КъМР-ни Башчысы Казбек Коков ишчи кенгеш бардыргъанды. Анда сёз республиканы келир жылгъа бюджетини юсюнден баргъанды. Жыйылыугъа КъМР-ни Правительствосуну Председатели Мусукланы Алий, КъМР-ни саулукъ сакълау министри Рустам Калибатов эмда КъМР-ни жарыкъландырыу, илму эмда жаш тёлюню ишлери жаны бла министри Анзор Езаов къатышхандыла. 
Республиканы бюджетини юсюнден законну  проекти КъМР-ни Парламентини къараууна берилгенди эмда биринчи окъулуудан ётгенди. Аны ёлчеми 46 миллиард сомда тохташханды. Экинчи окъулуугъа келир жылны бюджетине ахча къошаргъа белгиленеди. Мусукланы Алий билдиргеннге кёре, ол, школлагъа тынгылы ремонт этиуню шёндю жарашдырыла тургъан федерал программасына бёлюнюрюк ахчаны къошмай, 52 миллиард сомдан артыкъ боллукъду. Программагъа кёре, жууукъдагъы эки жылны ичинде республиканы 50 мектебин жангыртыргъа белгиленеди. 
Казбек Коков льготалары болгъанланы дарманла бла жалчытыу – социал жаны бла бек магъаналы ишледен бири болгъанын эсгертгенди. Келир жылны республикалы бюджетинде ол жумушну толтуруугъа 400 миллион сом къоратыргъа белгиленеди. КъМР-ни Башчысыны буйругъу бла анга дагъыда 200 миллион сом къошуллукъду. Жылны ичинде уа ол ахча  дагъыда 73 миллион сомгъа кёбейтилликди. 
Бюджетни юсюнден законнга кийирирге белгиленнген тюзетиулени арасында диабетни къыйын тюрлюсюнден ауругъан сабийлени энчи сканерле эмда къанны болумун тинтген сенсорла бла жалчытыу да барды. Аллай медицина керекле не федерал, не регион программалагъа кирмегенлери себепли, алагъа ахчаны республикалы бюджетден бёлюрге оноу этилгенди. Анга деп келир жыл 26 миллион сомдан артыкъ къоратыргъа белгиленеди.
Казбек Коков «Къабарты-Малкъар Республиканы 2022 жылгъа эмда 2023,2024   жылланы план кезиуюне республикалы бюджетини юсюнден» законну проектине этилген тюзетиулени КъМР-ни Парламентине жибергенди.