«GID UNESCKO» IуэхущIапIэм Къэбэрдей-Балъкъэрым и лIыкIуэхэм фIыщIэ ин яхуещI «Дуней псом тет лъэпкъхэм я зэныбжьэгъугъэ» программэм жыджэру зэрыхэтамрэ зэкъуэтыныгъэр гъэбыдэным хэлъхьэныгъэ зэрыхуащIамрэ папщIэ. «GID UNESCKO» IуэхущIапIэм и вице-президент Бенетти Юлие зэрыжиIэмкIэ, мы гъэм и Iуэхугъуэ нэхъыщхьэ хъуа а махуэшхуэм кърихьэлIащ къэрал 26-м щIигъум я лIыкIуэхэр - ЮНЕСКО-м хэтхэр.
Урысей Федерацэм и цIыхубэ артисткэ, КъБР-м щIыхь зиIэ и артисткэ, Къэрал саугъэтым и лауреат, ЮНЕСКО-м Кавказ Ищхъэрэм щэнхабзэмкIэ щиIэ къудамэм и президент, Кавказ Ищхъэрэм ГъуазджэхэмкIэ и къэрал институтым и профессор, республикэм и лIыкIуэхэм я пашэу зэхыхьэм хэта Гъэсашэ Наталье къызэрыхигъэщамкIэ, франджыхэмрэ дуней псом и къэрал зэмылIэужьыгъуэхэм къикIахэмрэ зыхагъэгъуэзащ Кавказым ис лъэпкъхэм я щэнхабзэмрэ хабзэхэмрэ. Апхуэдэ зэIущIэхэр, псом япэу, хуэунэтIащ щэнхабзэ, дин зэпыщIэныгъэхэр гъэбыдэным, дунейм щыпсэу лъэпкъхэм я щэнхабзэ щIэинхэр хъумэнымрэ ахэр къэгъэщIэрэщIэжынымрэ, абыхэм къащIэупщIэр нэхъыбэ щIыным. Абы жиIащ къэкIуэнум къыздихьынкIэ хъуну мыхъумыщIагъэхэм дапэщIэтыфын щхьэкIэ, ди адэжьхэм я щIэинхэр тхъумэжыныр ди къалэн нэхъыщхьэу зэрыщытыр.
А махуэхэм концертищ ятащ. Къэбэрдей-Балъкъэр, Ингуш, Осетие Ипщэ республикэхэм щIыхь зиIэ я артисткэ Даур Иринэрэ Куржым щIыхь зиIэ и артист Гуцаев Нодаррэ, «Зихия» къэфакIуэ ансамблым и артистхэм залым щIэсхэр IэгуауэшхуэкIэ къыпежьащ. Художник цIэрыIуэ КIыщ Мухьэдин и сурэтхэм я гъэлъэгъуэныгъэм зэхуишэсащ абы и творчествэр фIыуэ зылъагъухэр.
Апхуэдэу программэм хыхьэу ягъэлъэгъуащ режиссёр Нэгъаплъэ Аскэрбий и «Черкешенка» фильмыр, франджыбзэкIэ зэрадзэкIауэ. Абы къыхощ адыгэ бзылъхугъэ цIэрыIуэ куэдым я гъащIэр - щIыхь зиIэ легионер, командор, генерал Хьэгъундокъуэ Елмэсхъан, «Кавказ вагъуэ» правительствэ дамыгъэ лъапIэр зыхуагъэфэща, франджы балеринэ, театрымрэ киномрэ я актрисэ Черинэ Людмилэ (Щамырзэ Моникэ) сымэ, нэгъуэщIхэри.
Гъэсашэ Наталье фIыщIэ ин яхуищIащ а проектыр гъэзэщIэным жыджэру хэтахэмрэ дэIэпыкъуэгъу къахуэхъуахэмрэ.
Абы зэрыжаIэмкIэ, Париж ди лIыкIуэхэр зэрыщыIам и Iуэху нэхъыщхьэ хъуащ адыгэ цIыхухъу, цIыхубз фащэхэр ЮНЕСКО-м и музейм тыгъэ зэрыхуащIар. Фэилъхьэгъуэхэр щыIихым, УФ-м и полномочнэ лIыкIуэ, Урысейм и лIыкIуэу ЮНЕСКО-м зэпымыууэ хэт Кузнецов Александр къыхигъэщащ Урысей Федерацэм ис лъэпкъхэм плъыфэ зэмылIэужьыгъуэхэмкIэ зэхэухуэна я щэнхабзэ телъыджэм Кавказ Ищхъэрэм мыхьэнэшхуэ зэрыщиIэр. Дунейпсо арткомитетым и вице-президент Бейтыгъуэн Iэуес къыбгъэдэкIа а саугъэт лъапIэм папщIэ фIыщIэ хуищIа нэужь, Кузнецов Александр жиIащ Кавказым ис лъэпкъхэм ЮНЕСКО-м и лэжьыгъэм дяпэкIи хэлъхьэныгъэ хуащIыну зэрыщыгугъыр.
ТЕКIУЖЬ Заретэ.