«ГъуэгуфI шынагъуэншэхэр» лъэпкъ проектым ипкъ иту республикэм мы гъэм щызэрагъэзэхуэж автомобиль зекIуапIэхэм я нэхъ кIыхь дыдэр Бахъсэн районым и Къубэ-Тэбэ, Къулькъужын Ищхъэрэ, Къулькъужын Ипщэ къуажэхэр зэпызыщIэ гъуэгурщ. Абы километр 18 и кIыхьагъщ.
Къулъкъужын Ищхъэрэм пхрыкI автомобиль зекIуапIэм зэщIегъэхьэ амбулаторэр, щIыпIэ сымаджэщыр, къуажэ администрацэм и хэщIапIэр, курыт еджапIищыр, ЩэнхабзэмкIэ унэр, Iэпкълъэпкъым зыщрагъэужь-узыншагъэр щрагъэфIакIуэ IуэхущIапIэр, сабий садыр, Хэку зауэшхуэм хэкIуэдахэм я фэеплъыр.
Автомобиль зекIуапIэм тель асфальтыжьыр мы зэманым трагъэкъэбзыкI. Ар зэрызэфIэкIыу, IэщIагъэлIхэм гъуэгум тIуащIэу асфальтыщIэ тралъхьэнущ, и Iуфэхэр ягъэбыдэнущ, гухьэ-гуэкIхэмрэ псэупIэхэм хуэкIуэ лъагъуэхэмрэ зыхуей хуагъэзэнущ. КъинэмыщIауэ, социальнэ мыхьэнэ зиIэ IуэхущIапIэхэм лъэс лъагъуэхэр бгъэдашэнущ автомобиль зекIуапIэ нэхъыщхьэм хиубыдэ лъэмыжхэр къагъэщIэрэщIэжынущ, шынагъуэншагъэм тещIыхьа нагъыщэхэр гъуэгу щхьэфэм щратхъэнущ, и бгъуитIымкIи щагъэувынущ.
ЗэращIылIа зэгурыIуэныгъэм ипкъ иткIэ, лэжьыгъэ псори мы гъэмахуэм яухынущ.
КЪАНКЪУЛ Раисэ.
