Нальчикде спортну къаялагъа ёрлеу тюрлюсюнден  фестиваль бардырылгъанды. Анга Нальчикден, Владикавказдан, Пятигорскден, Геленджикден, Ставропольдан, Армавирден, Краснодардан жюзге жууукъ спортчу къатышхандыла – 7 жылдан 17 жылгъа дери жаш адамла.  

Фестиваль «Единая Россияны» болушлугъу бла «Сабий спорт» партия проектни чеклеринде къуралгъанды.

Аны ачылыуунда   КъМР-ни Парламентини депутаты Бечелланы Людмила сёлешгенди. Ол жаш спортчулагъа  кертилик бла эришип, къарыуларын  сынап, хорламгъа жетиширлерин тежегенди. 

 Нальчикде скалодромну башчысы Светлана Смирницкая бизге айтханыча, быллай эришиуле  жаш спортчуланы арасында жылгъа эки кере бардырыладыла. «Ол бизни башламчылыгъыбызды. Алай бла спортну бу тюрлюсюне жамауатны сейирин бурургъа сюебиз. Ол а 2020 жылда Токиода Олимпиада оюнланы тизмесине кийирилгенин белгилерге сюеме. Республикада таула, къаяла кёпдюле, алагъа ёрлерге сюйгенле да бардыла, алай  анга спортхача къарагъанла  уа аздыла. Бизни  муратыбыз скалолазанияны кенг белгили этергеди»,-дегенди ол.

Эришиуле сау кюнню баргъандыла. Жашла бла къызла къыйынлыкъларына кёре тюрлю-тюрлю трассаладан ётгендиле. Жыл санларына кёре тёрт къауумда айырмалыла дипломла, эсде къаллыкъ саугъала бла белгиленнгендиле. 

Тикаланы Фатима.