Тюнене, Устазны кюнюне аталып, Нальчикни 33-чю мектебинде къууанчлы жыйылыу болгъанды. Анга ишлерин уста билген, тюрлю-тюрлю конкурслада хорлагъан устазла, юйретиучюле да чакъырылгъандыла. Алагъа кёп алгъыш эмда махтау сёзле айтылгъандыла. Жыйылыуну къурагъанла коронавирус инфекциядан сакъланыу мадарла да этгендиле.
Байрамны тюрлю-тюрлю конкурсланы лауреаты "Кавказны танглары" юлгюлю сабий ансамбль жарыкъ тепсеую бла ачханды. Андан сора "Устазны жылы-2019" конкурсда хорлагъан Аслан Кашежев бла Инесса Шериева, педагоглагъа кёп огъурлу сёзле айтып, къууанчлы ингирни башлагъандыла.
Ол кюн устазланы алгъышларгъа КъМР-ни Правительствосуну Председателини орунбасары Марат Хубиев, КъМР-ни Парламентини Билим бериу, илму эмда жаш тёлюню ишлери жаны бла комитетини председатели Нина Емузова, КъМР-ни билим бериу, илму эмда жаш тёлюню ишлери жаны бла министрини къуллугъун толтургъан Анзор Езаов, билим бериуде ишлегенлени профсоюзларыны рескомуну таматасы Сергей Карныш да келгендиле.
Биринчи болуп сахнагъа Марат Хубиев чыкъгъанды. Ол устазланы, юйретиучюлени да, республиканы оноучуларыны, энчи кесини атындан да къызыу алгъышлагъанды. «Бюгюн бу ариу залда республиканы эм иги педагоглары олтурадыла.
Сёзсюз, атлары айтылыргъа тийишлиле дагъыда кёпдюле. Биз сизни барыгъыз бла да ёхтемленебиз. Сизни ишигиз къыйын эмда жууаплы болгъанын билебиз. Мен да аны бирле айтып угъай, кесимден сынап билеме: устазланы юйюрюнде туугъанма. Алай сиз, бир затха да къарамай, сайлагъан усталыгъыгъызгъа кертичилей къаласыз, бет жарыкълы ишлейсиз»,-деп, Марат Хубиев устазлагъа тёзюмлюк, насып тежегенди.
Алгъыш сёзюнден сора ол хычыуун жумушну башлагъанды. Къауум устазгъа саугъала, дипломла, сыйлы грамотала да бергенди. Алагъа тийишли болгъанланы араларында Сабий эм жаш тёлю чыгъармачылыкъны юйюнде къошакъ билим бериу жаны бла устаз Баккуланы Айшат, 2-чи номерли кадет школ-интернатда юйретиучю Гузийланы Алий, Нальчикде 1-чи номерли школ-интернатны директоруну окъутуу-юйретиу иш жаны бла орунбасары Ёзденланы Фатимат, ол окъуу юйден юйретиучю Нёгерланы Асият да бардыла.
Анзор Езаов да айырмалы устазлагъа бла юйретиучюлеге КъМР-ни Жарыкъландырыу, илму эмда жаш тёлюню ишлери жаны бла министерствосуну грамоталарын бергенди. Аланы алгъанланы араларында Терс-Къолда орта школну орус тилден бла литературадан устазы Доттуланы Фазика, Нальчикни 9-чу номерли мектебинде сабий садны юйретиучюсю Бёзюланы Жамиля, Огъары Малкъарны 2-чи мектебини сабий садында юйретиучю Забакъланы Асият, Элбрус элни орта школуну юйретиучюсю Керимланы Светлана да бардыла.
"Россейде 2020 жылны устазы" деген битеуроссей конкурсну регион кезиуюнде хорлагъан устазланы бла юйретиучюлени Нина Емузова алгъышлагъанды. Быйыл бу конкурсха къатышханланы араларында айырмалыланы араларында Огъары Малкъарны 2-чи мектебини устазы Газаланы Асият, Новоивановка элде башланнган класслада дерсле берген Жашууланы Фатимат, Кишпекден орус тилден бла литературадан устаз Жанатайланы Людмила, Нарткъалада 5-чи номерли мектепни ингилиз тилден устазы Мирзойланы Мадинаны атлары айтылгъанды.
"2020 жылны юйретиучюсю" деген битеуроссей конкурсну республикалы кезиуюнде хорлагъан юйретиучюлени араларында Элбрус районну Тырныауузда 1-чи номерли окъуу юйюню 6-чы бёлюмюнден Мамайланы Фатимат да барды.
2020 жылда элге барып ишлерге ыразылыкъларын 50 мингнге жууукъ адам билдиргенди. Аланы араларында да конкурс болгъанды. «Земский устаз» деген программагъа кёре ишлеп, хорламгъа жетишгенлени араларында Прохладна районну Благовещенка элинде мектепни устазы Жашууланы Хауа, Черек районну Бызынгы элини орта школунда ингилиз тилден окъутхан Байсолтанланы Лариса бардыла.
Быйыл "Жылны устазы" деген регион конкурсда хорламгъа Тырныауузну 5-чи номерли школуну физкультурадан устазы Фуад Буранов жетишгенди. Анга Сергей Карныш билим бериуде ишлегенлени профсоюзларыны атындан грамота, жыйырма минг сом да бергенди. Аллай саугъалагъа Нарткъалада 4-чю номерли сабий садны юйретиучюсю Ирина Сердюкова да тийишли болгъанды.