РФ-ни Налогла службасыны Къабарты-Малкъарда бёлюмюнде быйыл биринчи кварталны эсеплерин чыгъаргъандыла. Ведомстводан билдиргенлерича, бу кезиуге  4,8 миллиард сом жыйылгъанды. Аны бла план бла белгиленнген кёрюмдюню 20,2 процентге артыгъы бла толтурургъа къолдан келгенди.

Сагъынылгъан ахчадан 0,9 миллиарды къыралны бюджетине жиберилгенди. Ол да планда кёргюзтюлгенден аслам болгъанды. Республиканы бюджетине уа 3,9 миллиард сом ётдюрюлгенди. Мында да кёрюмдюню 23,6 процентге кёбейтирге онг болгъанды. Жер-жерли бюджетлеге уа бир миллиард сом бёлюннгенди (+ 15,9 процент).

Пенсия фондха 2,1 миллиард сом (+8,5%) тёленнгенди, бир талай кезиуню ишсиз тургъан неда аналыкъ бла байламлы социал страхованиягъа уа 200 миллион сом жиберилгенди. Бу ахча былтыр биринчи июльдан башлап тюзюнлей берилип тебирегени себепли, мында ёсюм 387 процентден атлагъанды.

Энтта да бир кёрюмдю – уруннганла ючюн медицина страхование этиу фондха тёлеу - артыгъы бла толтурулгъанды, ары 0,5 миллиард сом жыйылгъанды, ёсюм он процентден  аслам болгъанды.