Къабарты-Малкъар кёп миллет бирге жарашып жашагъан республикады. Аны ата-бабаларыбыз ёмюрледен бери багъалыгъа санап келедиле, аны келир тёлюлеге осуят этедиле. «Къонакъбайлыкъ» жаш тёлю проект халкъыбызны ахшы тёрелеринден бирин жангыртыр мурат бла 2009 жылда къуралгъанды. Ол заманда анга Аргудан эм Кёнделен элледен сегиз юйюр къатышхан эдиле. Андан бери, жамауатдан ыразылыкъ табып, ол жыл сайын бардырылады, проектге къошулгъан регионланы саны да кёбейгенди.
Бу кюнледе ол Нальчикде байрам халда башланнганды. Анга республиканы эллеринден бла шахарларындан 16 юйюр къатышханды. Ала бир ыйыкъны ичинде бирлери къонакъбайлыкъ этерикдиле, экинчилери уа къонакъгъа атланырыкъдыла. Жашчыкъла заманларын зауукълу, хайырлы эмда эсде къалырча ётдюрюуге аслам эс бёлюнюрюкдю.
Бу жол проектни къууанчлы ачылыуу «Синдика» арада ётгенди. Анга КъМР-ни миллетлени ишлери эмда жамауат проектле жаны бла министри Анзор Курашинов да келгенди.
– Барыгъызны да кёргениме бек ыразыма. Биринчиден, бу проектге къатышхан юйюрлеге ыспас этеме. Район администрацияла да бек сау болсунла бизни чакъырыуубузгъа эс бёлюп, къошулургъа ашыкъгъанлары ючюн. Къонакъла жюрюген школланы, спорт секцияланы да таматаларына да бу ишге энчи магъана бергенлери ючюн ыспас этебиз, – дегенди ол.
Ызы бла «Биринчилени атламлары» битеукъырал биригиуню регионда бёлюмюню келечиси Азамат Закушев жаш тёлюню алгъышлагъанды.
– Юлгюлеге кёре къонакъбайлыкъ этгенни бла къонакъны юйюрлери шуёхлукъ жюрютедиле. Шёндю министерство жаш тёлюге этген жумуш уллу магъананы тутады. Жаш заманымда быллай проектле болмагъанына бек сокъуранама. Сизге уа быллай онгланы хайырланып, кесигизге, тенгле эм къарындашла табарыгъызны тежейме, – дегенди ол.
Бу ишге берилген заманны ичинде къонакъ алгъан юйюрле аланы тюрлю-тюрлю жолоучулукълагъа элтирикдиле, байрамла къурарыкъдыла, миллетлерини тёрелери бла шагъырей этерикдиле. Сёз ючюн, Май райондан Егор Багулинни юйюрюне Тырныаууздан Ёзденланы Тамерлан келгенди. Байрамны кезиуюнде эки жаны да не бла кюреширге сюйгенлери белгили болгъанды. Бир бирлери бла танышхандан сора, проектге къатышхан хар жашчыкъ да къонакъны жорукълары бла энчи дипломла эм саугъала бла белгиленнгендиле. Аланы хар бирине да проектни белгилери бла футболкала да берилгендиле.
Къонакъбайланы бла къонакъланы эслерине быллай жорукъла да салыннгандыла: башха миллетлени маданиятларына, адет-тёрелерине, динлерине хурмет этерге; таматалагъа намыс этерге, гитчелеге ариу юлгю кёргюзтюрге; мамырлыкъны бла шуёхлукъну багъаларгъа; къонакъны юсю бла къарындаш тапханынгы ангыларгъа; огъурлу адам болургъа; юйюрню тёрелерине хурмет этерге; къонакъны эм аны юйюрюню намысларын къорууларгъа; къууанчда да, бушууда да къонагъынга болушлургъа ашыгъыргъа.
Ызы бла Амирхан Хавпачев бла Тёппеланы Алим кеслерини жырлары бла келгенлени къууандыргъандыла.
Жыйылыуну ахырында проектге къатышханла барысы да бирге суратха тюшгендиле.
Холамханланы Алима.
Суратда авторнудула.
