Бу кюнледе республикада ишлерин бардыргъан коммерциялы болмагъан организацияланы кезиулю граждан форумлары озгъанды. Малкъар драма театрны мекямында ётгенди, алай анга онлайн халда дагъыда КъМР-ни Граждан обществону институтлары бла байламлыкъла жюрютюу эмда миллетлени ишлери жаны бла министерство, Халкъла аралы черкес ассоциация, бизнесменлени къаууму къошулгъандыла.
Форумда къырал властьланы, бизнесни эмда коммерциялы болмагъан организацияланы бирге ишлеулерин бютюн тап къурауну амаллары сюзюлгендиле.
Анга онлайн халда КъМР-ни Башчысы Казбек Коков да къатышханды. Анда сёлеше, ол коммерциялы болмагъан организацияла къыралны бла жамауатны бирге байлагъан кюч болгъанын чертгенди. Граждан обществону къурауда да аланы магъаналары уллуду дегенди. «Къабарты-Малкъарда граждан общество къуралгъанды, андан жашагъанланы кеслерини инсанлыкъ ызлары барды. Ол а власть органланы бла жамауат биригиулени кёпжыллыкъ ишлерини хайырындан болгъанды. Анга 2005 жылда болгъан ишле да шагъатлыкъ этедиле. Ол заманда Къабарты-Малкъарны жамауаты террористлеге къажау къаты сюелгенди»,- деп къошханды Казбек Коков.
Ол республиканы жюзжыллыкъ юбилейин магъаналы ишледен бирине санагъанды. Россейни къауумунда къыраллыкъны алыу халкъларыбызны къадарларын тамыры бла тюрлендиргенин, уллу онгла да бергенин чертип айтханды. «Ма ол сайлауубузну хайырындан сакълаялгъандыла халкъларыбыз тиллерин, адет-тёрелерин, миллет энчиликлерин, андан ары айныргъа онгларын да… Кёп миллетлени бешинчи тёлюсю жашайды бюгюнлюкде Къабарты-Малкъарда. Он мингле бла адамларыбызны къадарлары кёп миллетли юйюрледе байлашыпдыла. Аланы къуру жашагъан жерлери угъай, адет-тёрелерини бла тарыхларыны да бирге жууукъ болгъанлары бирикдиреди. Бизни халкъларыбызны ма ол бирлигин бузаргъа кишини эркинлиги жокъду»,- деп чертгенди республиканы оноучусу.
Ол ниет-адеп къылыкъ байлыкъларыбызны сакъларгъа, ёсюп келген тёлюню алагъа таянып юйретирге чакъыргъанды. Коммерциялы болмагъан организацияланы юслеринден айтханда уа, алагъа федерал эмда регион даражада да болушлукъ этиллигине ышандыргъанды. Кеси да къуралыулу ишле бла кюрешгенлеге себеплик этерге хазыр болгъанын айтханды. «Жамауат организацияла, къырал бла бирге бардырып ишлерин, халкъны бирикдираллыкъларына, республиканы айныууна да уллу себеплик этериклерине ишексизме»,-дегенди Казбек Коков.
Жыйылыуда республикада быйылны июнь айына 890 жамауат организация болгъаны билдирилгенди. Алагъа жамауат, дин, коммерциялы фондла, профсоюз биригиуле, политика партияла, коммерциялы болмагъан организацияла киредиле.
Форумда докладла бла «Къабарты-Малкъар Республиканы профсоюз организацияларыны биригиую» Союзну председатели Фатимат Амшокова, КъМР-ни жарыкъландырыу, илму эмда жаш тёлюню ишлери жаны бла министрини орунбасары Мокъаланы Ачемез, «Къатынгдагъынга болуш» жамауат организацияны таматасы Алим Сижажев, КъМР-ни саулукъ сакълау министрини орунбасары Заурбек Батыров, Орус килисаны келечиси Константин Осипов, «Социал айныуну институтлары» Ассоциацияны директору Роман Егоров сёлешгендиле.
Форумну ишини юсюнден оюмларын башхала да айтхандыла. КъМР-ни граждан обществону институтлары бла байламлыкъла жюрютюу эмда миллетлени ишлери жаны бла министри Анзор Курашинов а форум жаланда коммерциялы болмагъан организациялагъа хайырлы болуу бла чекленип къалмай, власть органлагъа, бизнес сообществогъа да магъанасы уллу боллугъуна ышаннганын билдиргенди.
Холаланы Марзият.
