Быйыл Къабарты-Малкъарны эллерини школларында «Земский учитель» программагъа кёре, физика, математика, орус эм ингилиз тилледен устазла урунургъа онг табарыкъдыла.
- Программа былтырдан бери ишлейди, быйыл аны хайыры бла жети устаз Элбрус, Чегем, Май, Прохладна, Терк эм Зольск районлада урунурукъдула,- дейди КъМР-ни жарыкъландырыу, илму эмда жаш тёлюню ишлери жаны бла министрини орунбасары Екатерина Мисостова.
Педагогланы Огъары Бахсанда, Сармаково, Прималка, Жангы Хамидие элледе да сакълайдыла. Екатерина Мисостова айтханнга кёре, бу айны онусунда конкурс башланнганды, алай алыкъа киши заявка бермегенди. Былтыр анга 40-45 жыллары болгъан сегизеулен къатышханды. Аланы барысы да, ишге орналып, биришер миллион сом къоллу болгъандыла.
Эсге сала айтсакъ: «Земский учитель» программа РФ-ни Президентини башламчылыгъы бла былтыр «Билим бериу» миллет проектни чеклеринде ишлеп тебирегенди. Анга 55 жыллары толмагъан устазла къатышыргъа боллукъдула.
Магометланы Сулейман.
