Нальчикде Къабарты орамны жаяу жюрюучю кесегинде «Каисса» деген шахмат школ ачылгъанды. Аны къууанчына Къабарты-Малкъарны Башчысы Казбек Коков, КъМР-ни Правительствосуну Председатели Мусукланы Алий, КъМР-ни Шахматла эмда шашкала жаны бла федерациясыны, къырал властьны органларыны, республиканы жамауатыны келечилери, спорт школну тренерлери бла сохталары да къатышхандыла.
Жыйылгъанланы алларында сёлеше, КъМР-ни Башчысы сабийлеге, келир тёлюлеге деп энчи мекям ачыу не заманда да магъаналы ишге саналгъанын чертгенди. «Мында уа 400-ден аслам сабий юйренирикди эмда фахмуларын ачыкъларыкъды. Барыгъызны да ма бу аламат иш бла алгъышлайма»,-дегенди Казбек Валерьевич.
Андан ары ол миллетни саулугъу, юйюр хазнала эмда сабийле ючюн къайгъырыу Къабарты-Малкъарны политикасында баш магъананы тутханлай къаллыгъын айырып айтханды. «Гитче тёлюню хунерин ачыкъларгъа тап онгла къуралыр ючюн биз къолубуздан келгенни аярыкъ тюйюлбюз. Бу сейир мекямны, аламат школну бизнесменле ишлетгенлерин да белгилемей болмайма. Бюгюн ол бютюн хычыуун кёрюнеди, ала сабийлерибизге окъургъа, айныргъа да онг бергендиле. Мен социал ишден бир жанында къалмагъан бизнесменлеге республикагъа быллай саугъа этгенлери ючюн жюрек ыразылыгъымы билдирирге сюеме. Бу юйден мингле бла чыкъгъан сабийле биз ала бла ёхтемленирча болсунла», - дегенди Казбек Коков.
Шахмат школну ачылгъаны бла совет эм россейли шахматист бла политик, дунияны кёп къатлы чемпиону, халкъла аралы гроссмейстер Анатолий Карпов да алгъышлагъанды. КъМР-ни Шахматла эмда шашкала жаны бла федерациясыны таматасы Артур Шахмурзов бла шахматчы спортчула да кёп ариу сёзле айтхандыла.
«Каиссада», шахматла эмда шашкала ойнаргъа юйретген отоуладан сора да, эришиуле бардырырча залла да бардыла. Дагъыда мында жаш художниклени бла къолдан усталаны ишлерини кёрмючлерин къурар, тыш къыраллы тиллеге, гуманитар эмда тюз илмулагъа окъутурча кабинетле да къурар мурат барды.