иIэти, Iуэхур нэхъыфI зэрыхъунум, адыгэм и шыфэлIыфэр екIуу зэрагъэлъэгъуэнум, лъэпкъым и Iулыджыр зэраIэтынум, и хъугъуэфIыгъуэхэр утыку къызэрырахьэнум иужь итащ псори. 
Зэкъуэш республикэхэм ираша адыгэшхэр и макъ жьгъыру дахэмкIэ утыку къришэу, абыхэм ятеухуахэр рингым щигъэIуу, «Иппосфера»-р зэре­кIуэкIым и чэзум дыщигъэгъуазэу гупым я гъусащ Адыгэ Республикэм щIыхь зиIэ и журналист, «Адыгей ТВ»-м и лэжьакIуэ ТIэш Светланэ. 
Илъэсым екIуэкI шы гъэлъэгъуэныгъэ нэхъ иным шы лIэужьыгъуэ 20 хэтащ, псори зэхэту щитI утыку къихьащ, шы зыгъэхъу заводрэ цIыху щхьэхуэу 100-м яйуэ. ЛIэужьыгъуэхэм ящыщт ахалтекин, буденновск, владимирскэ, донской, орловскэ, терскэ, вятскэ, мезенскэ, нэгъуэщIхэри. Псоми яцIыхуу яхэтт адыгэшри.
«Иппосфера»-м кърихьэлIахэм адыгэ­шым и дахагъым рингым щыкIэлъы­плъа къудейкъым, атIэ шэщ «зэIухахэм» бгъэдыхьэурэ шыхэр зрагъэлъэгъуащ, сурэт зытрагъэхащ, телъэщIыхьащ. Гъэлъэгъуэныгъэм щыIахэм жаIэ, ди шэщхэм я деж махуиплIми цIыхухэр Iуву щызэтрихьэу зэрыщытар. 
- Дэ шыр едгъэцIыху къудейкъым, атIэ ди лъэпкъыр, ди щыIэныгъэр, ди щэнхабзэр, ди напэр дгъэлъагъуэу аращ. Псори щыгъуазэщ адыгэшым и зэфIэкIым, - жеIэ Тхьэпщокъуэ Альберт. 
Ди шууейхэм а махуэхэм ягъэлъэ­гъуащ адыгэшым и къарур здынэсри, и теплъэр зэрыдахэри, и зэфIэкIыр зэ­рыинри. Псом нэхъыщхьэращи, адыгэ­лIымрэ адыгэшымрэ зэгуэхыпIэ имыIэу зэ­рызэпхар, лIыми шым хуэфащэу зэры­зиIыгъыр, ар къуэшым хуэдэу къызэрилъытэр цIыхухэм я фIэщ ящIащ.
МахуиплIым къриубыдэу лIэужьыгъуэ 14-кIэ зэхьэзэхуащ шыхэмрэ шууейхэмрэ. Абыхэм ящыщу «Созвездие Шаг­ди» зыфIащам пашэныгъэ къыщихьащ Налмэс зи цIэ шым, абы тесар Къэрэшей-Шэрджэсым щыщ КIэды­кIуей Замрэтщ. 
Апхуэдэу зэхьэзэхуэ дэтхэнэми щытекIуахэр зэуэ утыку кърашэжати, пашэныгъэр зылъысар буденовск шы лъэпкъращ, ауэ ди Налмэсыр къеплъахэм нэхъ ягу ирихьауэ къыхахри, «Приз зрительских симпатий» тыгъэр къыхуа­гъэфэщащ.
Къапщтэмэ, Шу хасэр 2018 гъэ лъандэрэ хэтщ мы Iуэхум, дуней псом щыцIэрыIуэ шагъдий адыгэш зэкIужыр утыку иришэу. ИкIи 2021 гъэм Адыгейм и Куэшхьэблэ районым щыщ Налмэс шыр «Созвездие Шагди» рингым и чемпион хъури, «Иппосфера-2021»-м и и вице-чемпиону хахащ. 
Апхуэдэ пашэныгъэхэр дунейпсо ­утыку къыщызыхь ди шууейхэр екIурэ-ещхьу зэщыхуэпыкIауэ, къэзылъагъу псоми ягу къинэжу хэтщ а Iуэхум. Мы гъэм хуабжьу дахэ хъуат Тхьэпщокъуэм и унафэм щIэту ежьа шууей гупыр ­«Петергоф» музей-заповедникым къы­зэрыщакIухьар. «Абрэджхэми» джэгу­шхуэ щащIащ абдеж. 
НэщIэпыджэ  Замирэ.