«Единая Россия» битеуроссей политика партия къуралгъанлы 20 жыл толгъаны бла байламлы аны Къабарты-Малкъарда регион жамауат приёмныйи 1-чи декабрьден 10-чусуна дери партияны регионлада башчыларыны, РФ-ни Федерация Советини членлерини, Къырал Думасыны депутатларыны, КъМР-ни Парламентини бла жер-жерли самоуправление органларыны депутатларыны инсанла бла тюбешиулерин къурайды.
Биринчи декабрьде КъМР-ни Парламенти Председатели Татьяна Егорова къауум адамны тарыгъыуларына бла тилеклерине тынгылагъанды. Ушакъ видеоконференция халда баргъанды. Анга къатышханла суу бла жалчытыуну, жолланы, арбазланы тапландырыуну, сабий садлада жерле жетишмегенлерини, пенсияланы, жашау болумну, кёп фатарлы юйледе кемчиликлени юслеринден оюмларын айтхандыла.
- Хар тилекге, тарыгъыугъа кёре не оноу, не мадар этиллиги алагъа билдирилмей къаллыкъ тюйюлдю. Бек къыйын жумушла бла байламлы уа тинтиуле бардырыллыкъдыла, - дегенди Татьяна Егорова.
Ол хар келгеннге шёндюгю законланы ангылатханды, аланы жумушлары къалай толтуруллукъларына кёз-къулакъ боллугъуна ышандыргъанды.
КъМР-ни Парламентини депутатлары «Единая Россия» битеуроссей политика партияны Жамауат приёмныйинде инсанла бла тюбешиулени дайым бардырадыла. Хар байрым кюнде уа приёмла республиканы муниципал къуралыуларында ётедиле.
Инсанланы приёмгъа алыуну графиги КъМР-ни Парламентини сайтында барды.
КъМР-ни Парламентини пресс-службасы.