Мэлбахъуэ Тимборэ и цIэр зезыхьэ Лъэпкъ библиотекэм и лъахэхутэ къудамэм зэхыхьэ гъэщIэгъуэн щекIуэкIащ. «Гум и макъ» цIэр зезыхьэ клубым хэтхэм «Хэкум и жьыху» зыфIаща зэхуэсыр ирырагъэхьэлIащ Адыгэхэм я махуэм. ШколакIуэхэр, абыхэм я егъэджакIуэхэр, тхакIуэхэр зыхэта зэIущIэр къызэзыгъэпэщари езыгъэкIуэкIари а къудамэм и лэжьакIуэ нэхъыжь Безыр Ленэщ.
КъызэрекIуэкIар
ЗэIущIэр зэрызэхашэм и хъыбар щызэхэсхым, къыхэздзат: «Дэри дынакIуэ хъуну, Ленэ?» - жысIэри. «Сыт щIэмыхъунур? Фэ фхуэдэкъэ тхуэмыгъуэтыр? Дынывэджэну ди дзэр шыуэ арат, хущIэмыхьэмэ жытIэу», - къыдитыжащ жэуап.
«Арамэ, дынокIуэ! - жыс-Iащ сэри. - УсакIуэ, жылагъуэ лэжьакIуэ, хьэрычэтыщIэ Къанкъул Раи нызоджэ».
«Анфиси жетIащи, къытхыхьэну догугъэ». «АтIэ, фIыкъэ ар!» - сыгуфIащ сэри, зи гугъу ищIыр ди лэжьэгъу, «Хьэтхэр» романыр зи IэдакъэщIэкI Фырэ Анфисэу зэрыщытыр къыщысщIэм.
«Сытми, мис иджы и щIэдзэгъуэкъэ!» хужыпIэну, дыщIыхьащ Анфисэрэ сэрэ зи гугъу сщIы библиотекэм.
Зэхуэсыр щекIуэкIыну пэшым дызэрыщIэплъэу, нэплъэгъуэу дызыIущIар гъэщIэгъуэнщ: сатыритI-щыуэ щиувыкIа школакIуэ гупым хэтхэр зыкърахрэ зэщыгуфIыкIыжу ижьымкIэ щытщ. ТхуэзанщIэу, тхылъ дапхъэхэм деж (иужьым щыхьэт дызэрытехъуамкIэ, ахэр Адыгэхэм я махуэм хузэхагъэуват) Къанкъул Рае щысщ, тIысыпIэ хъарзынэ къызэрыхуагъэфэщар нэрылъагъурэ къыщIыхьэхэм къахуэтэдж-етIысэхыжу.
СэмэгумкIэ дыплъэмэ, а псоми къебэкIыжу, школакIуэ гупышхуэ, къыпхуэмыбжын хуэдизу, щызэхэсщ, къезышэжьа балигъхэри я гъусэу.
ЗэхэшакIуэр утыку итыххэти, дыкъызэрилъагъуу Къанкъулыр здэщыIэмкIэ дишащ. Иджы щыри дызэбгъэдэст, адыгэ Iэнэ хъурей цIыкIур ди пащхьэ къитрэ ди Iэм IэщIэлъхэр тетлъхьэ хъууэ.
Зытраухуа зэманым зэрыфIигъэкIа щымыIэу, Безыр Ленэ зэIущIэм щIригъэдзащ.
И егъэкIуэкIыкIэм нэхъыщхьэу хэлъар пэшым дыщыщIыхьэм сэмэгумкIэ щиувыкIа, япэу дызыIуплъа школакIуэ гупым хэтхэм, щхьэж зэрызыхуигъэхьэзыра и лъэныкъуэкIэ, и зэфIэкI къызэрыщигъэлъэгъуарщ. Зи ныбжькIэ зэхуэмыдэ сабий-хэр уси къеджащ, уэрэди жаIащ, 17 - 18 лIэщIыгъуэхэм псэуа адыгэ гупсысакIуэшхуэ Къэзано-къуэ Жэбагъы и псалъэ Iущхэри зэхыдагъэхащ. КъинэмыщIауэ, утыкум тIурытIуи я закъуэуи зыщызыгъэзахэри къахэкIащ, адыгэ фащэ екIукIэ зэщыхуэпыкIарэ къэфэкIэ дахи дагъэлъа- гъуу.
Сытми, езы цIыкIухэми я зыкъэгъэлъэгъуэкIэм кIуэ пэтми нэхъ удрагъэхьэхыу, Iэсэлъасагъэ зэрахэлъыр къыдагъэлъагъуу утыкур ягъэбжьыфIащ, пэшым щызэхуэсахэм ди нэжэгужагъэми хэпщIыкIыу къыхагъэхъуащ.
А махуэм зи зэфIэкI зыгъэлъэгъуа школакIуэхэм гуп зэхэшэу яIар мыбы хуэдэ Iуэхухэм зэрехъулIэмкIэ куэдым фIы и лъэныкъуэкIэ къацIыхуа, Налшык дэт курыт школ №13-м адыгэбзэр щезыгъэдж ДыщэкI Сонящ. А бзылъхугъэр а махуэми зэрыхузэфIэкIкIэ кIэлъыплъащ и нэIэ зытет цIыкIухэр утыкум зэгъэкIуауэ зэрыщызэдекIуэкIам. ЩIамыдзэ ипи, щызэпагъэухэм дежи, щIызэхыхьа Iуэхум - Адыгэхэм я махуэм - хуэгъэзауэ псалъэ дахэ зэрыщыжиIари къыхэгъэщыпхъэу къыдолъытэ. ЩIэсахэм тщыщу зыгуэр къыщыпсалъэкIэ, пэшышхуэм бадзэ щымыдымым хуэдэти, ари дызыгъэгуфIэт…
Ди псэлъэгъухэр
ЗэIущIэм зэрызыхуагъэхьэзыра щIыкIэм теухуауэ псалъитI-щы къыджиIэну делъэIуащ абы и зэхэшакIуэ Безыр Ленэ:
- Нобэ дызыхэвгъэплъам щIэдзапIэ хуэхъуам и гугъу къытхуэщIыт.
