Хабзэ хъуауэ, УФ-м ЕгъэджэныгъэмкIэ и министерствэм гъэ къэс мыпхуэдэ зэманым къыхелъхьэ «Илъэсым и егъэджакIуэ нэхъыфI» урысейпсо зэпеуэр къэралым щегъэкIуэкIыпхъэу. Мы махуэхэм хэIущIыIу хъуащ зэхьэзэхуэм и щIыпIэ Iыхьэхэм щытекIуахэр.
Дзэлыкъуэ щIыналъэм и егъэджакIуэхэр дапщэщи жыджэру хэтщ а къэралпсо зэпеуэм. Районым и курыт школхэм я IэщIагъэлIхэм ябгъэдэлъ зэфIэкIхэм я нэхъыбэр щагъэлъагъуэ абы и утыкухэм. «Илъэсым и егъэджакIуэ нэхъыфI» мыгъэрей зэпеуэм щIыналъэм щыхэтащ цIыхуи 7. Егъэджэныгъэ IэнатIэм зэрыпэрыт илъэс бжыгъэкIи, ирагъэдж предметхэмкIи, ябгъэдэлъ IэзагъымкIи зэхуэмыдэ, атIэми я IэщIагъэм хуаIэ пэжагъымкIэ, сабийхэм хуаIэ лъагъуныгъэмкIэ, щIэблэм щIэныгъэфI етынымкIэ зыхащIэ жэуаплыныгъэмкIэ зэтехуэ IэщIагъэлIт ахэр.
Зыщылажьэ школхэм нэхъыфIу къыщалъытахэр я Iуэху зехьэкIэ мардэхэмкIэ щызэпеуащ Дзэлыкъуэкъуажэ дэт ЩэнхабзэмкIэ унэм. Дэтхэнэ егъэджакIуэри хущIэкъуащ и IэщIагъэмкIэ бгъэдэлъ Iэзагъыр, дерсхэм хилъхьэ щIэщыгъуагъыр, абыхэм къыщигъэсэбэп иджырей техникэмрэ технологие пэрытхэмрэ къигъэлъэгъуэну. Зэпеуэм и къэпщытакIуэхэм апхуэдэу гулъытэ хуащIащ егъэджакIуэм и бзэм и шэрыуагъым, абы и цIыху хэтыкIэмрэ зыIыгъыкIэмрэ. А псори наIуэ щыхъу зэхьэзэхуэр купщIафIэ хъуащ, абы укIэлъыплъынуи хуабжьу хьэлэмэтт.
ЕгъэджакIуэхэм щыгъуазэ зыхуащIыну я мурада псоми къэпщытакIуэхэр набдзэгубдзаплъэу якIэлъыплъа нэужь, белджылы ящIащ «Илъэсым и егъэджакIуэ нэхъыфI» цIэр мы гъэм зыхуэбгъэфащэ хъунур. Дзэлыкъуэ щIыналъэм и егъэджакIуэ нэхъыфIу мы илъэсым къалъытащ Сэрмакъ дэт курыт школ №1-м тхыдэмрэ обществознаниемрэ щезыгъэдж Хьэжкъасым Иринэ. Аращ районым и щIыхьыр егъэджакIуэхэм я республикэпсо зэпеуэм щыщызыхъумэнур.
КъинэмыщIауэ, щIыналъэ зэпеуэм и лауреат хъуахэми я цIэхэр къыщраIуащ зэхыхьэм. Абыхэм ящыщ дэтхэнэми зэхьэзэхуэм зэрыхэтам щыхьэт техъуэ сертификат иратащ, егъэджакIуэхэм я профсоюзым къыбгъэдэкI ахъшэ саугъэтхэр щIыгъуу.
ТАМБИЙ Линэ.
