КъБР-м и Iэтащхьэ КIуэкIуэ Казбек хэтащ ЩIыналъэ зыужьыныгъэхэмкIэ Правительствэ комиссэм и штабым хэтхэм я зэIущIэм. Ар теухуауэ щытащ Кавказ Ищхъэрэ Федеральнэ щIыналъэм хиубыдэ хэгъэгухэм я социально-политикэ щытыкIэр зыхуэдэм. ЗэIущIэр иригъэкIуэкIащ Урысейм и Правительствэм и УнафэщIым и къуэдзэ Новак Александр. Апхуэдэуи абы хэтащ УФ-м и Президентым и полномочнэ лIыкIуэу КИФЩI-м щыIэ Чайкэ Юрий.
Къызэхуэсахэр тепсэлъыхьащ хамэ къэралхэм къытхуагъэува текъузэныгъэхэм елъытауэ щIыналъэхэм я экономикэм и лъабжьэр гъэбыдэн зэрыхуейм, къищынэмыщIауэ, Новак абы ехьэлIа къалэн нэхъыщхьэхэр игъэбелджылащ. КИФЩI-м хыхьэ хэгъэгу псоми, Къэбэрдей-Балъкъэрри абы хэту, щытыкIэр щызэпкърах штаб къыщызэрагъэпэщынущ. Iэмал имыIэу щIыналъэ бюджетхэр къэпщытэн, социальнэ къалэнхэр и чэзум гъэзэщIэн хуейщ. Чайкэ къызэрыхигъэщамкIэ, Кавказ Ищхъэрэм и экономикэм щытыкIэ зэпIэзэрыт игъуэтын папщIэ япэ игъэщыпхъэ къалэнхэр убзыхуауэ гъэзэщIапхъэщ.
- НобэкIэ къапщтэмэ, санкцэхэр апхуэдэуи жьэхэуакъым республикэм щылажьэ IэнатIэхэм, - жиIащ КIуэкIуэ Казбек. - Ерыскъыхэм, цIыхухэр махуэ къэс зыхуеинухэм, псэуалъапхъэхэм я уасэхэм кIэлъыплъ оперативнэ штабхэр къызэдгъэпэщащ. Щхьэхуэу мэлажьэ мэкъумэш IэнатIэм и Iуэху зыIутыр къэзыпщытэ штабри.
ЩIышылэм кърикIуахэм ятепщIыхьмэ, ерыскъыхэкIхэм, мэкъумэш, ухуэныгъэ IэнатIэхэм къыщыщIагъэкIхэм ящыщу республикэм ищам и бжыгъэм хэхъуащ. Нэхъыбэ хъуащ хьэрычэт Iуэху мащIэмрэ курытымрэ, иджыпсту ди республикэм иIэщ зи щхьэ хуэлэжьэж хьэрычэтыщIэ мин 19-м щIигъу. Абыхэм я фIыгъэкIэ, налогыу къыхахми хэхъуащ, илъэс кIуам ар нэсащ сом мелард 1,3-м. ТIукIэ нэхъыбэ хъуащ республикэм зыгъэпсэхуакIуэ къакIуэхэм я бжыгъэр, 2021 гъэм ди деж щыхьэщIащ цIыху мелуаным щIигъу. Ди лъахэм къыхалъхьэ инвестицэр проценти 5,5-кIэ нэхъыбэ хъури, сом мелард 51-рэ ирикъуащ.
А псори къызыпэкIуар хьэрычэт Iуэхум куэдым зэрызратарщ. Иджырей санкцэхэр зыхуэгъэза IэнатIэхэм - мэкъумэшым, цIыхухэм Iуэхутхьэбзэ яхуэщIэным, туризмэм - ди хэгъэгум зыщаужь икIи лъэ быдэкIэ щытщ. Иджыри хьэрычэтыщIэ мащIэмрэ курытымрэ субсидиекIэ защIэдгъэкъуэну ди мурадщ, - жиIащ Iэтащхьэм.
Апхуэдэуи дыщIигъуащ лъэпкъ проектхэр гъэзэщIэнымкIэ лэжьыгъэр и чэзум зэрекIуэкIыр, псэукIэм ехьэлIа ухуэныгъэ куэд мы гъэм зэраублэнур, гъуэгухэр зэрырагъэфIэкIуэнур.
«Санкцэхэм емылъытауэ, зыхуэдгъэувыжа къалэн псори дгъэзэщIэным ди къару псори етхьэлIэнущ», - дыщIигъуащ КIуэкIуэ Казбек.
НЭЩIЭПЫДЖЭ Замирэ.