Налшык Профсоюзхэм ЩэнхабзэмкIэ я унэм дыгъэгъазэм и 14 - 15-хэм гуапэу къыщрагъэблэгъащ Адыгэ Республикэм цIыхубэ къафэхэмкIэ и «Налмэс» къэрал академическэ ансамблыр икIи концерт гукъинэж щитащ. Ансамбль цIэрыIуэр илъэс 85-рэ зэрырикъум и щIыхькIэ Кавказ Ищхъэрэм и къалэхэм щата программэ телъыджэхэм язщ пшыхь щIэщыгъуэр.
Дуней псом щыцIэрыIуэ, дэнэ щIыпIи щыпсэу адыгэхэм фIыуэ ялъагъу «Налмэс» ансамблыр республикэм зэрыщыхьэщIа махуитIым ита концертхэм хагъэхьащ гупым и художественнэ унафэщI икIи и балетмейстер нэхъыщхьэ Хъуэжей Аслъэн и лэжьыгъэ телъыджэхэмрэ Кавказ Ищхъэрэм фIыуэ къыщацIыху балетмейстер Къул Амырбий нэхъапэIуэкIэ игъэувауэ щыта къафэхэмрэ.
Зи фащэкIи, зыIыгъыкIэкIи, утыку итыкIэкIи дагъуэншэу зыкъэзыгъэлъагъуэ щIалэхэмрэ пщащэхэмрэ лъэпкъ щэнхабзэм и дахагъэр гъунэгъу щIыналъэхэми хамэ къэралхэми нахьэсащ. Ансамблым и дэтхэнэ къафэ лIэужьыгъуэми лъэпкъым и хабзэ, щэнхабзэ, IуэрыIуатэ хъугъуэфIыгъуэхэр хыболъагъуэ. Апхуэдэщ илъэс пщIы бжыгъэкIэрэ гупым иригъэфIакIуэу игъэзащIэ лъапэрисэ, ислъэмей, удж къафэхэр. Псом хуэмыдэу пшыхьыр щIэщыгъуэ ищIащ ансамблым и программэм мазэ зыбжанэ ипэкIэ хагъэхьа «Налмэс-налкъут» хореографие новеллэм. Абы къафэм и бзэмкIэ къыщыгъэлъэгъуащ лъэпкъым и зэкъуэтыныгъэр, и щыIэкIэмрэ хабзэ дахэхэмрэ. Гъуазджэм и лъагапIэм нэса «Налмэсыр» къэфакIуэ ныбжьыщIэхэм я гъуэгугъэлъагъуэщ.
ЦIыхубэ къафэхэм я дахагъэмрэ лъапIагъэмрэ зымыгъэкIуэду илъэс 85-рэ хъуауэ утыку ит, ди лъэпкъ къафэхэмкIэ адыгэр дуней псом къезыгъэцIыхуа ансамблым цIыхухэмрэ къэралхэмрэ зэпащIэ. СыхьэтитIым нэскIэ екIуэкIа концертым къэфакIуэхэм щагъэлъэгъуа дахагъэ мыкIуэщIым еплъахэм къарита гукъыдэжымрэ дэрэжэгъуэмрэ къэIуэтэжыгъуейщ! Абы и щыхьэтт «Налмэсым» хуаIэта Iэгуауэ мыухыжыр!
ТЕКIУЖЬ Заретэ.
