Зэманым къыщыхъу зэхъуэкIыныгъэхэм цIыхуми, дунейми, къэрал зэхэлъыкIэми, IуэхущIэкIэми зыщыдихъуэж лъэхъэнэщ иджыпсту дызыхэпсэукIыр. КъытщIэхъуэ щIэблэр куэдкIэ дэмыщхьу, зыужьыныгъэм хуэпабгъэу, губзыгъэу, Iэджэми хуэIущу къыдокIуэтей. Ауэ сыт хуэдиз псынщIагъ иIэу зэманым зимыхъуэжми, зэи зэпхъуэкI мыхъун хъугъуэфIыгъуэ гуэрхэр хэтщ ди гъащIэм. Абыхэм ящыщщ нобэ тхылъымпIэм тету ди анэдэлъхубзэкIэ къыдэкI «Адыгэ псалъэ» газетыр. Ар зэи IэщIыб пщIы мыхъуну къыдэкIыгъуэщ. Пэжщ, иджыпсту къежьа технологиещIэхэм куэдым я гъащIэр нэхъ тынш ищIащ, хъыбарыщIэхэр я Iэгу илъ телефоным къраджыкI.
Ауэ сыхуейт зэхэвмыгъэзэрыхьыну хъыбарегъащIэ IэнатIэхэм я къалэнхэмрэ адыгэ газетым и купщIэмрэ. Зэи тщыгъупщэ хъунукъым мыр ди анэдэлъхубзэкIэ къызэрыдэпсалъэр. Абы и япэ напэкIуэцIым къэралым, республикэм щекIуэкI Iуэхугъуэ нэхъыщхьэхэр хуабжьу зэгъэкIуауэ махуэ къэс къыдегъащIэ. СфIэфIщ а хъыбарыщIэхэм сыкъеджэну, сыт щхьэкIэ жыпIэмэ, гъащIэм и унэтIыныгъэ псоми къыщыхъумрэ щекIуэкIымрэ, ефIэкIуэныгъэм дызэрыхуэкIуэмрэ къытпэщылъхэмрэ ухегъэгъуазэ.
Газетым и купщIэр здэщыIэр къыкIэлъыкIуэ напэкIуэцIхэращ. Сыт абы имытыр, дэнэ «Адыгэ псалъэм» и журналистхэр здынэмысыр? Абы къытрадзэ тхыгъэхэр зытеухуа цIыху пашэхэми, Iуэху пыухыкIахэми, хъыбар гъэщIэгъуэнхэми сыт щыгъуи щIэщыгъуэу укъоджэ.
«Ди бынхэм адыгэбзэр ящIэркъым, яфIэгугъущ, еджэфыркъым», - жызыIэ адэ-анэхэм захуэзгъэзэнут. Пщыхьэщхьэм фыпIащIэу унэ лэжьыгъэр сабийхэм евгъэщIыж къудейкIэ бзэр фIыуэ ялъагъунукъым икIи ящIэнукъым. Абы папщIэ республикэм адыгэбзэкIэ къыщыдэкI газетхэр, журналхэр фи Iэнащхьэм телъын хуейщ. «Адыгэ псалъэм» фIэкIа фи унагъуэм къимыхьэми, жьыри щIэри дэзыхьэхын тхыгъэхэр тетщи, сэбэпщ. Телефонхэмрэ компьютерхэмрэ щаIэщIэужагъуэм сабийхэм газет напэкIуэцIхэр къызэгуахынщ, яфIэгъэщIэгъуэну еджэнщ махуэ къэс урысыбзэкIэ зи хъыбар зэхаха Iуэхугъуэхэм. Ауэрэ дихьэхынщ, щIэупщIэ хъунщ, я лъэпкъ зэхэщIыкIыр къигъэушынщ.