Къабарты-Малкъарны къан тамырлагъа бакъгъан арасы бла онкодиспансери 2022 жылгъа жангы компьютер эм магнит-резонанс томографла бла жалчытылынырыкъдыла. Аны юсюнден бизге КъМР-ни Саулукъ сакълау министерствосуну пресс-службасындан билдиргендиле.

Къан тамырлагъа бакъгъан арада бир жолгъа 128 срез этген  компьютер томограф салынырыкъды. Онкология диспансерде да  магнит-резонанс томограф ишлерикди. Алай бла  келир жылда жангы  оборудованияла  бла бийик технологиялы диагностика бардырыргъа онг табыллыкъды.

Аны бла бирге быйыл «Саулукъ сакълау» миллет проектге кёре, республиканы больницаларына иги кесек оборудование алыннганды. Ол санда шахарны 1-чи номерли клиника больницасында эм  онкодиспансерде  компьютер томографла салыннгандыла. Буруннгу жыл а республиканы клиника больницасына  (РДКБ) жангы МРТ келтирилгенди. Алай бла 2013 жылда къыралны саулукъ сакълау учрежденияларында КТ бла МРТ болмагъан эселе, бусагъатда жангы диагностика оборудование иги  кесек медицина учрежденияда  бардыла.

«Саулукъ сакълау» миллет проектге кёре, профильли ведомство 2019-2021 жыллада 12 компьютер рентген аппарат бла юч   магнит-резонанс томограф алгъанды.  Алай бла  бусагъатда РКБ- да  эки КТ эм бир МРТ ишлейдиле.   Андан сора да, Сабий больницада эки аппарат хайырланылады. Компьютер рентген томографла Нальчикни 1-чи, 2-чи номерли, районла аралы кёп профильли медицина арада эм  туберкулёз, онкология диспансерледе, перинатал арада да  бардыла.

 Компьютер томографланы хайыры бла пандемияны биринчи кезиулеринде   коронавирусдан къыйналгъанланы иги кесегин ачыкъларгъа онг табылгъанды.   Быйыл жыл башланнганлы ОМС-ни хайыры бла 122 минг адам диагностикадан ётгендиле.

Магометланы Сулейман.