«Шэрхъ шынагъуэншэ» урысейпсо зэпеуэм и республикэ Iыхьэр иджыблагъэ екIуэкIащ. Мы гъэм абы хэтащ КъБР-м и районхэм, Налшык къалэ округым я школакIуэхэм я командэ 14, Налшык дэт курыт еджапIэ №7-м полицэм щиIэ кадет классым, сабий творчествэм-кIэ «ДыгъафIэ къалэ» академиемрэ творчествэмкIэ я унэм гъуэгухэм къыщыхъу транс-порт зэжьэхэуэхэм сабийхэм фэбжь хамыхыным хуэгъэза лэжьыгъэ егъэкIуэкIынымкIэ и центрым и инспектор гупым щыщхэр.
Iуэху гуапэр къыщызэIуахым кърихьэлIащ хьэщIэ лъапIэхэу КъБР-м Экономикэ, жылагъуэ шынагъуэншагъэмкIэ и советым и секретарь Тату Казбек, республикэм къэрал кIуэцI IуэхухэмкIэ министру щыIэ, полицэм и генерал-лейтенант Павлов Василий, КъБР-м егъэджэныгъэмрэ щIэныгъэмкIэ и министр Езауэ Анзор, КъБР-м транспортым-рэ гъуэгу хозяйствэмкIэ и министр ДыщэкI Аслъэн, КъБР-м и Парламентым промышленностымкIэ, транспортымкIэ, зэпыщIэныгъэхэмрэ гъуэгу хозяйствэмкIэ и комитетым и унафэщI Байдаев Сэлихь, республикэм и Парламентым и депутат Вындыжь Чэрим, Жылагъуэ советым хэт Литвинов Роман, МВД-м и Жылагъуэ советым и тхьэмадэ Мэкъушэ Русланрэ абы и къуэ-дзэ Бакуев Жэмалрэ, республикэм Къэрал автоинспекцэмкIэ и управленэм и унафэщIым и къалэнхэр пIалъэкIэ зыгъэза-щIэ, полицэм и полковник Сухорученкэ Дмитрий, НыбжьыщIэхэм творчествэмкIэ я унэм гъуэгухэм къыщыхъу транспорт зэжьэхэуэхэм сабийхэм фэбжь хамыхыным хуэгъэза лэжьыгъэ егъэкIуэкIынымкIэ и центрым и унафэщI Блашэ Виолеттэрэ Къэбэрдей-Балъкъэрым мафIэсым пэщIэт-къегъэлакIуэ и IэнатIэм и лэжьакIуэхэм я Iэзагъэм щыхагъахъуэ, я къалэнхэм щыхуагъэхьэзыр центрым и егъэджакIуэ Аброкъуэ Мадинэрэ.
Павлов Василий сабийхэм ехъуэхъуащ нэхъыфIхэр къыщыхахыну республикэ Iыхьэм зэрыщIидзэмкIэ икIи къыхигъэщащ мыпхуэдэ зэпеуэхэм мыхьэнэшхуэ зэраIэр, шынагъуэншагъэр сыт щыгъуи япэ игъэщыпхъэу зэрыщытыр.
Тату Казбек IуэхуфIым хэт сабийхэм фIыщIэ яхуищIри жиIащ гъуэгум зэрыщызекIуэ хабзэхэр гъэзэщIэным апхуэдэ гулъытэ зэригъуэтым и фIыгъэкIэ Къэбэрдей-Балъкъэрым и гъуэгухэм щызекIуэхэм я зэхэщIыкIым зэрызиIэтыр.
- Илъэс 50 хъуауэ ЮИД-м ирегъэкIуэкI гъуэгу-транспорт къэхъукъащIэхэм ехьэлIа профилактикэ Iуэхур икIи инспектор ныбжьыщIэхэм я лэжьыгъэм сэбэпу пылъыр къэзыгъэлъагъуэщ Урысей Федерацэм и гъуэгухэм фэбжь щагъуэтынкIэ е щыхэкIуэдэнкIэ хъуну щытахэу апхуэдэ гузэвэгъуэхэм щахъумахэм я бжыгъэр. Шынагъуэншагъэр къызэгъэпэщыным фызэрытелажьэм, абы хуэфщI хэлъхьэныгъэм папщIэ фIыщIэ фхузощI, - къыхигъэщащ Езауэ Анзор.
Мэкъушэ Руслан жиIащ жылагъуэм и лIыкIуэхэу Къэрал автоинспекцэм дэлажьэхэр зэрыщыгъуазэр гъуэгум шынагъуэншэу щызекIуэныр къызэгъэпэщы-ным къарууэ ирахьэлIэр зыхуэдизым.
ЮИД зэщIэхъееныгъэр къызэрызэрагъэпэщрэ илъэс 50 щрикъум ирихьэлIэу щIыхь, фIыщIэ тхылъхэр Павлов Василий яритащ зэдэлажьэ ведомствэхэм ящыщхэм, егъэджакIуэхэмрэ журналистхэмрэ.
Зэпеуэм щIидзэн ипэкIэ концерт екIуэкIащ.
СыхьэтищкIэ школакIуэхэм ягъэлъэгъуащ гъуэгум шынагъуэншэу щызекIуэным теухуа хабзэм зэрыхащIыкIыр, лъакъуэрыгъажэр зэрагъэIурыщIэмрэ лей зытехьахэм япэ дэIэпыкъуныгъэ зэрыратыфынумрэ, апхуэдэуи ныбжьыщIэхэр ущииным теухуауэ утыкум къызэрыщыпсэлъэфыр ягъэлъэгъуащ.
ЩIыхь тхылъхэр, дипломхэмрэ саугъэтхэмрэ иратащ зэпеуэм хэта псоми. Щхьэзакъуэ зэхьэзэхуэхэм щытекIуащ: «Знатоки ПДД» унэтIыныгъэм - Бахъсэн районым щыщ ХьэцIыкIу Темыркъанрэ Шэджэм районым къикIа Быж Дисанэрэ; «Япэ дэIэпыкъуныгъэ етыным хэзыщIыкIхэр» Iыхьэм Шэджэм районым щыщ Вэрокъуэ Самиррэ Май районым къикIа Кузнецовэ Аннэрэ; «Лъакъуэрыгъажэр зегъэкIуэн» жыхуиIэм екIуу зыкъыщагъэлъэгъуащ «Полицэм и кадетхэр» гупым щыщ Абей Алихъанрэ Май районым и ЮИД командэм хэт Карслиевэ Эльвирэрэ.
«ДызэщIыгъуу шынагъуэншагъэм дрителъхьэщ» унэтIыныгъэм, ЮИД зэщIэхъееныгъэр илъэс 50 зэрырикъум хуэгъэпсам, щытекIуащ Шэджэм районым и командэр.
Урысейпсо зэпеуэм и республикэ Iыхьэм ещанэ увыпIэр къыщихьащ Май районым и гупым. Бахъсэн районым и инспектор ныбжьыщIэхэр етIуанэщ, зымащIэкIэ абыхэм япэ ищри, Шэджэм районым и ЮИД командэм бжьыпэр иубыдащ.
БАХЪСЭН Азэмэт.