КъБР-м и цIыхубэр сыт щыгъуи я гур хэхъуэу якIэлъоплъ пасэ зэманыр нобэрей дунейм зэребгъэзэгъын Iэмалым хуэIэижь зэпыту, зекIуэ гъунэгъуи жыжьи зэхэзыублэ «Шууей Хасэм» щыщ щIалэхэм. Мазаем и I3 - I4-хэм апхуэдэ зы теплъэгъуэ ди нэгум щIагъэкIащ Тэрч щыпсэу я ныбжьэгъухэм яхуэзэну гъуэгу теува къэбэрдей шухэм.
Адыгэхэм къадекIуэкI шы зехуэн IэщIагъэр егъэфIэкIуэныр, абы и хабзэхэр къэгъэщIэрэщIэжыныр, Хэкум и щIыналъэхэр зэпыщIэныр – апхуэдэ мурад дахэхэрщ езышэжар Къэбэрдеишхуэмрэ Тэрч щIыналъэмрэ я зэхуакум махуитIым и кIуэцIкIэ щызекIуа шухэр.
«Алыхьым и фIыщIэкIэ мис, «бисмиллахь» жытIэри гъуэгу дытеуващ, - жиIащ гупым я нэхъыжь Iустаз Гуэщокъуэ Абдул-Бакъий зекIуэм щхьэусыгъуэ хуэхъуам щытепсэлъыхьым. – ЩIэ псори блэжьурэщ зэрызэбгъащIэри зэребгъэфIакIуэри. ЗекIуэкIэ пщIэнри, узэгурыIуэу гъуэгу утетыфынри куэд и уасэщ. Псори къыдэхъулIащ Алыхьым и фIыщIэкIи, акъыл хэзылъхьами, шыIэныгъэ, чэнджэщ къызыбгъэдэкIахэми дахуэарэзыщ».
Фащэ зыщыгъ шухэр ди щIыналъэм и нэщэнэ зэрыхъужрэ илъэс зыбжанэ хъуакIэщ. Шухэм иджыри къэс ди республикэм, Адыгейм, КъШР-м, Шапсыгъым къыщакIухьамэ, иджы Джылахъстэнейри картэм къихутащ. Тэрч щепсыха гупым бысым гумащIэ яхуэхъуащ Iэщыж Залым.
«Налшык - Тэрч зекIуэмкIэ» къызэIуихащ КъБР-м и Шууей Хасэм 2022 гъэм и чэзур, - щетх «Рихьэния» напэкIуэцIым блогер КIуэкIуэ Мурат. - Адыгэшым и пщIэм зегъэубгъун, лъэпкъ фащэм и щIыхьыр къэIэтыжын, Хасэм хэтхэм я зэхуакум дэлъ зэкъуэшыныгъэр нэхъ быдэ щIын – ахэращ гъуэгу техьахэм зыхуагъэувыжа мурадхэр. Гупым пашэ хуэхъуащ сыт хуэдэ зэмани жьы зыщIэт Iэпкълъэпкърэ гушхуэныгъэрэ зыдэплъагъу Гуэщокъуэ Абдул-Бакъий щхьэмахуэр. КъБР-р, Адыгейр КъШР-р зэпызыщIэну зекIуэхэр дяпэкIи екIуэкIынущ».
ЧЭРИМ Марианнэ.
