КъБР-м и СурэтыщIхэм я зэгухьэныгъэм къызэригъэпэщри иджыблагъэ «Гранд-Кавказ» хьэщIэщым щекIуэкIащ «Арт» спектаклымрэ гъэлъэгъуэныгъэмрэ.
КъБКъУ-м и «Занавес» студент театрым и артистхэр художественнэ выставкэм зыкърезыгъэхьэлIахэм я пащхьэм щыджэгуну куэд щIауэ щIэхъуэпсырти, иджы къайхъулIащ. Спектаклым и макъамэр зытхар композитор Мэршэнкъул Астемырщ.
Франджы драматург Резэ Ясминэ и пьесэм къытращIыкIа спектаклым щIалищ щоджэгури, щыри ерыщу зодауэ. ЩIызэдауэр ахъшэкъым, политикэкъым, бзылъхугъэкъым, атIэ сурэтыщIым и IэдакъэщIэкIыу утыкум итырщ. Зым жеIэ а сурэтыр уасэншэу лъапIэу, адрейм абы и мыхьэнэр иреудых, ещанэм нэгъуэщI еIуатэ. Ахэр апхуэдизу Iэзэу зодауэри, пэшым цIыхуу щIэсым яфIэгъэщIэгъуэн мэхъу сурэтым ит теплъэгъуэр, ауэ ар спектаклым и кIэращ абыхэм щрагъэлъагъур. «Дахагъэр къэзылъагъуфым ейщ», адыгэ жыIэгъуэр нэхъ хуокIуэ мы спектаклым щIэлъ гупсысэ нэхъыщхьэм.
- Республикэм и художникхэм я пащхьэм дыщыджэгуну куэд щIауэ ди хъуэпсапIэт, ди лэжьыгъэр къазэрыщыхъунур тфIэгъэщIэгъуэнти. Выставкэм хыхьэу дыджэгуну дыщрагъэблагъэм, занщIэу арэзы дыхъуащ, - жеIэ театрым и художественнэ унафэщI икIи и режиссёр Дохъушокъуэ Мадинэ.
Ар зи пашэ гупым ягъэлъэгъуа спектаклыр еплъахэм ягу дыхьащ. Актёр джэгукIэ щIэщыгъуэу къалъытащ ялъэгъуар, артист ныбжьыщIэхэм я ролхэр къазэрехъулIам и щыхьэтщ абыхэм хужаIа щытхъу псалъэхэр.
Тхыгъэри сурэтри ТЕКIУЖЬ Заретэ ейщ.