БжьыхьэлI Замир зи гъэсакIуэ «Черкес» къэфакIуэ гупыр иджыблагъэ хэтащ НТВ-мкIэ екIуэкI «Страна талантов» телепроектым. «Черкес»-р кавказ къафэхэмкIэ Урысейм и чемпионщ. Ди ныбжьыщIэхэм я жыджэрагъым, утыку итыкIэм итхьэкъуащ къэпщытакIуэхэр, телевизореплъхэр. КъэфакIуэхэм зыкъызэрагъэлъэгъуар интернетым иралъхьа нэужьи, абы еплъахэм псалъэ гуапэхэмрэ хъуэхъу дахэхэмкIэ куэдым зыкъыхуагъэзащ. КъэпщытакIуэхэм къыхагъэщащ къафэр бгъэзэщIэну зэрыгугъур, ауэ ныбжьыщIэхэм ар уардэрэ уатхьэкъуу къазэрехъулIар.
- Кавказым и цIыхухэм лъэпкъ къафэр я лъым хэтщ. Къэфэн щIадзамэ, къызэрыбгъэувыIэни щыIэкъым. АтIэ ар фIыкъэ?! – жиIащ Урысейм и цIыхубэ артисткэ Бабкинэ Надеждэ.
«Поедем поедим» нэтыныр езыгъэкIуэкI итальян пщафIэ, гитарист Арнальди Федерико жиIащ нэтын трихыу Кавказым щыщыIам зыпэрыса Iэнэр игу къызэрагъэкIыжар:
- Фи шыгъупIастэ IэфIым фи Iэнэхэр къызэрикъутэм хуэдэщ мы фи къафэкIэмкIэ иджыпсту утыкур зэрывгъэбжьыфIар. Дыкъыщылъэту щхьэ дыкъэмыфэрэ, жытIэу дыкъытриIэтыкIырт дэри!
- ИгъащIэм сымылъэгъуа слъэгъуащ, игъащIэм зыхэзмыщIаи зыхэсщIащ нобэ! Сэ си гугъат къафэм теухуауэ згъэщIэгъуэжын щымыIэу. Ауэ! Макъамэр щызэхэсхым, фи нэхэм хъуаскIэ къыщIэлъэлъу, IэпкълъэпкъкIэ фыпсалъэу фыкъыщилъадэм, сэ псалъэ сиIэжакъым! - жиIащ уэрэджыIакIуэ Сумишевский Ярослав.
Урысейм щIыхь зиIэ и артист Дружинин Егор игу ирихьащ къэфакIуэ цIыкIухэм «асса»-р къызэрапсэлъыр, ар я гум къызэриIукIым хилъэгъуащ телъыджэ.
- ЦIыкIухэм къафэщIэ щезгъащIэкIэ, щIэщыгъуэ зэрысщIыным иужь ситщ. Сюжет гуэр хызолъхьэ, театр хуэдэу сощI. Сабийхэр къафэбзэкIэ зэпсэлъэн-зэрыщIэнымкIэ ар IэмалыфIщ. ЗэрызгъэунэхуамкIи, апхуэдэм деж къафэм и мыхьэнэр нэхъ зыхащIэ. ЗыхащIа нэужь, цIыхугум нэмысынкIэ Iэмал иIэкъым. Сэ согугъу къэфакIуэхэр утыкум къихьа нэужь ахэр фIыуэ ялъэгъуным, еплъхэм я нэгум къыщIэнэным. Адыгэм ди хьэлым хэтщ мыри: «ТекIуэныгъэракъым нэхъыщхьэр, атIэ Iуэхум дызэрыхэтырщ» жыIэкIэм арэзы дыкъищIыркъым, - жиIащ БжьыхьэлI Замир.
Къэбэрдей-Балъкъэрым и къэфакIуэхэр финалым нэсащ!
ГУГЪУЭТ Заремэ.