«Къар Аппаны поезди» 5 декабрьде жолгъа чыкъгъанды. Ариу жасалгъан состав Великий Устюгдан башлап, Россей Федерацияны 31 субъектини 36 шахарын жокъларыкъды эмда сабийлени алгъышлап, саугъала да берликди.

27 декабрьде уа ол Нальчикни темир жол вокзалына келип тохтагъанды. Анга тюберге кёп адам келгенди. Поездден гяпчиле, Къар Аппа, Буз къыз да чыгъадыла. Ала жыйылгъанланы келе тургъан Жангы жыл бла къызыу алгъышлайдыла. Къар Аппа уа, узакъдан келгенин, ол бек арыгъанын, анга да къарамай, къызчыкъланы бла жашчыкъланы тилеклерин, муратларын  толтурургъа хазыр болгъанын айтады.

Жангы жылны поезди бла келгенлеге КъМР-ни Правительствосуну Председателини биринчи орунбасары Марат Хубиев эмда республиканы культура министри Мухадин Кумахов да тюбегендиле, алагъа ыразылыкъларын билдиргендиле.

Къар Аппагъа энчи тюберге сюйгенлени бир къаууму уа анга письмоларын да жазып келтиргендиле. Ала таматагъа берилгендиле. Сабийлени бир къаууму уа Къар Аппа эм Буз къыз бла тюберге вагоннга киргендиле. Ала къонакълагъа жарыкъ тюбегендиле, ушакъ этгендиле, насийхат сёзле айтхандыла.

Байрам поездни программасына гинжи оюнла, Къар Аппа эмда Буз къыз бла тюбешиу, чай ичиу, билгичден саугъала алыу эм дагъыда открыткаланы сабий журналгъа эмда шуёхларына жибериу киредиле.

Бу проектге сейир уллу болгъаны эмда билетле терк сатылгъанлары себепли, аны андан ары бардырыргъа мурат этиледи. Къыралны поездни жолоучулугъуну тизмесине кирмеген шахарларын да ары къошаргъа белгиленеди.

Жангы жылны составы бизни ара шахарыбыздан Минеральные Водыге атланнганды. Мен анга тюберге келген къауум адам бла бу проектни юсюнден оюмларын да соргъанма. «Жангы жыл жомакъла бла байламлыды да, ма ол сезимни бир кесек созар ючюн келгенбиз. Сабийлерим Къар Аппагъа бла Буз къызгъа бек къууаннгандыла. Быллай кюн аланы эслеринде кёпге къаллыкъды, - дейди Хасаниядан келген Аминат.

- Къар Аппа бла келген биринчи поездни кёрюрге бек сюйгенбиз. Сабийлени бир къууанчлары барды да!.. Кесим да бек жаратханма быллай иш этилгенин. Мен да келир заманны игилигине ийнанырыгъым келеди, сабийлеге да байрам къураргъа сюйгенме, - дегенди нальчикчи Татьяна.

- Сабийлени къой, кесим окъуна бери келип, къараргъа сюйгенме. Быллай зат бир заманда да болмагъанды, сау болсунла проектни къурагъанла, - дегенди Акъ-Суудан Мариям.

- Пандемия адамланы мудах этип тургъан кезиуде быллай байрам поезд болгъаны игиди. Ол артыкъда гитчелеге керекди. Аланы асламысы Къар Аппагъа ийнанадыла, ол муратларына жетдирлигине да ышанадыла. Мен да быллай ишге ыразыма, жашауда жомакъ не заманда да керекди деп, алай къарайма, - дейди тёрт сабийи бла Прохладнадан келген Анна.

Холаланы Марзият.