Тюнене Ставропольда  «ИНФОФОРУМ Северный Кавказ» деген 1-чи регионла аралы конференция ачылгъанды. Аны ишине КъМР-ни премьер-министри Мусукланы Алий къатышханды эмда сёлешгенди.
Жыйылыуда цифрли экономикагъа кёчюуню  чеклеринде округну регионларыны тутхучлу айныуларын жалчытыуну борчларын толтуруугъа, информациялы къоркъуусузлукъну амалларына, «электрон правительствону» системасына шёндюгю технологияланы сингдириуге баш магъана берилгенди.

 

Форумгъа къатышханланы РФ-ни Президентини СКФО-да толу эркинликли келечиси, Россейни Жигити Александр Матовников алгъышлагъанды. Ол цифрли технологияла айнып башлагъанлары бла Интернетни юсю бла кёп къоркъуулу затла жайылгъанларын эсге салгъанды эмда аны себепли бюгюнлюкде цифрли къоркъуусузлукъну жалчытыу артыкъда магъаналы болгъанын чертгенди. «Аны къыйматлы амалларын излерге, ол жаны бла сынауну бир бирге билдирирге Инфофорум уллу онгла береди…» - дегенди.

 

Къабарты-Малкъарны Правительствосуну Председатели Мусукланы Алий да быллай тюбешиу хайырлы болмай къалмазлыгъына эмда ведомствола, регионла аралы байламлыкълагъа жангы кюч берлигине, цифрли Россейни тутхучлу эмда къоркъуусуз айныуун жалчытыу жаны бла борчланы толтурургъа, жангы технологияланы да билирге онг берлигине ишексиз болгъанын айтханды.

 

  Конференцияны ишине IT- технологияла жаны бла 400-ден артыкъ специалист бла эксперт, властьны законла чыгъарыучу эмда толтуруучу органларыны келечилери, бизнесменле да къатышадыла.