ЩоджэнцIыкIу Алий и цIэр зезыхьэ Къэбэрдей къэрал драмэ теат­рым иджыблагъэ щагъэ­лъэпIащ КъБР-м и ­Театр лэжьакIуэхэм я зэ­­гу­хьэ­ныгъэр къызэрызэрагъэ­пэщ­рэ илъэс 80 зэрыри­къур.

КъБР-м щэнхабзэмкIэ и министр Къумахуэ Мухьэдин зэIущIэр къыщызэIуи­хым артистхэм ехъуэхъури, езыри театр гъащIэм пэ­IэщIэу къызэримылъытэр, къи­щынэмыщIауэ, Теат­рым и лэжьакIуэхэм я зэгу­хьэ­ныгъэм илъэситхукIэ зэ­рыщылэжьари жиIащ.
- Къыхэзгъэщыну сы­хуейщ КъБР-м щыIэ ­СТД-р къэралым щынэхъыфIхэм зэращыщыр. ­КъБР-м­ и театрхэр лъагапIэшхуэ тетщ. ЦIыхухэм я гъащIэр гуапагъэрэ дахагъэкIэ дгъэнщIыфу, яхуэщ­хьэпэну гупсысэхэр еттыфу илъэс куэдкIэ ди театрхэр щыIэну си гуапэщ! Мы махуэмкIэ, илъэс бжыгъэ дахэмкIэ сынывохъуэхъу, ехъу­лIэныгъэ, узыншагъэ фиIэну, фефIэкIуэну си гуапэщ, - захуигъэзащ Къумахуэм артистхэм.
АдэкIэ министрыр къеджащ Къэбэрдей-Балъкъэ­рым и Iэтащхьэ КIуэкIуэ Каз­бек къыбгъэдэкI хъуэхъу тхыгъэм.
«Быдэу си фIэщ мэхъу ­КъБР-м и Театр лэжьакIуэхэм  я зэгухьэныгъэм и илъэс 80-р зэригъэлъапIэр республикэм и щэнхабзэ ­гъащIэм дахэу къы­зэрыхэщынур. БлэкIа зэманым мы зэгу­хьэныгъэм хэлъхьэныгъэ ин хуи­­щIащ театр ­гъуазджэм зе­гъэу­жьыным, творчес­кэ ехъу­лIэныгъэ ди артист­хэм яIэным, псэкупсэ гъэ­­­­­­­сэныгъэ щIэблэм ябгъэ­дэлъхьэным. Зэманыр зэ­ры­гугъум щхьэкIи къэмынэу, абы и лэжьыгъэр зэ­пи­гъэуркъым. Творческэ ехъу­лIэныгъэ, гукъыдэж, узын­шагъэ фиIэну сынывохъуэхъу!», - итщ абы. 
КъБР-м и Правительст­вэм къыбгъэдэкI ЩIыхь тхылъ абы иритащ Театр ­лэжьакIуэхэм я зэгухьэ­ныгъэм и унафэщI Фырэ Майе икIи къэпсэлъапIэр хуит хуищIащ. 
Майе кIэщIу тепс­эл­ъы­хьащ зэгухьэныгъэм и тхы­дэм, 1941 гъэм къыще-жьэм.
- СТД-р ди республикэм щылажьэ зэгухьэныгъэхэм я нэхъ инхэм ящыщщ, абы и  IуэхущIафэ хэлъщ ­КъБР-м и щэнхабзэ гъащIэм ехьэлIа Iуэху куэдым. Ди зэгухьэ­ныгъэр хущIэкъу зэпытщ иджыри къэс ху­зэ­фIэкIам хигъахъуэу ипэ­кIэ кIуэтэным. 
Сэ схужыIэнукъым пан-де­мием ди лэжьыгъэр ­къигъэувыIауэ. Пэжщ, абы ди гъащIэм зэхъуэкIыныгъэ куэд къыхилъхьащ, цIыху зэхуэтшэсым я бжыгъэри дгъэмэщIэн хуей мэхъу, ­ауэ зыми  емылъытауэ долажьэ.
КъБР-м и СТД-м и лэжьыгъэм мызэ-мытIэу гулъытэ ин къыхуащIащ. 1998 гъэм Франджым щыIэ «Monde Sans Frontiere» ассоциа­цэм, «Партнёрство ради прогресса» программэм ипкъ иткIэ, «Дыщэ пальмэ» къыщытхуагъэфэщауэ щытащ. 2018 гъэм СТД-р къалъытащ КъБР-м щыIэ творческэ IуэхущIапIэ нэхъы-фIу. 
Нобэ илъэс 80 дрокъу, икIи ди къалэн нэхъыщхьэхэм ящыщщ творческэ цIыху-хэм я Iуэху дэгъэкIыныр, лей къатемыгъэхьэныр.
УФ-м и СТД-м и унафэщI Калягин Александр и псалъэхэр хуабжьу сигу ирихьащи, фэри зэхывэзгъэ­хыну сыхуейт: «Дэ псоми зэщхьу зыгуэр тхэлъщ, дэ дызэблагъэщ, хьэуэ, лъы­кIэкъым, ауэ абы нэхъ­рэ нэхъ гъунэ­гъуж гуэрщ дэ дызэпызыщIэр: дэ зы уна­гъуэу дызэхэтщ, ды­зэ­Iыхьлыщ, театрым ды­зэ­ри­шэлIауэ».
Майе къеджащ Каляги­ным къыбгъэдэкI хъуэхъу те­леграммэм. 
«Илъэс 80-р бжыгъэ дахэщ. АдэкIи фи IэнатIэр евгъэфIакIуэу, мыхьэнэшхуэ зиIэ Iуэхухэм фыпэлъэщу, фи мурадхэм зэран къа­хуэхъун лъэпощхьэпо щымыIэу фылэжьэну сы­ны­вохъуэхъу!» - псалъэ гуа­пэхэр итт абы. 
Пшыхьым ягу къыщагъэ­кIыжащ республикэм и театр гъащIэм зи гуа­щIэ хэзылъхьа артист нэхъыжьхэр, цIыхубэм фIыуэ ялъэгъуахэр.
Абы щагъэлъэпIащ утыкум и ветеранхэу, цIыхубэм илъэс куэд щIауэ фIыуэ ялъэгъуа, ягъэзэщIа ролхэмкIэ гукъинэж артистхэр. Абыхэм республикэм и щэнхабзэ гъащIэм щыпхаша лъагъуэ дахэм, теат­р­­хэм нэхъыжьыфIхэм ща­гъэзащIэ къалэным щы­тепсэлъыхьащ.
Пшыхьым къыщеджащ Кавказ Ищхъэрэм и щIыналъэхэм къикIа хъуэхъу тхыгъэхэм. 
Республикэм и театритхуми хъуэхъу гъэщIэгъуэнхэр ягъэхьэзырат, хэт уэрэд зэхилъхьат, хэти къафэ ­игъэуват. А псоми дэрэжэгъуэ къыхахыу еплъащ  пшы­хьым хэтахэр. 

Щомахуэ  Залинэ.
Сурэтхэр
Къарей  Элинэ трихащ.