- Япэхэми хуэдэу, ноби ди деж къэкIуащ Налшык дэт курыт школ №11, 13, 15-хэм щеджэ цIыкIухэмрэ абыхэм я гъэсакIуэ-егъэджакIуэхэмрэ. - Адыгэхэм я махуэм иредгъэхьэлIа зэхыхьэм, фэри гу зэрылъыфтащи, ди лъэпкъым щыщу дунейпсо щэнхабзэм, щIэныгъэм, гъащIэм и унэтIыныгъэ зэмылIэужьыгъуэхэм хэлъхьэныгъэфI хуэзыщIахэм я гугъу щытщIащ, ди щэнхабзэм, тхыдэм ехьэлIа напэкIуэцIхэми дыщытепсэлъыхьащ.
- Пэжщ, Ленэ. А Iуэхугъуэхэм ятеухуа дапхъэхэр зэрызэхэвгъэува щIыкIэри догъэщIагъуэ.
- Адыгэбзэмрэ адыгэ литературэмрэ фIыуэ зылъагъухэм папщIэ «Гум и макъ» зыфIэтща клубым хэтхэм Адыгэхэм ди махуэм хуэдгъэфэща дапхъэхэр къызэдгъэпэщащ, еджакIуэ цIыкIухэми, студентхэми, арыххэу ди деж къыщIыхьэхэми зрагъэлъагъуфын хуэдэу. «Адыгэхэр: дыгъуасэ, нобэ, пщэдей» зыфIэтща тегъэувапIэр Iыхьищу: «Къэрал, политикэ лэжьакIуэхэр», «Адыгэ тхакIуэхэр», «Щэнхабзэмрэ гъуазджэмрэ» псалъэхэмкIэ зэщхьэщытхащ. ЕтIуанэр «Лъэпкъым хуэфащэ бзылъхугъэ» жыхуиIэрщ. Ар дэ тедухуащ КъБР-м щIэныгъэхэмкIэ щIыхь зиIэ и лэжьакIуэ, филологие щIэныгъэхэмкIэ доктор, адыгэ узэщIакIуэхэм ятеухуа тхылъыр зи IэдакъэщIэкI Хьэщхъуэжь Рае къызэралъхурэ илъэс 90 зэрыхъуам. Ещанэ дапхъэр иредгъэхьэлIащ усакIуэ, литературэдж Iэзэ Къэжэр Хьэмид къызэралъхурэ илъэс 85-рэ зэрырикъуам. Интернетым къыщызэIутха напэкIуэцIми абыхэм ятедухуа материалхэр къитлъхьащ.
ЕкIуэкIа Iуэхур къызэрыщыхъуам тедгъэпсэлъыхьыну дэ зэIущIэ нэужьым зыхуэдгъэзащ «Шыхулъагъуэ» литературэ зэгухьэныгъэм хэт, усакIуэ, жылагъуэ лэжьакIуэ, хьэрычэтыщIэ Къанкъул Рае:
- Мы IуэхущIапIэм щызэхашэ зэхыхьэхэм ящыщу илъэс ныкъуэ ипэкIэ ирагъэкIуэкIам, Адыгэ тхыбзэм и махуэм ирырагъэхьэлIам, уэри сэри дызэдыхэтат. Иджырейм и зэхэшэкIэр адрейм сыткIэ къыщхьэщыкIыу къэплъытэрэ?
- Нобэрейр нэхъри нэхъ зэгъэкIуауэ ирагъэкIуэкIауэ собж. Сыт щхьэкIэ жыпIэмэ, мыбдежым цIыкIухэр усэ къыщеджащ, псалъэжьхэр, псынщIэрыпсалъэхэр, уэрэдхэр щыжаIащ, сабийхэм я зэфIэкIыр, бзэм зэрыхуэшэрыуэр къыщагъэлъэгъуащ. ЕгъэджакIуэхэри узэщIарэ гъэхуауэ сабийхэм зэрадэлажьэм нэхъри щыхьэт дытехъуащ.
- И егъэкIуэкIыкIэр нэхъри егъэфIэкIуэным хуэгъэзауэ сыт дыщIагъужамэ нэхъ къэпщтэнт, Рае?
- Зыкъыщызыгъэлъэгъуахэм я утыку итыкIэр, адыгэбзэм я гъэIукIэр къазэрыщыхъуа-сытхэм я гугъу щащIу, адрей курыт еджапIэхэм къикIа цIыкIухэри къыщызгъэпсэлъэнт. Дауэ хъуми, зэхыхьэм и зэхэшэкIэм сыщыгуфIыкIащ. И къызэгъэпэщакIуэри а Iуэхум зэрыхуэIэзэр нэхъри ди фIэщ хъуащ. Адыгэбзэм езы цIыкIухэр зэрыхущытыр, ар нэхъыфIу зэрызрагъэщIэным зэрыхущIэкъур дагъэлъэгъуащ...
Зыгъэхьэзырар
КЪУМАХУЭ Аслъэнщ.