ЦIыхум и дуней тетыкIэ хъунур нэхъыбэ дыдэу сабиигъуэ зэманым епхауэ къыщIэкIынущ. И гупсысэр зэтеувэн щIедзэ, и хъуреягъым кIэлъоплъ, упщIэрей мэхъу. Дауи, дахагъэ куэду илъагъун хуейщ. ЦIыкIухэм я гъэсэныгъэм теухуауэ къалэн гугъу ягъэзащIэ сабий садхэм. Иджыблагъэ деплъащ ныбжьыщIэхэмрэ я гъэсакIуэхэмрэ я зэпыщIэныгъэ гуапэр къызыхэщ Iуэхугъуэ. Щхьэлыкъуэ сабий сад №2-м щекIуэкIащ Шэджэм щIыналъэ администрацэм егъэджэныгъэмкIэ и управленэм и лэжьакIуэхэр, сабий садхэм я унафэщIхэр зрагъэблэгъа семинар. Ар Iыхьэ-Iыхьэу гуэшат.
Пасэреи нобэреи
Iуэхур Урысеймрэ Къэбэрдей-Балъкъэрымрэ теухуа гъэлъэгъуэныгъэхэмкIэ къызэIуахащ. Абыхэм яхэтт пасэрей хьэпшыпхэри, гъэсакIуэ IэпэIэсэхэм я IэрыкIхэри, сабийхэр ящIыгъуу зэлэжьахэри. Хьэпшыпхэм къаIуатэрт тхыдэ хъыбари, лъэпкъ IэщIагъэхэм ятеухуа гупсыси, шхыныгъуэ IэфIхэм епха хабзэхэри, щэнхабзэм и дахагъи.
ЩIэблэр губзыгъэу бгъэсэнумэ…
Егъэджэныгъэ Iэмалхэр сабий садым къызэрыщагъэсэбэпым, и зыужьыкIэм, зэхъуэкIыныгъэхэм теухуауэ гъэсакIуэ Мэремкъул Иринэ и Iуэху еплъыкIэм щигъэгъуэзащ зэIущIэм хэтахэр.
- XXI лIэщIыгъуэм технологие, Iэмал щIэщыгъуэ куэд къэунэхуащ. Сабий садым щылажьэ дэтхэнэри иужьрей илъэсхэм егупсысагъэнущ «Сыт Урысейм и сабий садхэм щыIэ егъэджэныгъэм игъуэт зэхъуэкIыныгъэхэм кърикIуэр, сыт тщIэн хуейр зэманым къезэгърэ сабийм я зэхэщIыкIым дыхуэсакъыу абыхэм дадэлэжьэным папщIэ?» жиIэу. ЩIэ куэд къоунэху, апщIондэхункIи хуабжьу зехъуэж дызэса лэжьэкIэм. Сабиигъуэм, гъэсэныгъэм теухуауэ къалэн зиIэ цIыхухэр нэхъыщхьэ дыдэу зытетын хуейр сыт? Абыхэм епха упщIэ куэдым я жэуап къыщыдгъуэтынущ 2023 гъэм и фокIадэм щегъэжьауэ къэралым и сабий садхэр зытехьэн хуейуэ къару зыгъуэта федеральнэ егъэджэныгъэ программэхэм, - жиIащ Иринэ. ГъэсакIуэр зытепсэлъыхьа Iэмалхэм ящыщщ сабий къэс бгъэдыхьэкIэ щхьэхуэ къыхуэбгъуэтыныр, сабийм зиужьын папщIэ ар щагъасэ пэшхэр тыншу къызэ-
гъэпэщыныр, бжыгъэхэм тет я ныбжьым зэрыхуэкIуэм елъытауэ къэгъэсэбэпыныр, цIыкIухэм я зэфIэкI къызэкъуегъэхыныр, гъэсакIуэхэмрэ адэ-анэхэмрэ зэрыщIэу сабийм и гупсысэм зрагъэужьыныр, цIыкIухэр щэнхабзэм щIэпIыкIыныр.
ГъэсакIуэм къыхигъэщащ федеральнэ егъэджэныгъэ программэм нэхъыщхьэ дыдэу къахэщхэм ящыщ зы - сабий садым екIуалIэ сабийхэр хэкупсэу гъэсэныр. Къыщалъхуа щIыпIэм, къэралым теухуауэ я гупсысэм къизэгъэн хуэдиз щIэныгъэ етын, зыщыпсэу щIыналъэм щызэрахьэ щэнхабзэм хащIыкIыу къыдэгъэкIуэтеин хуейщ щIэблэр.
Мэремкъул Иринэ иригъэкIуэкIащ мастер-классхэри: сабийр даIуэрэ гупсысэфу егъэсэнымкIэ «Машэрэ мыщэхэмрэ» зыфIищар, гъэсакIуэмрэ адэ-анэхэмрэ зэдэлэжьэнымкIэ Iэмалхэр къызыхэщ «Гуэл телъыджэ»-р.
