ЩIыуэпсым щхьэхуэу яхъумэ и щIыпIэхэм (ООПТ-хэр - Особо охраняемые природные территории) гулъытэ хэха хуэщIыным теухуауэ ирагъэкIуэкI «МэзгъэфIэнхэм я лъэ макъ» («Марш парков») Iуэхугъуэхэр мы гъэм мэлыжьыхьым и 20-м щыщIэдзауэ и 26 пщIондэ ЩIы хъурейм тет къэралхэм ящыщу 200-м щIигъум щокIуэкI.
Зи гугъу тщIы махуэхэм къриубыдэу, мэзгъэфIэнхэмрэ паркхэмрэ цIыхухэр щызэхуашэс, жыгыщIэхэр щагъэтIыс, кIэрыхубжьэрыхухэр щызэхуахьэс, псынащхьэхэр щагъэкъабзэ, пресс-конференцхэр къыщызэрагъэпэщ. А Iуэхугъуэхэм я мыхьэнэр, сыт хуэдэ хэку емыхьэлIами, зыхуэкIуэжыр зыщ: властыр, цIыхубэ хъыбарегъащIэ IэнатIэхэр, хьэрычэтыщIэхэр, ЩIым цIыхуу тетыр «ЩIыуэпсым хэхауэ яхъумэ и щIыпIэхэм» гулъытэ хэхауэ зэрыхуэщIыпхъэм, дыкъэзыухъуреихь дунейм зэрыхуэсакъыпхъэм къыхуеджэнырщ, я гупсысэр тешэнырщ, щIыпIэ пхыдзахэр зи хэщIапIэ хьэкIэкхъуэкIэхэр, къэкIыгъэхэр щытыкIэ гугъу зэриувам жылагъуэр щыгъэгъуэзэнырщ, щIыуэпсыр хъумэн зэрыхуейм къытщIэхъуэ щIэблэр хуэущиинырщ.
«МэзгъэфIэнхэм я лъэмакъ» зыфIаща япэ щIыхьэхур 1990 гъэм США-м щызэхашат. Илъэс бжыгъэ дэкIри, 1995 гъэм «Лъэпкъ паркхэмрэ мэзкъуэдыхэмрэ» я махуэхэри къэунэхуащ.
Урысей Федерацэм «МэзгъэфIэнхэм я лъэ макъыр» къыщысар 1996 гъэращ, «ЦIыхуIэ зылъэмыIэса щIыуэпсыр хъумэнымкIэ центр» псапащIэ фондым и жэрдэмкIэ. Иджы ар ди кэралым щызэдагъэлъапIэ ЩIыуэпсым хэхауэ яхъумэ и щIыпIэхэм, дыкъэзыухъуреихь дунейм кIэлъыплъынымкIэ и IуэхущIапIэм («Росприроднадзор»), ЩIыпIэ пхыдзахэмрэ абыхэм щыпсэу псэущхьэхэр хъумэнымкIэ центрым, зэрыщыту къатщтэмэ, жылагъуэм.
Мы зэманым УФ-м «ЩIыуэпсым хэхауэ яхъумэ и щIыпIэу» 100-м щIигъу иIэщ. Абыхэм я Iыхьэ щанэр ЮНЕСКО-м и биосфернэ хъумалъэу къалъытэ икIи дыкъэзыухъуреихь дунейм и хъугъуэфIыгъуэ нэхъ лъэщхэм хабжэ.
Дыкъэзыухъуреихь дунейм и щытыкIэр зэтеIыгъэнымкIэ цIыхум я дэIэпыкъуэгъу нэхъыщхьэр - езы щIыуэпсым хэгъэщхьэхукIа и экосистемэхэрщ, е нэгъуэщIу жытIэмэ, пкъынэ-пкъынэу щызэрыубыда и Iыхьэшхуэхэрщ.
Аращ, ООН-м и жэрдэмкIэ, 2021 гъэм къыщыщIэдзауэ 2030 гъэм нэсыху къриубыдэ илъэсипщIыр экосистемэхэр (мэзхэри, губгъуэхэри, псыпцIэхэри хэту) зэтегъэувэжыным щIыхухахар.
КЪУМАХУЭ Аслъэн.