Урысей Федерацэм и Журналистхэм я зэгухьэныгъэм и жэрдэмкIэ I99I гъэм ди къэралым щагъэувауэ щытащ дыгъэгъазэм и I5-р зи къалэн зыгъэзащIэу хэкIуэда журналистхэм я фэеплъ махуэу.
Мамырыгъэмрэ захуагъэмрэ зи псэр щIэзытахэр ягу къагъэкIыжыну япэ дыдэу журналист хэкIуэдахэм я Iыхьлыхэмрэ лэжьэгъухэмрэ зэхуэсауэ щытащ 1991 гъэм дыгъэгъазэм и II-м. Ар къыщыхъуар I99I гъэм и фокIадэ мазэм урысей телевиденэм и корресподент Ногин Викторрэ оператор Куренной Геннадийрэ Югославием щаукIэ нэужьщ.
Я къалэныр ягъэзащIэу, пэжыр цIыхухэм я деж нахьэсыным папщIэ зи гъащIэр зыта журналистхэм я фэеплъыр хъумэным хуэунэтIауэ илъэс къэс зэIущIэшхуэхэмрэ дунейпсо концеренцэхэмрэ къызэрагъэпэщ. Лэжьэгъухэм, Iыхьлыхэм, ныбжьэгъухэм ягу къагъэкIыж зэщIэхъееныгъэ щекIуэкI щIыпIэхэми мамыр гъащIэми зи псэр зытахэр.
Мамырыгъэмрэ захуагъэмрэ щIэбэну дунейм фIэкIуэдащ журналист цIэрыIуэ куэд. Абыхэм Iуэхугъуэ кърахьэжьахэм кърикIуэнкIэ хъуну фэбжьым и шынагъуэм IэщIагъэм и фIылъагъуныгъэр щытепщэрт.
Къэбэрдей-Балъкъэрым и Журналистхэм я зэгухьэныхьэныгъэм «КъБР-Медиа» ГКУ-мрэ Iуащхьэмахуэ куейм и администрацэмрэ дэщIыгъуу къызэригъэпэща щыгъуэ пэкIу дыгъэгъазэм и I5 Iуащхьэмахуэ куейм хыхьэ Терскол жылагъуэм щекIуэкIащ.
Жылагъуэм и лъагапIэхэм ящыщ зым щагъэува фэеплъ сыным деж щекIуэкIа зэхыхьэм хэтащ КъБР-м и Журналистхэм я зэгухьэныгъэм и унафэщI Шаваевэ Разият, Iуащхьэмахуэ куейм и администрацэм и Iэтащхьэм и къуэдзэ Улимбашев Арслан, щэнхабзэмкIэ, егъэджэныгъэмкIэ щIыналъэм и управленэхэм я лIыкIуэхэр, журналистхэр, Лъэпкъ гвардием къулыкъу щезыхьэкIхэр, школакIуэхэр, нэгъущIхэри.
- Хабзэ хъуауэ илъэс къэс Терскол дыщызэхуос зи къалэныр зыгъэзащIэу хэкIуэда ди лэжьэгъухэм я фэеплъыр тхъумэн папщIэ, - жиIащ Шаваевэ Разият. – Ди жагъуэ зэрыхъунщи, абыхэм я бжыгъэм илъэс къэс хохъуэ. Ди республикэм щыщу иужьрей илъэсхэм тфIэкIуэдащ Казиханов Тамерлан, Геккиев Казбек, КIуащ Тимур сымэ. Дунейм йохыж ди лэжьэгъу нэхъыжьхэри. Мы илъэсым къриубыдэу коронавирус узыфэ зэрыцIалэм ихьащ ди лэжьэгъу зыбжанэ.
Къызэхуэсахэм захуигъэзащ Лъэпкъ гвардием и сержант нэхъыжь Куканьковэ Валентинэ. - Нобэ дигу къыдогъэкIыж зи къалэныр езыхьэкIыу хэкIуэда журналистхэр. Апхуэдэ дыдэу дзэм къулъыкъу щызыщIэхэми зи псэр зыта я лэжьэгъухэм я фэеплъыр яхъумэ. ЩытыкIитIри зыр адрейм къызэрыкIэрыху щыIэкъым. ИкъукIэ мыхьэнэшхуэ зиIэщ илъэс къэс дыгъэгъэзэм и I5-м ирихьэлIэу къызэрагъэпэщ зэхуэсыр. Абыхэм я фэеплъыт тхъумэхукIэ ахэр ди гъусэщ, цIыхухэми ящыгъупщэнукъым.
Илъэс къэс фэеплъ сыным деж къыщызэхуэс журналистхэм, Iуэхугъуэр къыхэзыхьэ жэрдэмщIакIуэхэм Улимбашев Арслан фIыщIэ яхуищIащ.
Щыгъуэ пэкIум хэтахэм фэеплъ сыным удз гъэгъахэр тралъхьа иужь дакъикъэкIэ хуэщыгъуащ.

Жыласэ Замир.