Пресс-конфернцэр щекIуэкI пэшым, щхьэж и унэм, лэжьапIэм щIэсу УФ-м и Президент Путин Владимир упщIэ езытахэм яхэтащ фронтым щыIэхэм я видео-зыхуэгъэзэныгъэри. Абыхэм къабгъэдэкI упщIэхэм жэуап щаритым къэрал унафэщIым жиIащ фронтыр километр мини 2-м зэрынэблагъэр, абы Iут псоми псори и чэзум зэраIэрымыхьэм зэрыщыгъуазэр.  Ар къызыхэкIыр зауэ губгъуэм ирагъашэ Iэмэпсымэ псори ди къэралым къызэрыщыщIамыгъэкIыр, ахэр нэгъуэщI щIыпIэхэм кърырагъэшын хуей зэрыхъур, абы зэман зэрытекIуадэр къыхигъэщащ къэрал Iэтащхьэм. Мы Iуэхум къэралри, ЗыхъумэжыныгъэмкIэ министерствэри, промышленностри зэрытелажьэр дыщIигъуащ.  

Ц1ыхубэ фронтым нобэ лэжьыгъэшхуэ зэфIегъэкI зауэлIхэм защIэгъэкъуэнымкIэ. Дзэ къулыкъум пэрытхэми абыхэм ядэIэпыкъухэми фIыщIэ ин яхуищIащ Путин Владимир. Иджыри къыздэсым сом меларди 10 халъхьащ цIыхухэм дзэ Iуэху хэхам. «Къэралым иIэщ а Iуэхум тригъэкIуэдэн, абы и экономикэм зеужь. Ауэ цIыхубэм ахъшэ зэрызэхалъхьэр, сэлэтхэм цылъэпэдхэр зэрыхуащIыр уасэншэщ. Письмо мелуани 3 сабийхэм хуатхащ фронтым Iутхэм. Ар зимыуасэ щыIэкъым…», - жиIащ Путиным.

Зауэм щыIахэми, абы ныкъуэдыкъуэ щыхъуахэми, хэкIуэдахэми папщIэ къэралым къызэригъэпэща дэIэпыкъуныгъэхэр псоми зэралъысынур, «Хэкум и хъумакIуэхэр» фондыр дэтхэнэ зауэлIми и Iуэхур и чэзум зэфIигъэкIыу лажьэу зэрызэтраублэнур, зэрырагъэфIэкIуэнур дыщIигъуащ Президентым и псалъэхэм.

НЭЩIЭПЫДЖЭ Замирэ.