Москвада Александр Матовниковну башчылыгъында Россей Федерацияны Президентини  Шимал-Кавказ федерал округда Толу эркинликли келечисинде Советни жыйылыуу болгъанды. Анга РФ-ни  Къырал Думасыны Председателини орунбасары Ольга Тимофеева, Рособрнадзорну таматасы Сергей Кравцов, РФ-ни жарыкъландырыу министрини орунбасары Татьяна Синюгина, Къабарты-Малкъарны Башчысыны къуллугъун болжаллы халда толтургъан Казбек Коков, башха регионланы  башчылары къатышхандыла.
Кенгешде  ишсизлени санын азайтыу, школгъа дери эмда битеулю билим бериуню качествосун кётюрюу, сабий садлагъа жюрюрге, окъургъа хар кимни да онгу болурча этиу жаны бла мадарладан не къыймат чыкъгъанына къаралгъанды, ол жумушла бла байламлы дагъыда кёп тюрлю соруула сюзюлгендиле. «Округда кёп жылланы ичинде халкъны саны Россейни къалайындан да терк ёсюп барады. Ол себепден окъуу учреждениялада бла сабий садлада жангы жерле керек болгъаны мында артыкъда бек сезиледи»,- дегенди Александр Матовников, жыйылыуну башлай.
2019 жылда СКФО-ну битеулю билим берген организацияларында жангы жерле къурау жаны бла кёп ишле белгиленнгендиле, ол санда 30 объектни къурулушун бардырыргъа да мурат этиледи. Къабарты-Малкъарны алсагъ а, бусагъатда Нальчик шахар округда школ ишлене турады. 2019-2020 жыллада Чегем шахарда бла Солдатская станицада мектепле  ачаргъа белгиленеди. Алай болса, 2021 жылгъа  битеулю билим берген организациялада, ол санда элледегиледе да, 1 974 жангы жер къураргъа къолдан келликди.
Республикада 3-7-жыллыкъ сабийле школгъа дери билим бериу бла 100 процентге жалчытылгъандыла.  Россейни Жарыкъландырыу министерствосуну бла КъМР-ни Правительствосуну араларында этилген келишимлеге кёре  3 жыл толмагъан сабийлеге да 2 860 жер къураргъа белгиленеди (ол санда быйыл - 869, 2020 жылда – 1900, 2021 жылда – 100 жер).
Билим бериуню качествосун андан ары кётюре барыр, окъуучуланы шёндюгю амаллагъа, усталыкълагъа тюшюндюрюр муратда  27 район билим бериу организациялада «Точка роста» деген цифралы эмда гуманитар профильлени аралары къураладыла. Къабарты-Малкъар  «Хар сабийни жетишими» деген федерал проектни сынау халда  быйылны ахырына дери толтурлукъ регионланы санына киреди. Анга кёре Нальчикде Хунерли сабийлени ачыкълау эмда алагъа болушуу жаны бла ара ишлеп башларыкъды. Анда жылны  ичинде профессионалла окъуучула бла ушакъла бардырлыкъдыла, илму, искусство, спорт жаны бла тюбешиуле къураллыкъдыла, школчуланы олимпиада къымылдауларын айнытыугъа да себеплик этилликди.