Дамыгъэхэм - пщIэ!
Сабийхэр зыхэт дерс иригъэкIуэкIащ гъэсакIуэ Тэтэр Жаннэ. Ар теухуат Урысей Федерацэмрэ Къэбэрдей-Балъкъэрымрэ я дамыгъэ нэхъыщхьэхэм - ныпым, гербым, гимным, къэралымрэ республикэмрэ я щIыпIэ телъыджэхэм, Урысейр нэгъуэщI къэралхэм къахэзыгъэщхьэхукI Iуэхугъуэхэм. Сабийхэр тегушхуауэ хэтащ дерсым. Я зэфIэкIхэр ягъэлъэгъуащ гъэсакIуэм и упщIэхэм гъэхуауэ пэджэжкIэрэ, Хэкум и уардагъыр къызыхэщ усэхэм къеджэкIэрэ, къэрал, республикэ дамыгъэхэм къарыкIхэр къызэпкърахкIэрэ. Псом хуэмыдэу щIэщыгъуэт узыпхыплъ доска иным цIыкIухэм зэгъусэу тращIыхьа «Дунейр сабийхэм я нэкIэ» сурэтыр - хэт уафэ къащхъуэ, хэт дыгъэ, хэт удзыпцIэ, хэти жыгхэмрэ удз гъэгъахэмрэ ящIащ зэмыфэгъуу. Псоми зэщIыгъуу ящIа сурэтым къыхэщырт къабзагъи, хуабагъи, мамырыгъи.
- ЦIыкIухэр хэкупсэу гъэсэнырщ, къэрал дамыгъэхэм пщIэ зэрыхуащIыпхъэр къагурыгъэIуэнырщ, къэралымрэ республикэмрэ теухуауэ щIэ къегъэщIэнырщ къэдгъэлъэгъуа лэжьыгъэм и купщIэр. Абы папщIэ къэзгъэсэбэпащ джэгукIэр, упщIэ-жэуапыр, гъуазджэм и Iэмалыр. ЦIыкIухэр щызгъэхьэ-
зырми гуапэ сщыхъуа куэд ядэслъэгъуащ, пэжым ухуеймэ. Япэ дыдэу гимныр къыщезгъэуам, езыхэм зыхащIащ абы ущыту уедэIуэн зэрыхуейри, макъамэр имыухауэ упсалъэ зэрымыхъунури. ЖыпIэнурамэ, си сабийхэм сазэрыщыгугъа псори ягъэзэщIащ, арэзы сыкъащIащ, - жиIащ Жаннэ.
«Сосрыкъуэ мафIэ
къызэрихьыжар»
Къашыргъэ ФатIимэрэ НафIэдз Альбинэрэ я гъэсэнхэм телъыджэу къагъэлъэгъуащ «Сосрыкъуэ мафIэ къызэрихьыжар» теплъэгъуэр. Гухэхъуэт адыгэ фащэм нэщхъыфIэ ищIа, адыгэбзэр къабзу зыIурылъ, нарт лIыхъужьхэм я псалъэхэр Iэзэу зэпэзыдзыж, сабийхэм уакIэлъыплъыну. УмыгъэщIэгъуэн плъэкIыртэкъым сабийхэм пщэрылъ къыщащIам фIы дыдэу зэрыпэлъэщар. Дэтхэнэми и образыр екIут, и псалъэхэр гум къыбгъэдэкIырт, хэлъэт иIэт. Сабийхэм нарт пшыналъэм хэт пычыгъуэ кIыхьхэр я гум зэрыраубыдами уигъэгуфIэрт. ЦIыкIухэм зэгъусэу жаIащ «Дэ адыгэм ди хабзэр аращ» уэрэдыр, уеблэмэ адыгэ къафэ лIэужьыгъуэхэм ящыщу тыншу къыпхуэмылъытэну уджкIэ дагъэгуфIащ.
- Ди гъэсэнхэм адыгэ нарт эпосыр къедгъэцIыхуныр, нартым я лIыгъэр щапхъэу къахуэтхьыныр, Сосрыкъуэ и лIыхъужьыгъэр зыхедгъэщIэныр, абы къыдэкIуэуи ди бзэр зэрыкъулейр я фIэщ тщIыныр - мыхэрат теплъэгъуэр щыдгъэхьэзырым къалэну зыхуэдгъэувыжар. Дауи, IуэрыIуатэм цIыху егъасэ - мыр лъэпкъым ди хъугъуэфIыгъуэшхуэщ. Къыхэзгъэщынут: цIыкIухэм ядэлэжьэн щыщIэддзам языныкъуэ сабийхэм анэдэлъхубзэр ирикъуу ящIэртэкъым, усэхэр е тхыгъэ пычыгъуэхэр зэрагъэщIэн хуэдизу ягъэшэрыуэртэкъым. Абы и лъэныкъуэкIэ гугъу дадехьащ. Нобэ гу зэрылъыфтащи, ди сабийхэм я адыгэбзэр къабзэщ. Ди гупым урыси, уеблэмэ куржыи хэтщ. Абыхэми зыкъагъэлъэгъуащ, адыгэ фащэр екIуу ящыгъыу, - жиIащ Къашыргъэ ФатIимэ.
