Черек муниципал районну ара китапханасыны Бабугентде бёлюмю  ишин жетишимли бардыргъан бюджет учрежденияладан бириди. Бюгюнлюкде анга Аппайланы Зарема башчылыкъ этеди. Китапларыны саны уа 17 мингден асламды. Жылгъа китапхананы 10 515 адам жокълайды. 

Мында  тюрлю-тюрлю байрамлагъа, белгили кюнлеге жораланып тюрлю-тюрлю ишле  бардырыладыла. Ол санда «Огъурлулукъну поэзиясы», «Тарыхны сюдю», «Уруш болгъанды. Хорлам болгъанды», «Урушну юсюнден окъуйбуз», «Билирге, унутмазгъа да борчлубуз», «Сюйген жомакъларыбызны огъурлу дуниясы»,  «Ана тил, сен къалай аламатса» дегенча кёрмючле да къураладыла. 
Ата журтну сюерча, аскер-патриот ниетни кючлерча, табийгъатны сакъларча, маданиятны бла адабиятны багъаларча, саулукълу жашауну бардырырча, праводан билимни байыкъландырырча жумушлагъа китапханада  аслам эс бурулады.     
Бабугентни китапханасы тири ишлегенин, ары сабийле кёп санда жюрюгенлерин  эшите тургъанма, бу жол аны алайлыгъын кесим да кёргенме. Ол шарт бирси эллеге юлгю болурчады. Бир-бир жерледе сабийлени къой, абаданла окъуна китапханалары ишлегенин  бла къалгъанын билмейдиле. 
– Школ бла садик жууукъда болгъанлары себепли,  окъуучула бизге терк-терк келедиле. Сабийле китапны сюер ючюн, къолубуздан келгенни аямайбыз. Окъургъа, чыгъармачылыкъгъа да кёллендирир ючюн, кёп тюрлю амалланы хайырланабыз. Кюннге жыйырмадан артыкъ окъуучу келмей къалмайды. Кёпле нёгерлери, тенглери бла да жюрюйдюле, – дейди  Аппайланы Зарема. 
Биз китапханада болгъан кюн экинчи классда окъугъан жашчыкъла бла къызчыкъла келип тура эдиле. Ала бла сёлеше кетгенимде: «Шёндюгю тёлю асламысында не соруугъа да Интернетде жууап табаргъа кюрешеди, сиз а, къарайма да, китапханагъа тартыласыз», – дейме да, быллай жууап эшитеме: «Китапны къолгъа алгъан, бетлерин ачхан да хычыуунду, андан къалай эсе да энчи жылыу урады, сора окъугъанынг эсингде бегирек къалады».
Аланы оюмлу жууап бере билгенлери, бир жаны бла, мени сейирге къалдыргъанды, башха жаны бла уа, бек къууандыргъанды.    
Курданланы Сулейман.