ИлъэсыщIэм ипэ къихуэу КъБКъУ-м и залышхуэм концерт гукъи­нэжкIэ щы­зэхуащIыжащ «Амикс» ансамблым и унафэщI Къул Амиррэ Ланэрэ къызэрагъэпэща «Клуб за 30» проектым и япэ Iыхьэр. 

Зи ныбжьыр илъэс 30-м щIигъуа, а IэщIагъэм хуе­мыджами, езыр-езыру уэ­рэд жызыIэну зыфIэфIхэм папщIэ мы Iуэхур къызэрагъэпэщауэ арат.
Дэтхэнэ зы уэрэджыIа­кIуэри Iэгуауэ­шхуэкIэ утыкум ирагъэблэгъащ, саугъэтхэр иратащ. КIэух концертым псоми зэдыжаIащ «ДДТ» гупым ягъэзащIэ, куэдым фIыуэ ялъэгъуа «Это всё, что останется ­после меня» уэрэдыр. 
- Ди гъэсэнхэм ящыщ гуэрым и цIэр къыхэбгъэ­щхьэхукIыну тыншкъым, ауэ утыкум нэхъ хуэхьэзыру гу зылъыстахэм ящыщщ творческэ зэпеуэхэм мызэ-мытIэу пашэ щыхъуа Ахъмэт Мадинэ. Апхуэдэу нэхъ гу­къинэжу зыкъагъэлъэгъуащ Тату Мухьэмэд, Ерчэн Мурат, ВэрылI Каринэ сымэ. И цIэ къисIуэну сыхуейщ клубым хэтхэм я нэхъыжь, концертым жыджэру зыкъыщызыгъэлъэгъуа Черновэ Алёнэ, - жиIащ КъБР-м щIыхь зиIэ и артисткэ Къул Ланэ. - Клубым къекIуа­лIэхэм макъамэ гъуазджэм и щэхухэм адэкIи зыхагъэ­гъуэзэну, я зэфIэкIхэм хагъэхъуэну, проектыщIэхэм тегушхуэну я хъуэпсапIэщ. Абы и лъэныкъуэкIэ Амир иджыри щIэ гуэрхэр къыхилъхьэну дыщогугъ.
КъБР-м щэнхабзэмкIэ щIыхь зиIэ и лэжьакIуэ Къул Амир илъэс зыбжанэ хъуауэ и мурадт макъамэр фIыуэ зылъагъу, ауэ а IэщIагъэм хуемыджахэм я клуб къызэригъэпэщыну.
- Си щхьэкIэ уэрэд жы­Iэным теухуа си хъуэпсапIэр къызэхъулIакъым, ауэ абы­кIэ зэ­фIэкI зиIэ сабийхэмрэ щIалэгъуалэмрэ садола­жьэ, - жеIэ Амир. - НэгъуэщI IэнатIэ пэрыт си ныбжьэгъу­хэм, цIыхугъэхэм мызэ-мытIэу жаIэу зэхэсхат утыку ихьэ­ныр я хъуэпсапIэу зэры­щытар, иджы караоке клубхэм уэрэд щыжаIэу зэры­зытрагъэур. Аращ «Клуб за 30» проектыр къыщIыхэслъхьар. 
Гупыр «Амикс» студием тхьэмахуэм щэ щызэхуос. Къулхэ Амиррэ Ланэрэ нэ­мыщI ахэр сценэ итыкIэм, уэрэд жыIэкIэм хуагъасэ ЩоджэнцIыкIу Алий и цIэр зезыхьэ Къэбэрдей къэрал драмэ театрым и актёр Тэмазэ Лиуан, КъБР-м щIыхь зиIэ и артистхэу Дым Елдар, Шал Хъусен, КъБР-м щIыхь зиIэ и лэжьакIуэ Романихинэ Иринэ сымэ.
Проектым и кIэух концерт гукъинэжым иужькIэ клу­бым къекIуалIэхэм я бжыгъэм зэрыхэхъуэнум шэч хэлъкъым. Пшыхьыр ягъэ­дэхащ КъБР-м щэнхабзэмкIэ щIыхь зиIэ и лэжьакIуэ Романихинэ Иринэ зи художественнэ унафэщI «Калисто», эстрадэ къафэхэмкIэ «Арабеск» (художественнэ унафэщIыр УФ-м егъэджэ­ныгъэмкIэ щIыхь зиIэ и лэжьакIуэ Добросердовэ Лилиещ) ансамблхэм.
УФ-м и Къэрал Думэм и депутат Останинэ Нинэ «100 лет ВЛКСМ» орденыр яхуигъэфэщащ Къулхэ Амиррэ Ланэрэ, Романихинэ Иринэ, комсомол жыджэру зэры­щы­там, творческэ лэжьыгъэфIхэр къазэрехъулIэм папщIэ.
ТЕКIУЖЬ  Заретэ.