- Пэжщ, адыгэбзэкIэ шэрыуэу, къабзэу ди гъэсэнхэр къэдгъэпсэлъэн, пшыналъэм щыщ пычыгъуэхэр едгъэщIэн папщIэ Iэмал дылъыхъуащ, гугъу зедгъэхьащ. Жагъуэ зэрыхъунщи, ди зэманым адыгэбзэм адыгэ унагъуэ псоми щрипсалъэркъым. АнэдэлъхубзэкIэ таурыхъ гъэщIэгъуэнхэм дакъыхуеджащ, адыгэ хабзэм хиубыдэхэм дахутепсэлъхьащ, нарт пшыналъэхэм гъэщIэгъуэну хэтхэм гу лъедгъэтащ. Мис, иджы ди гугъуехьым и жылэр тлъэгъуати, дэри дамэ къыттекIащ, - дыщIигъуащ Альбинэ.
Сабий садым и унафэщI Иуан Агнессэ жиIащ бзэм и Iуэхум теухуауэ нэхъыбэу адэ-анэхэм ядэлэжьэн хуей зэрыхъур, сыту жыпIэмэ, щIэблэм анэдэлъхубзэ яIурылъынымкIэ ахэращ нэхъыщхьэу жэуап зыхьыр.
- Адыгэбзэм и Iуэхур хэплъэгъуэ зэрыхъур долъагъури, ди гъэсэнхэм гулъытэ яхудощI абы теухуауэ. Адэ-анэхэм допсалъэ, долъэIу, унэм я бзэкIэ къыщепсэлъэну, цIыкIухэр зыщIэупщIэIамэ, анэдэлъхубзэкIэ жэуап къратыжыну, - къыхигъэщащ абы.
ХьэщIэхэм
я псалъэ
Шэджэм щIыналъэ администрацэм егъэджэныгъэмкIэ и управленэм и IэщIагъэлI нэхъыщхьэ Щыхьмырзэ ФатIимэ сабий садым и унафэщIым, гъэсакIуэхэм фIыщIэ яхуищIащ зыпэрыт IэнатIэм псэкIэ зэрыбгъэдэтым папщIэ, къыхигъэщащ семинарым хуагъэхьэзыра дерсхэр, теплъэгъуэр, къафэхэмрэ уэрэдхэмрэ, утыку итыкIэр щапхъэу ягъэлъагъуэм зэрыхуэдэр.
- «Сосрыкъуэ мафIэ къызэрихьыжам» гукIи псэкIи щыджэгуащ фи лIыхъужь цIыкIухэр. Сэ згъэщIэгъуащ сабийхэм я гурыхуагъэр, сыту жыпIэмэ, псоми гу лъыттащ усэрэ едзыгъуэу, прозэм щыщ пычыгъуэу абыхэм зэрагъэщIэфар я ныбжьымкIэ тIэкIу зэрыгугъур. Актёр Iэзагъэм щыхуагъасэу пIэрэ мыбы жысIэу сыщIэупщIащ, уеблэмэ. «Хьэуэ» къызжаIэщ. Ауэ щыхъукIэ, а псор зи фIыщIэр сабий садым и лэжьакIуэ гумызагъэхэрщ. ФIыщIэ ин фхузощI анэдэлъхубзэр сабийхэм яIурылъыным, щэнхабзэр ящIэным гулъытэ зэрыхуэфщIым папщIэ, - жиIащ Шэджэм щIыналъэм и профсоюз комитетым и унафэщI Энеевэ Лизэ.
- Нобэ гъэсакIуэхэм я зэфIэкIым, сабийхэм я Iущагъым дыгушхуэу дыкIэлъыплъащ. Псэр ягъэтыншу зыкъагъэлъэгъуащ сабийхэм: хэкупсагъэм щыхуагъэса дерсми, нарт пшыналъэм и теплъэгъуэми, уэрэд жыIэнми, къэфэнми. Тхьэм нэхъри фригъэфIакIуэ! - захуигъэзащ гъэсакIуэхэм «Ручеёк» сабий садым и унафэщI КIэрэф Ларисэ.
ХьэщIэхэм жаIащ мызэ-мытIэу сабий садым игъэхьэзыра щIэныгъэ лэжьыгъи цIыкIухэр зыхэт Iуэхугъуэхэри зэралъэгъуар, абы папщIэ къагъэсэбэп Iэмалхэм сыт щыгъуи щIэщыгъуагъ зэрыхалъхьэр.
ГУГЪУЭТ Заремэ.