Шимал-Кавказ федерал округну регионларында «Муратлагъа жетдирген назы терекчик» деген битеуроссей жандауурлукъ акция ётеди. Ол «Россей – онгланы къыралы» президент башламчылыкъгъа кирген «Мени бла бирге мурат эт» деген проектни чеклеринде къуралгъанды. Анга Россей Федерацияны Президентини Шимал-Кавказ федерал округда толу эркинликли келечиси Юрий Чайка да къатышханды.
Къыралны башчысыны келечиси жангы 2022 жылны аллында Черек райондан алтыжыллыкъ Эндрейланы Даниялны саугъалагъанды. Ол не сюйгенин а Юрий Чайка назы терекде тагъылгъан письмодан билгенди.
Кёп сабийли юйюрде ёсген жашчыкъ велосипедге эрттеден термилип тургъанды, проектге да ол муратына жетер ючюн къатышханды.
-Жангы жыл – ахшы умутла толуучу байрамды. Даниялны да бу огъурлу ишни хайырындан мураты толлукъду. Биз да 2022 жыл бла кёп умутларыбызны байламлы этебиз. Баш муратыбыз а – Шимал Кавказда адамла бютюн иги жашарча этиудю,- деп белгилегенди полпред.
Даниялны эгечлери да къуру къалмагъандыла, ала да сыйлы саугъала алгъандыла. Юрий Чайканы атындан аланы Къабарты-Малкъар Республикада баш федерал инспектор Тимур Макоев бергенди.