«КъБР-1» телеканалым и корреспондентхэр иджыблагъэ щыIащ Урысейм и ФСИН-м Къэбэрдей-Балъкъэрым щиIэ Управленэм хабзэм ебэкъуахэм тралъхьа тезырхэр щрагъэпшыныж и колоние №3-м.
Тутнакъхэр IэнатIэкIэ къызэрызэгъэпэща щIыкIэм щыгъуазэ защIащ журналистхэм. Абыхэм зыщаплъыхьащ зи тезырыр зыпшыныжхэр щагъэлажьэ цеххэм. Псалъэм папщIэ, щыIащ IэнатIэ зэмылIэужьыгъуэхэм щылажьэхэм я IэщIагъэм епхауэ ящыгъын хуей фащэ хэхахэр щадым, тутнакъэщым исхэм папщIэ вакъэ щащI къудамэхэм. ХъыбарегъащIэ IуэхущIапIэм и лIыкIуэхэм апхуэдэуи зрагъэлъэгъуащ тутнакъхэм унэлъащIэхэр зэращIри. Журналистхэм яфIэгъэщIэгъуэн хъуащ тезырыр зыпшыныжхэм я IэпщIэлъапщIагъэр. Псом хуэмыдэу ахэр хуэIэзэу къыщIэкIащ гъущIыр зэпыгъэвэным, саугъэт пщIы хъуну цIыкIуфэкIухэр, шахмат, нард зэрыджэгу Iэмэпсымэхэр щIыным. Журналистхэр а IэнатIэм щылажьэ тутнакъхэм епсэлъащ, я Iуэху зытетым, дэзыхьэххэм щIэупщIащ.
Телевиденэм и лэжьакIуэхэм теплъэгъуэхэр щытрахым ящIыгъуащ Урысей ФСИН-м КъБР-м щиIэ Управленэм и ИК-3-м и унафэщIым и къалэнхэр пIалъэкIэ зыгъэзащIэ Шорэ Замиррэ а IуэхущIапIэм и унафэ-щIым и къуэдзэ Болатов Кемранрэ. Абыхэм журналистхэр щыгъуазэ ящIащ я лэжьэкIэми, IэнатIэм къыщыщIагъэкI продукцэ лIэужьыгъуэхэми. Абдеж къызэрыщыхагъэщащи, къатехуа щIыхуэхэр суд унафэкIэ тутнакъхэм апхуэдэ щIыкIэкIэ япшыныжым и закъуэкъым, атIэ ахэр я унагъуэхэми Iыхьлыхэми зэрахузэфIэкIкIэ ядоIэпыкъу, къалэжьа ахъшэм щыщ Iыхьэ хуагъэхьурэ.
Щхьэхуэу тепсэлъыхьащ лэжьапIэ IэнатIэхэм къыхагъэхъуэным, тутнакъ нэхъыбэм лэжьэну Iэмал яIэн папщIэ. Судым къищта унафэкIэ къытралъхьауэ щхьэхуимыту щаIыгъ пIалъэр иухрэ тутнакъэщым икIыжмэ, цIыхур жылагъуэм нэхъ псынщIэу хэзэгъэжынымкIэ, а фIэкIа хабзэр къы- зэпимыудыным хуэгъэIущынымкIэ мыхьэнэшхуэ иIэщ апхуэдэ Iуэху къызэгъэпэщыкIэм.