КъБР-м и Iэтащхьэ КIуэкIуэ Казбек иригъэкIуэкIащ Къэбэрдей-Балъкъэр Республикэр къызэрызэрагъэпэщрэ илъэси 100 зэрырикъур гъэлъэпIэным зыхуэгъэхьэзырынымрэ махуэшхуэм пыщIа гуфIэгъуэ дауэдапщэхэр егъэ­кIуэкIынымкIэ къызэгъэпэщакIуэ комитетым и зэIущIэр.

КIуэкIуэ Казбек зэгъэзэхуэ­жыны­гъэхэмрэ чэнджэщхэмрэ хилъхьащ махуэшхуэр зэрекIуэкIыну яубзыхуам. Абы жиIащ республикэм мы гъэм фокIадэм и 1-м къыщыщIэдзауэ щекIуэкIыну Iуэху ­нэхъыщхьэхэр Къэбэрдей-Балъкъэрыр илъэсищэ щрикъум ехьэлIауэ щытын зэрыхуейр. Iэтащхьэм абыкIэ жэуап зыхьхэм пщэрылъ ящищIащ махуэшхуэр зэрырагъэкIуэкIыну щIыкIэу нэхъ пасэу яубзыхуахэм хэплъэжыну икIи щIыгъу­жыпхъэу къалъытэхэр тхьэмахуэм къриубыдэу къыхалъхьэну, ап­хуэ­дэуи  лэ­жьакIуэ гупхэр а Iуэхухэм нэхъ жыджэру яужь итыну.
Iэтащхьэм къыхигъэщащ махуэшхуэ дауэдапщэхэм тэмэму зыхуэгъэхьэ­зы­рыным мыхьэнэшхуэ зэриIэр.
«ЩIыпIэхэр зэIузэпэщ щIыныр, со­циаль­нэ мыхьэнэ зиIэ объектыщIэхэр ухуэныр, ди лъэпкъхэм я щэнхабзэ ­зэ­мылIэужьыгъуэ къулейр нэсу къызэ­щIэ­зыубыдэну программэ зэхэлъхьэ­ныр, республикэм щыпсэу дэтхэнэ зы­-ми дежкIэ купщIэшхуэ зыхэлъ дамыгъэхэр, хьэщIагъэ дахэр - мис ахэращ и лъабжьэу щытын хуейр республикэр лIэщIыгъуэ зэрырикъум теухуа махуэшхуэм», - къыхигъэщхьэхукIащ КIуэкIуэ Казбек.

КъБР-м и Iэтащхьэмрэ Правительствэмрэ я пресс-IуэхущIапIэ.