ЦIыхур зэса мардэхэр псынщIэрыщIэу гъащIэм ехъуэж, нэр зыхьэхуа творческэ IэдакъэщIэкIхэм уатетхыхьын къудейр къызэрыгуэкI еплъыкIэхэм къигъэтIэсэгъуейуэ.
«ЦIыхухэм я лъэIукIэ сурэт сощI» жиIэу зытетха, Головком и цIэр зезыхьэ уэрамым тет абджыпс унэм ублэкIын къудейм узыIэпешэ. Мурад сщIащ сыщIыхьэу хуиту зыщысплъыхьыну - хэт димыхьэхыр сурэтыщIхэм я Iэдакъэм къыщIэкIа теплъэгъуэ дахэхэм…
Пасэрей кхъуэщыным ит сэхуран гъэгъа Iэрамэшхуэр зэ еплъыгъуэкIэ репродукцэу къысфIэщIат. Абдежым гуфIэу къызбгъэдыхьащ ику ит ныбжь зиIэ цIыхубз лъагъугъуафIэ. Уянаевэ Юлиет ар - сурэтыщIт. УпщIэ леи къызимыту ар лъэныкъуэкIэ екIуэтэкIащ, сурэтхэм гупсэхуу сахэплъэну Iэмал къызиту. Апхуэдэ щэным деж къыщыщIидзэрт цIыхум бгъэдэлъ зэчийм узыIэпишэнуми, пIэщIэгъуэр птелъу укъызэрыщIэкIыжын Iэмал къэплъыхъуэнуми. Салоным щIэт «гармоние» телъыджэр зыкIи зэпимыуду абы щэхуу къызжиIащ сурэт псори езым зэриIэдакъэщIэкIыр… Адрей псори щылейт дахагъэм и дунейм. Иджы си гупсысэм зэригъэзахуэр а псом хухэсхыну тхыгъэм и гъэпсыкIэ сщIынурт - сыхуейтэкъым творческэ цIыхум и зэфIэкIыр биографие гъущэрэ абы зэгуэр къыхуагъэфэща гулъытэхэм я бжыгъэр къэгъэлъэгъуэнымкIэ згъэнщIыну.
Хуиту зэпызоплъыхь гъуэгурыкIуэу сыздыблэкIым, псом япэу си нэм къыфIэна сэхуран Iэрамэр - Vinsenta Van Gog и сэхуранхэр сытым щыщ жыпIэнщ! Абдежым гукIэ зэпэслъыту сыхуежьащ а IэрамитIым яхъумэ щэхухэр - Ван Гог ейм и репродукцэ сиIэт. Си гум къэкIар зэуэ езупIэхыжащ, дэтхэнэ зы «шедевр» лэжьыгъэми къыдгурымыIуэ куэд зэрыхэлъыр и щхьэ къысфIэхъужри. ИтIани, сегупсысырт илъэс 500 - 600 ипэкIэ ящIа IэдакъэщIэкIым иубыда лъагапIэр зэи къэмылэнджэжын зэрыхъуам… А зэман жыжьэм лъандэрэ сыт хуэдиз сурэтыщIым я сэхуран Iэрамэ дапщэ дунейм къытехьа, ар япэм ефIэкI пэтми, бжьыпэр зэи къазэрылъымысынур ящIэжу… Гъэгъам и зэхэгъэувэкIэр, абы ирихьэлIа сэхусэплъхэм я зэхуэхьыкIэр, сурэтыр къэгъэнэIуэным хуэщIауэ къигъэсэбэпа лъащIэр - я дэтхэнэми уатхьэкъу.
Уянаевэм и реализм гъэпсыкIэр лъэныкъуэ куэду гуэшащ: ди лъахэр зэрыкъулей, гум къехуэбылIэ теплъэгъуэхэр, ирехъу ар пасэрей унэ, пхъэщхьэмыщхьэ Iэнэ. Гъэм и зэблэкIыгъуэ зэманхэм ятрищIыкIахэр IупщIщ, я жыпхъэ щхьэхуэ яIэжщ, ауэ яхуэбгъэдэн дэнэ къипхын зэ еплъыгъуэкIэ къызэрыгуэкIыу зэхэт удз гъэгъа Iэрамэхэм, щхьэгъубжэ зэIухам къызэщIиубыдэ теплъэ кIапэм, хы Iуфэхэм щызэш гъуазэ ныкъуэкъутэм…
Гъэгъа жанрым темыкIыу гъэпсыкIэхэр щихъуэжа чэтэнхэми уарохьэлIэ, уздеплъым, арт гъэпсыкIэм зэуэ ухашэрэ, уи гупсысэр нэхъри зэкIэщIахыу. Дэрэжэгъуэ къует кхъуэщын хужь-шакъафэм пыIухауэ къыщхьэщыт хризантемэ гъэгъа хужьхэм. А тIур зэпэIэщIэу ищIащ сурэтыщIым, хьэршымрэ щIылъэмрэ гупсысэкIэ ар зылъагъухэм зэпащIэжынуми хуиту.
Иджырей сурэтыщIхэм я IэдакъэщIэкIхэр цIыхубэм къахуэнэн папщIэ, гугъуехь щхьэхуэхэм пэщIэтын хуей мэхъу. Апхуэдэхэм деж уней салонхэм мыхьэнэшхуэ яIэщ. Абыхэм цIыху куэд щыщахуэу пхужыIэнукъым, ауэ гъащIэм къыщыхъу сыт хуэдэ зэхъуэкIыныгъэхэми емылъытауэ, ахэр къызыгурыIуэ, дахагъэм дэрэжэгъуэ къыхэзыххэр щыIэнущ икIи абыхэм Iэмал къуат а зы сурэтыщIым и дунеймрэ и зэфIэкIымрэ нэхъ куууэ ущыгъуэзэнымкIэ. Ди республикэм уней салонхэр иджыпстукIэ щымащIэщ, сурэт гъэлъэгъуапIэ Iэхуитлъэхуит инхэр зэрыщымыIэм хуэдэ къабзэу.
ЦIыхум я гъащIэр нобэ мылъкум нэхъ тегъэщIа хъуащ, - жаIэнущ куэдым, псэлъамэ, арщхьэкIэ а дэзыхьэхынур япэщIыкIэ ялъагъун хуейт. Сыти жыIи IэдакъэщIэкI нэсым блэкIын куэд щыIэкъым, къахуэмыщэхуми, еплъын къудей щхьэкIэ.
ЛЪОСТЭН Музэ.