Орлов областым и Орёл къалэм гъатхэпэм и 22 - 26 махуэхэм щекIуэкIащ сумоистхэм я урысейпсо зэхьэзэхуэ. Къэбэрдей-Балъкъэрым и спортсменхэр абы я зэфIэкI щеплъыжащ икIи къыхэжаныкIащ.

Урысейм и щIыналъэ 20-м икIа спортсмен 400-м нэблагъэ хэтащ а чемпионатым. Къэбэрдей-Балъкъэрым и лIыкIуэу абы хэтащ Шыбзыхъуэ Къантемыр, Джэдгъэф Инал, Тау Миленэ, Алборэ Ис­лъам сымэ. Шыбзыхъуэ Къантемыр дыщэ медалыр ­къихьащ, Джэдгъэф Иналрэ Тау Миленэрэ домбеякъыр къыхуагъэфэщащ, Алборэ Ислъам етхуанэ ­хъуащ. Чемпионатым и етIуанэ махуэм Тау Миленэ республикэм иджыри зы домбеякъ медаль къыхуихьащ. Ахэр зыгъасэр Гъубж БетIал, Бэджыдэ Рустам, Кульчиев Тамерлан сымэщ. Чемпионатым щыте­кIуахэр Токио щекIуэкIыну дунейпсо зэхьэзэхуэм ирагъэблэгъащ.
УФ-м СпортымкIэ и министрым и къуэдзэ Байсултанов Одес фIыщIэ тхылъ Алборэ Ислъам къыхуигъэфэщащ, «Кубок содружества» дунейпсо чемпионатым пашэ зэрыщыхъуам, физкультурэмрэ спортымрэ зегъэужьыным хэлъхьэныгъэфI зэрыхуищIым папщIэ.

БжьыхьэлI Розэ.