Жылны ахырында, эсеплени чыгъарып, экономикада, социал бёлюмде, жамауат жашауда жетишимле болдургъанланы белгилеу иги тёреге айланнганды. КъМР-ни Парламентинде болгъан къууанчлы жыйылыуда уа 70-ге жууукъ адам законла чыгъарыучу органны Сыйлы грамоталары, спикерни Ыразылыкъ къагъытлары  бла саугъаланнгандыла.

Спикер Татьяна Егорова, жыйылгъанланы алгъышлай, къырал саугъала аланы ишчи жерлеринде жетишимлерини, республиканы айнытыуда къыйынларыны белгиси болгъанын чертгенди. «Бизни борчубуз, муратларыбыз да бирдиле – туугъан журтубузну айнытыу, аны къолайлы регионланы санына чыгъарыу. Анга уа барыбыз да бир ниетли  болсакъ жетишаллыкъбыз: хар бирибиз да, жууаплылыкъны ангылап, ишлеген жерибизде къолдан келгенни этсек. Бюгюн саугъаланнганла уа Къабарты-Малкъарны келир кюню ючюн къайгъыргъан, сайлагъан усталыкъларына кертичи, жетишимлеге итиннген адамла болгъанларына ишексизме», - дегенди ол.

Татьяна Борисовна законла чыгъарыучу органны Сыйлы грамотасы  бла экономикада, эл мюлкде, промышленностьда, туризмде ишлегенле белгиленнгенлерин чертгенди. Спикер алгъыш сёзюнде медицинада уруннганланы юслеринден айырып айтханды.«Жукъгъан ауруу жайылгъан кезиуде халкъ бу усталыкъны сайлагъанлагъа къалай уллу ауурлукъ жетгенин бютюнда ангылагъанды. Аланы профессионал билимлерини, къайгъырыулукъларыны, халаллыкъларыны хайырындан кёпле  аурууну хорлагъандыла, жашау тириликлерин сакълаялгъандыла», - дегенди спикер.

Къабарты-Малкъарны айнытыуда, ёсюп келген тёлюню юйретиуде устазланы къыйыны уллу болгъанын да чертгенди Татьяна Борисовна. Культурада ишлегенле уа келир тёлюлеге республиканы халкъларыны хазналарын сакълагъанларын, тренерле бла спортчула, Къабарты-Малкъарны атын айтдырып, тюрлю-тюрлю даражалы эришиуледе жетишимле болдургъанларын да  эсгертгенди ол.

Ызы бла саугъалау башланнганды. Алай бла КъМР-ни профсоюзларыны федерациясыны башчысы, Парламентни депутаты Фатимат Амшокова парламентаризмни айнытыуда жетишимлери ючюн РФ-ни Федерация Советини башчысыны Ыразылыкъ письмосу бла белгиленнгенди.

Парламентни Сыйлы грамотасына тийишли болгъанланы арасында Аллергология эм иммунология араны врачы Мечиланы Люба да барды. КъМР-ни курортла эм туризм министри Мурат Шогенцуков да саугъаланнганды ол кюн. Законланы жарашдырыуда жетишимлери, къырал власть органланы ишлерин жалчытыуда къыйынлары ючюн Парламентни Аппаратыны башчысыны орунбасары – право жаны бла  управленияны таматасы Аслан Хамуков бла къурау эм финансла жаны бла управленияны къурау-аналитика иш жаны бла  бёлюмюню башчысы Марина Абазова КъМР-ни Правительствосуну Ыразылыкъ письмусу бла саугъаланнгандыла.

Къууанчлы жыйылыу бирге суратха тюшюу бла бошалгъанды.

Тикаланы Фатима.