2021 жылны 17 ноябринде Къашхатауну жер-жерли самоуправление советини жыйылыуунда депутатла бирча къол кётюрюу бла посёлканы администрациясыны башчысыны къуллугъуна Къазийланы Анатолийни жашы Муратны айыргъандыла.
Мурат Анатольевич бизни бла ушагъында Къашхатауда федерал эм регион программала къалай толтурулгъанларын билдиргенди. Аланы араларында экология жаны бла «Таза суу», «Эллени айнытыу» федерал программала эм кёп башхалары бардыла.
-Мен бу ишге энди киргенме, туугъан жеримде жашауну бютюн иги этиу жаны бла умутларым кёпдюле, аны ючюн къолумдан келгенни аярыкъ тюйюлме. Проблемала къачан да болгъандыла, аланы чыгъа баргъанларына кёре кетерирге керекди. Аны ючюн район администрация, башха тийишли органла бла да байламлыкъда ишлерикбиз, - дейди ол.
Ол айтханнга кёре, суу бла элде уллу жарсыу бир заманда да болмагъанды, таза суу келгенлей турады. Къашхатау кенгере барады, аны къыбыла-кюнбатыш жанында жангы район къошулгъанды, анда суу бла газ бардыла, жангызда ток тартыргъа къалгъанды.
Жангы тийрени къуралгъаны мында жашагъанланы, бери кёчюп келгенлени саны ёсе баргъанын кёргюзтеди. Анда жерле жаш юйюрлеге, адамлагъа себеплик этиуню башха программасына киргенлеге берилгендиле.
- Къашхатауда жашагъанланы саны 7 мингнге жете келеди. Мында хауа ариуду, жылыды, жамауатыбыз огъурлуду, къонакъбайды, инфраструктурабыз да иги айныпды – Маданият арабыз жангыртылады, алгъаракълада шёндюгюлю излемлеге келишген физкультура-саулукъландырыу комплекс ачылгъанды. Къысхасы, адамгъа тынчлыкълы жашау этерге битеу онгла къуралгъандыла, - дейди Мурат.
Иш бла жалчытыуну юсюнден айтханда, ол, хар жердеча, Къашхатауда да бу жаны бла проблема болгъанын, алай бир жерде урунмагъан, къармашмагъан хазна адам къалмагъанын, малчылыкъ, бахча бла да кёпле кюрешгенлерин билдиргенди.
- Социал учрежденияла жетишедиле. Битеулю орта билим берген бир мектеп ишлейди, анда 800 сабий окъуйдула. Эки сабий сад да барды. Аланы биринде жангыртыу ишле бошала турадыла, ясли къауум да къуралады. Билим бериу учреждениялада гитчелеге ахшы болумла къуралгъандыла. Жангы районда да школ ишлерге мурат барды, - деп къошханды ушакъ нёгерим.
Ол айтханнга кёре, республиканы башчысыны буйругъуна тийишлиликде поликлиникагъа толу ремонт этиледи, аны башы жабылгъанды, ичинде да жангыртыу жумушла тамамланадыла. Юч аптюек бардыла, аладан бири федерал магъаналыды, экиси коммерциялыдыла.
Жаш юйюрлеге, жангызлай къалгъан абаданлагъа, къолайлары аз адамлагъа уллу эс бурулады. Талай кюн мындан алгъа районну жангы башчысыны оноуу бла болушлукъ излегенлеге, жангызда Къашхатауда угъай, районну башха эллеринде да, аш-азыгъы бла хуржунла юлешиннгендиле. Бу жаны бла ишни селейтмезге оноу барды.
Мурат Анатольевич адамла бла байламлыкъда ишлеригин да билдиреди: «Кабинетими эшиклери къачан да ачыкъдыла. Бир тюрлю жарсыу неда оюму бла келгенлени айтханларына тынгыларгъа хазырма. Жамауат бла не заманда да байламлыкъда турлукъма, мен кесим мында туугъанма, ёсгенме, адамларыбызны таныйма».
Ол 1984 жылда Къашхатауда туугъанды, 2006 жылда Къабарты-Малкъар къырал университетде (КъМКъУ) «Юриспруденция» жаны бла бийик билим алгъанды. 2016 жылда Москвада РФ-ни Президентинде Халкъ мюлк эм къырал службаны академиясын тауусханды, 2021 жылда уа Москваны О.Е. Кутафинни атын жюрютген юридический къырал университетине киргенди, анда медицина право жаны бла окъуйду.
Мурат 2006 жылдан бери Шимал Кавказны энергетика субъектлеринде юридический жаны бла ишлегенди, Къашхатауну орта школуну директоруну къоркъуусузлукъ жаны бла орунбасары, посёлканы администрациясыны башчысыны экинчиси болуп тургъанды. Почтаны бёлюмюне таматалыкъ этгенди, коммерциялы болмагъан «Шаг вперед» организацияны башчысыны орунбасарыны къуллугъун толтургъанды.
Ишин бет жарыкълы тамамлагъаны, Шимал Кавказда энергетиканы айнытыугъа уллу къыйын салгъаны ючюн кёп кере саугъаланнганды. Юйюрлюдю, юч сабийи барды.
