Къабарты-Малкъарны Правительствосуну кезиулю кенгешинде республиканы министерстволары бла ведомстволары хазырлагъан проектлеге эмда башламчылыкълагъа къаралгъанды, аланы юсю бла бегимле къабыл этилгендиле. Жыйылыуну Правительствону башчысы Мусукланы Алий бардыргъанды.
Сюзюуге бу жол ондан артыкъ проект чыгъарылгъанды. Аладан бир ненчасы талай комиссияны къауумларына тюрлениуле сингдириу неда Правительствону алгъыннгы бегимлерини кючлерин тас этиу бла байламлы эдиле. Биринчиден, КъМР-ни «2019 жылгъа эмда 2020-2021 жыллагъа республикалы бюджетини юсюнден» закону бла белгиленнген кезиуледе ахча къоранчлагъа казначействону жанындан кёз-къулакъ болууну жорукълары къабыл этилгендиле.
Финансла министрни къуллугъун толтургъан Елена Лисун билдиргенича, сёз бир миллиондан артыкъ сомну юсюнден барады. КъМР-ни Башчысыны экономика вопросла жаны бла энчи келечиси Хачим Кармоков аны ёлчемин беш миллионнга жетдирсе, ол кёп ууакъ тыйгъычладан къутулургъа амал берлигин, бегирек да предпринимательлеге да себеплик этеригин белгилеп айтханды.
Кёп фатарлы юйлеге тынгылы ремонт этиу жаны бла узакъ болжаллы программагъа эмда бу иш бла кюрешген регион операторну попечительстволукъ этиу фондуну къауумуна тюрлениуле сингдирилгенин Правительствону Председателини орунбасары – инфраструктура эмда цифралы айныуну министри Владимир Болотоков билдиргенди.
Республиканы бюджетинден муниципалитетлени жол фондларын онгдуруугъа быйыл неллай бир сом жибериллигин а къурулуш эм жол мюлк министр Вячеслав Кунижев туура этгенди. Тийишли оноуну хайыры бла Нальчик шахар округга 50 миллион сом бёлюнюрюкдю. Дагъыда Тырныауузгъа бла Огъары Бахсаннга, алада буруннгу жыл табийгъат къыйынлыкъла салгъан хата-палахланы кетериуге 415 эм 626 мингишер сом берилликди.
Саулукъ сакълау министр Марат Хубиев быйыл элледе неда халкълары 50 мингнге жетмеген гитче шахарлада медицина учреждениялагъа ишлерге барлыкълагъа бир кере бир миллион сом тёлениригин билдиргенди. Аны ючюн а инсан ол жерде беш жылны урунургъа керекди.
Быллай программа алгъын да болуучу эди. Алай быйыл ол тюрлендирилип бардырыллыкъды. «Ишде тохташхан адам ызы бла сабийлерине къараргъа деп декрет отпуск алса неда аскерде къуллукъ этерге тебиресе, ол заман, контракт бла белгиленнген кезиуге (беш жылгъа) кирлик тюйюлдю. Башхача айтханда, инсан беш жылны ишлерге борчлуду», - деп чертгенди Хубиев.
Министр айтханнга кёре, аллай кёп жерледе медицина ишчиле жетишмейдиле, бир-бирлеринде бек уллу къытлыкъ сезиледи. Бу оноуну хайыры бла уа андан къутулургъа боллукъду. Аслам специалист а иш бла жалчытылынырыкъдыла.
Программаны юсю бла битеу да 91 миллион сом бёлюнюрюкдю. Андан 56,4 миллионун къырал бюджет берликди, къалгъанын а республика кеси къошарыкъды.
Марат Баширович ызы бла сабий саулукъ сакълау системаны айнытыуну эмда гражданлагъа 2019-2021 жылланы чеклеринде хакъсыз медицина болушлукъ бериу Программагъа сингдирилген тюрлениулени юсюнден проектлени туура этгенди. Биринчисине кёре, республикада шёндюгю инфраструктура къураргъа умут этиледи.
Быйыл биринчи кварталда Къабарты-Малкъарда жашау этерге жараулу эм аз ахчаны ёлчеми тохташдырылгъанын урунуу эмда социал къоруулау министр Асанланы Алим билдиргенди. Алай бла бу кезиуде ол 11801 сом болгъанды. Уруннганлагъа аны ёлчеми – 12191, сабийлеге – 12000 эмда пенсиягъа чыкъгъанлагъа - 9122 сомду.
 Асан улу дагъыда Къабарты-Малкъарны Правительствосуну бла Къыйын жашау болумгъа тюшген сабийлеге себеплик этген фондну арасында этилген келишиулюкге тюрлениуле сингдирирге кереклисин айтханды. Сёз республикада быллай балалагъа мычымай психология тапдыргъан телефон ызны къурауну юсюнден барады, дегенди. Ол кеси да быллай бирикген битеуроссей номерча алай ишлерикди.
Жыйылыуда таулада лыжа трассаланы эм маршрутланы реестрин къурауну жорукъларын да сюзгендиле, Жарашдырыучу судьяланы ишлерин жалчытыу службада этиллик ууакъ тюрлениулени къабыл кёргендиле эмда былтыр республикада къырал программала къалай тамамланнганларына багъа берирге кереклисини юсюнден сёлешгендиле.